دخلات سومية منفخة مكتشوفش جيهت هاجر وجلسات حدا زاينة كتغبن وتا هاجر متسوقاتش هزات لفطور لي صوبات بدات كتحطو فطبلة لي فصالون فين جالس باها مبتاسم فبنتو وعينو كيبريو غير كيشوفها قدامو كيحمدلله على نعمة لبنات وخا عندو جوج لكن تال معزت هاجر مكاينش منها جوج وداكشي لي دازت منو خلا قلبو مخلوع عليها ولكن دابا من كيشوفها بصحيتها وبسلام كيحمدلله و يشكرو فسرو ..
عصام لي صدمة مزال لاعبة عليه هز وجهو لي مبتل بالما كيشوف فالمرأة ديال لحمام وكيرجع كلامها..واحد مشاعر غريبة بحالي تلف من سمع ولدو قال ليها نجي ونصلي بيك باش تعرفيني تعلمت..هاد الحاجة لمهمة لي خاص كل اب يعلمها لولادو هو نساها من بالو معمرو قال لولدو اجي نعلمك الوضوء ولا الصلاة رغم انه محافظ على صلاتو بشكل التزامي لكن مطاحتش ليه يعملها لولدو..
حتى طاحت عليه بحال صاعقة من شاف هاجر طفلته الصغيرة و المدللة علمات ولدها التربية الاسلامية وكدالك الأهم وهو اداء صلاة وحفظ القرأن لي خاص كل طفل يتعلمهم فسن صغيرة لانه كيكون بحال شي نبتة وخاصو يتسقى بدينو باش يتغرس ليه فجدورو...
تنهد بجهد هاز فوطة كيمسح وجهو ويديه مشا نيشن صلا صلاتو كمل ودخل لبيت يبدل حوايجو ..خدا ملابس ديال لخروج بسروال ديال توب زرق مغلوق مع قاميجة بيضة وساعة فاليد مع خاتم زواج لي مزين صبعو ..رجع شعرو لور وقاد لفاليز ديالو حطها فجنب لباب باش غير يهبط يهزها...دور عينو على الغرفة ديال هاجر لي اول مرة كيدخل ليها وكدالك بات فيها ..تحرك وسطها كيشوف تصاورها لي ملصقين فالحيط..حل لمجورة لي كلهم فيه حوايج ولدو مطوين ومستفين على حقهم و طريقهم وكل حاجة دايراها فبلاصتها و متولاها...
ترسمات ابتسامة حنينة على تغره وهو يطلع عندها والفرحة باينة فعنيه لقاها خارجة من لكوزينة هازة طبسيل لحلوى ما عرفات منين خرج ليها وقف عليها وبحب باسها فجبهتها قدام باها..
عصام: صباح لخير...
خدا منها طبسيل حطو فوق طبلة وحرك راسو لسي حميد لي مبتاسم فرحان بنسيبو ..حط يدو على لبلاصة حداه دار ليها اشارة تجلس حداه وهي مكوانسية فبلاصتها تلفات ليها لمشية.. رجل كتمشي لقدام ورجل كترجع اللور اما من شافت الابتسامة ديال باها طاح منها نص جاب ليها الله بحالي سمعهم فداكشي لي دارو لبارح ..بغا يجرها عصام ساعة لقا غير ريح اما هي طارت من قدامو هاربة كتويل على راسها ما عرفات باش تبلات...
#يتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
