دايرة بحال شي غريب تحط فأرض ماشي ديالو كيحاول يتأقلم بكل جهدو لكن بدون جدوى مزال الكلمة ديال "طلاق" مبغاتش دخل ليها راسها او تستوعبها كاملة ..كتشوف فنضرات مها لي كدير ليها الإشارة لكن لسان لي تنطق بيه مبغاش يتحرك و كأنه لصق..بعد ما سمعات الكلمة من عصام هزات عنيها فيه بدون فهم..حط باها يدو على ضهرها بحنية ...
سي حميد: بنتي هضري شنو بغيتي تقولي لراجلك ...
هاجر بتوتر : بب بغيت لل لعرس....
سي حميد بدون فهم : شمن عرس ابنتي ...
هاجر تزيرات بزاف : بغيتو يعاود يخطبني منك أبا ..
عصام كمش حجبانو كيفو كيف لكل كيقرا ملامحها بهدوء قال : بغيتي نعاود نجي نطلب يديك كأي عروسة جديدة ..
هاجر : بدون رد...
من شافتها حليمة سكتات تكلفات هي بالهضرة...حطات كاس اتاي فوق طبلة وتقبلات معاه..
حليمة : شوف اولدي عصام ما نافقك ما نغرك انا عارفاك نيشن وتا انا انجي ليك نيشن ..نهار لول دخلتي لهاد دار وليتي منا وخديتي اعز ما عندنا وخا فيها صداع لكن بلاصتها كبر من خوتها كاملين..نهار جيتي خطبتيها قلتي اديرها بين عنيك وما نخافو بمسألة لعمر وكلشي شاهد على هاد الهضرة ولكن ديك البنت لي عطيتها ليك ماشي هي لي قدامي دابا...
سي حميد هو وجواد خرجو عنيهم فحليمة بجهد حشمو من عصام نطق سي حميد مزير ...
سي حميد : شكاتقولي يا هاد لمرة لبنت كبرات وخاص دير عقلها شكتخربقي هنا و ...
هز عصام صبعو قاطع سي حميد وعينو على حليمة بملامح هادئة قال : كملي شنو بغيتي تقولي...
حليمة : لي بغيت نقولو اولدي راه باين و مفهوم حنا لعيب خرجناه ولي فات مات كنشوفو لقدام بقلب بيض وربي شاهد عليا راك عزيز وغالي لكن تال صغيرة عندي لي تشوا عليها قلبي ما نسامح ...من نهار طلقات وكلام ناس تبعها وبلا ما نقول ليك اش قالو عليها وهبطو كرامتها لأرض وهي ساكتة وعمرها شي نهار هضرات ولا نطقات مرضات بوحدها وعنات بوحدها تا واحد فينا ما عاونها ولا بكلمة ولكن ما حد نتا باغي مراتك وباغي ترجعها حنا ما غديش نمنعوك منها ولكن خاصك تخلص الحق كامل كيف ما خرجتيها نهار لأول من دار باها تعاود تخرجها دابا عروسة قدام كل لي تكلم ورا ضهرها وهبط من قيمتها ...
حك لحيتو بشوي وعينو مشاو لهاجر لي حانية راسها ومن سمع طلاق عرف قالو ليها كلشي اما رجال سكتو ما لقاو ما يقولو ورا كلام حليمة لي هضرتها معقولة وفنفس الوقت ما معقولاش...
