راكب فطونوبيلتو طاير لمكان لي خبروه لبوليس انهم لقاوها فطريق ديال كازا.....قلبو كيضرب بجهد وعقلو ستنتج كل الحوايج الخايبة لي يقدرو يوقعو...
معاقلش على نفسو كيضرب ضو لحمر و يزيد عقلو مشوش وزاد تشوش كتر من شاف نمرة ديال ولدو طالعة ليه فتليفون..تنفس بجهد وحاول يكالمي نفسو ما يحسس ولدو بوالدو ..قبل الخط وقبل ما ينطق سمع صوتها شي لي خلاه يشد لفران بجهد تا رويض تحكو مع الارض والجسم ديالو تهز من بلاصتو...بسرعة خرج من طونوبيل كيتتنفس بجهد و كيرجع لأكسجين لي غبر عليه من سمع صوتها فالهاتف..رجع هز تليفون ويدو كترعد كل داك الخوف لي كان حاس بيه ترجع على شكل حركات...حط تليفون على ودنو ونطق اسمها كأنه كيأكد انه مغلطش فصوتها...
عصام: هاجر...
هاجر حسات بيه ماشي هو هداك : عصام مالك واقعة ليك شي حاجة ...
هاجر: انا فالمدرسة لي كيقرا فيها حاتم و بغيتك تجي عندي دابا...
عصام: ما تحركيش من بلاصتك دابا تلقايني عندك...
قطع عليها وبسرعة ركب فطونوبيل دور نمرة لنسيبو ...
عصام: الو سي حميد غير حبسو من تقلاب راني لقيتها...
سي حميد بخوف: فين لقيتيها اولدي واش لباس عليها ما وقع ليها والو ...
عصام حط راسو على لبولة ديال طونوبيل : ما وقع ليها والو انديها هاد ليلة معايا تال غدا ونرجعها ...
قطع بلا ما يتسنى جواب طرف الاخر...ديمارة طونوبيل ورجع طاير لمكان لي كيقرا فيه ولدو وعينه حاملين شرر وغضب مكبوت كيحاول يسيطر عليه لكن عمل هاجر ستفزو بوضوح تام وداك الخوف كامل لي كان فيه تحول لغضب عارم...
ركن طونوبيل ديالو امام المدرسة .وبسرعة خرج فور ما وصل لباب سمع صداع... ولغوات ديالها داير فضيحة ما حس براسو تا طار لمكان لي كيجي منو غواتها وصل لباب مخرج عينو من شافها واقفة و وجها حمر هازة ولدها وكتغوت فراجل لي قدامها...
هاجر: انا مجبتش ليكم ولدي بااش ضربووه ولا تعاودو ليه تربية انا درت فيكم تيقة ورسلتو يقرا عندكم و يتعلم على يديكم اما لكنتو كل نهار ضربوه وتجبدو ليه فودنيه بلاش راه ماشي شايط عندي ولا عندي منو عشرة...
راجل لي واقف قدامها حادر راسو حشم ما قدرش يهز فيها راس : بنتي غير سمعي اش كنقول ليك ولدك من احسن تلاميد عندي وعمري حطيت عليه يدي ولا نهضت فيه وديما كنعطي بيه مثال قدام زملاء ديالو وليوم نسا دفاتر لي هادا قانون اي واحد نساهم كنبهوه بتأنيب صغير....
هاجر كتنفس بجهد: شمن تأنيب اسيدي كدوي عليه ولدي من دخل عندي باين الخوف من عينو وما قادر تا يقرب ليا وخايف ينطق وودنيه حمرين بتجباد ..لكنتو ولادكم نتوما مولفين ليهم لعصى انا ممولفهاش لولدي وعمر صبع تحط عليه وباش انا لي مو معمري نهضت فين نلقاك نتا واخد راحتك غير تصرفق فيه راه منعقلش عليك ومن غدا نجرجرك فالمحاكم ...
عائشة شدات فيدين هاجر : عافك ابنتي راه قد باك خاصك تحتارميه هو تبع غير نضام ديال المؤسسة...
هاجر نترات يديها معصبة : الاحترام اختي واجب ولكن تال ولدي ما نعقل تا على واحد وخا يكون قد با ماشي انا راسلاه عندك مرتاحة حيت دايرة فيكم تيقتي وفلخر تركبو رعب فيه... هنا الولد كيتعلم كفاش يحارب الخوف بالدين وينور طريقو بيه ماشي يخاف من دين ويدير احتياط منو وبحال هاد تربية لي كتربيو فهاد المدرسة كتعلمو طفل لغدر قدام بنادم يكون ملاك وفلداخل يكون شيطان ...
راجل غرق فحوايجو بالحشمة وباين عليه امام مسجد : ابنتي حنا مكنعلموش ولادنا العكس يقدر هادشي جاك زايد وماشي حق ولكن هادا واجب عليا اني نكون صارم مع تلاميد دياولي...
هاجر زيرات على ولدها فحضنها : اسيدي كلامك ماشي معايا تايجي باه و يتفاهم معاك.....
دارو كاملين من سمعو صوت رجولي لي كان طول الوقت وهو واقف قدام لباب و تا حد ما رد ليه لبال وكلشي داز على المسمع ديالو ......
عصام من تحت سنانو: هاجر....
بمجرد ما سمعات صوتو خطات خطوات عندو وعنيها حمرين باين معصبة بزاف مزيرة على ولدها...هبط عينو وطلعم فيها دار ليها سكنير عاد نطق...
عصام مد ليه ساروت: تسنايني فطونوبيل.....
خدات منو ساروت وخرجات منفخة بينما هو دخل عند راجل لي كانت كتهضر معاه هاجر ...تناقش هو وياه فالهضرة بهدوء تام عكس الاعصار لي كانت دايرة هاجر....
دخلات لطونوبيل كتقلب فحناك ولدها لي جالس قدامها مخسرة سيفتها..
هاجر : كضرك بزاف...
حاتم حط راسو على صدرو : امم بزااف...
هاجر مفقوصة : اخر مرة نرسلك لهاد المدرسة بغاو يطيرو ليك ودنيك ولكن غير بلات والله لبقات فيهم...
دخل عصام جلس حداها بهدوء دور راسو لولدو هز ليه وجهو لعندو شاف فيه مزيان...
عصام: صافا...
حاتم: شوي ا بابا...
عصام بحنية لعب ليه فحنكو : نديك لطبيب...
حاتم : لا غير خليني حدا ماما و غادي نبرا......
هاجر عنقاتو بجهد عضاة شفاه ديالها جاتها البكية بينما عصام شاف فيها بصمت وديمارة طونوبيل بلا ما ينطق حرف واحد ...
حاطة راسها على راس ولدها وبنص عين شافت فعصام لي طول الوقت وهو ساكت و ملامحو جامدين بغاتو غير يشوف فيها ولا يبتاسم لكن بدون جدوى عيونو حاملين غضب شي لي خلاها ما تقول والو وتسكت طول الوقت...
#تتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
