خرجات من بيت مها هزات عنيها جات فعصام نيشن لي طالع من دروج هاز حاتم و كيهضر مع سمير لي حداه..هز عينو من حس بيها شاف فيها مبتاسم وهي تحدر راسها مزيرة ..دازت قدامو ودخلات نيشن لكوزينة خلاتو مافاهم والو..دور لسانو على شفاه ديالو ودخل لصالون فين كيتسناوه باها وخوتها..
جلس وسطهم كيهضر معاهم عادي وهما كيرحبو بيه احسن ترحيب مخلاوش من جهدهم ...كيهضر مع سي حميد ومرة مرة كيدخل جواد و سمير فالحديت و العيالات كلهم فالكوزينة...
جالسة فكرسي ساهية حتى نغزاتها سومية...هزات عنيها فيها بدون فهم...
هاجر: شنوو...
سومية: من صباح وانا كنعيط عليك ماصمعتيش دوزي صاوبي طبسيل ديال ديسير و وجدي طباسل صغار بفراشطهم لطارت لي فتلاجة.....
بلا ما ترد جمعات الوقفة كدير شغل لي قالت ليها ختها وراسها مرفوع...دخل عليهم ايوب لي كيتصخر على رجال بحكم من عادتهم مكيخلطوش وخا عصام منهم ولكن دايرين بحسابو لأن اصلو ريفي معندهمش عادة ديال تخلاط وخا هو عاش برا وهادشي عندو عادي ...
دفعو لراجل لعشا وبقاو هما فالكوزينة سومية وزاينة مجموعين على الهضور و هاجر ساهية عقلها غايب بينما حليمة كتوجد فأتاي...كل مرة كتنفس بجهد تا دخل عليهم حاتم مشا عندها نيشن جرها من تريكو وهي تهبط عنيها فيه...
هاجر: حاتم علاش نتا هنا سير تعشا حدا باباك...
حليمة: بغيتي نحط ليك بوحدك اولدي...
حاتم حرك راسو لحليمة ورجع شاف فهاجر: ماما وجدي لي شي حاجة ناكل معجبنيش داكشي مداقو خايب...
حليمة خرجات فيه عنيها: ياك اولدي كتعاير ليا طيابي فوجهي...
هزاتو هاجر عندها حطاتو حداها فوق بوطاجي : صافي احليمة راكي عارفة دراري صغار كيبغيو داكشي خفيف معزيزش عليهم تقيل...
دارت حليمة مخنزرة بينما حاتم قرب حدا ودن ماماه نطق بشوي غير هي لي كتسمع . ...
هاجر بزز منها ضحكات بكلام ولدها وخا مزال مزيرة من لداخل ..مشات حلات تلاجة كتقلب بانو ليها لقطبان مرقدين وهي تهزهم دارتهم فطاوة مع بصلة هي ومطيشة مقطعة دواو ودخلاتهم لفران ديال ضو على اعلى درجة...بزربة صوبات شلاضة بالخص و الخيار و مطيشة قداتهم فجوج طبيسلات مع كاس ليمون...طلات على فران بان ليها داكشي قرب يطيب وهي تعيط على ايوب..دخل عندها فمو عامر..
ايوب: خوادرية عيطتي عليا....
جبدات طوا من لفران قدات كلشي فطبسل وحطاتو فبلاطو لي فيه شلاضة وعصير وهزاتهم عطاتهم ليه وهضرات ليه فودنو..حرك راسو وخرج تابعو حاتم من لور كيضحك...
حط بلاطو قدام عصام لي هز حجبانو فيه بينما ايوب رجع جلس بلاصتو وهضر...
سي حميد ضحك فرحان و مفتاخر بي بنتو: وهانتا وخا نسات مزال عاقلة على شنو كتبغي...
عصام بإبتسامة كيشوف فالبلاطو وفولدو لي حداه عرفو هو لي ايكون وصل ليها لخبار...شاف فسمير لي تا هو بحالو دار ليه اشارة ياكل معاه بجوج معزيزش عليهن لماكلة تقيلة و خصوصا فليل كانو دايرين غير صواب بعدا عتقاتهم هاجر بهادشي...
بقاو لبنات كيشوفو فيها ويهبطو عنيها و يطلعو فيها متفاجئين حتى نطقات سومية...
سومية: اوا سمحي ليا اختي خاصك تربي ولدك شوي حنا عندنا نقولو مزيان اما عند ناس ويدير هاد لحالة راه يقولو عليه ممربيش...
هاجر حمرات فختها: ولدي مربي من عند الله ومجا طلب تا حد فيكم جاني انا نيشن كون مكانتش ماماه فالكوزينة مغاديش يدخل اصلا وهو مولف فدار باه ماكلة منتاضمة ماشي بحال هنا....
زاينة: وخا هكداك اختي تربية زينة لولاد صغار وكما دار ليك معانا ايدير ليك تا مع ناس ..زيري ما حد لولد مزال صغير و كيسمع لهضرتك...
هاجر بدون رد كملات شغل لي فيديها فصمت تام... احساس خايب تملكها وغسة خنقاتها هزات كاس لما شرباتو و الغصة مزال خنقاها مبغاش تبعد بحالي شداها لبكية....
توجهات لحمام حيدات زيف كتغسل وجها بما بارد باش تنفس حيت الاعصاب بداو كيلعبو عليها..بقات فلحمام مدة طويلة حتا حسات براحة عاد خرجات ....
بان ليها كلشي مجموع فصالون وصينية ديال اتاي محطوطة مع لفاكية وهي دخل عندهم حادرة راسها جلسات حدا باها بصمت وعيون عصام عليها حاس بشي حاجة ماشي هي هديك فيها...
حط كاس اتاي باش يقول ليهم تصبحو على خير باش يهبط يعرف مالها وهي تنطق حليمة قبل منو ...
حليمة شافت فبنتها عاضة فمها من لتحت كتشير بعنيها لعصام..تبسمات كتشوف فعصام وقالت .: ولدي عصام هاجر باغية تقول ليك شي حاجة...
عصام شاف فحليمة من سمع اسم هاجر دور عينو ليها بإبتسامة حنينة قال : كنسمعك ؟؟!..
#يتبع لكن بشرط نبغي نلقاا اجزاء كلهم لي نزلت تصوتو عليهم باااش طلع لقصة لجميع قارئات باااش فلعشيااا نزل ليكم 20 جزء لكن إلا ملقيتش تفاعل مشتوني مشفتكم زائد انكم الأن في عطلة هههه بنسبة لي كيقراو ياااالاه #تفاعل تم #تفاعل
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
