هاز كاس اتاي فيدو مبتاسم ومزال عيونو كيلمعو عارفها حشمات وماشي لولة ليها ولا اتكون لخرا وخا تزوجو شحال ولكن كتجي تال قدام باها مكتبقاش دور بساحتو كتعطيه تيقار و كتوصيه ميقربش ليها ولا يهز فيها تال العين من يكون باها حداهم.... هادشي قبل ما تفقد داكرة اما من فقداتها الحشمة عندها ضوبلات فجوج مرات ...شاف فطبلة لي موجود فيها كل ما يتشهى خاطرو و سي حميد فرحان غير يمد ليه و يضحك بحالي تزاد فعرس...
عصام بان ليه قوى عليه سي حميد وهو يهز يدو : الله يخلف ..
سي حميد : ما كليتي والو اولدي وزيد مراتك لي فاقت بكري و وجدات ليك هادشي بصحتك و راحتك...
عصام شار بصبعو لطبلة : هادشي كامل وجداتو ...
سي حميد حرك راسو : اييه تبارك الله عليها وخا مريضة مزال دراعها ناضي و شغل يديها باين الله يرضي عيها....
عصام بإبتسامة خفيفة : امــين ...
سي حمدي بملامح جدية قال : سمع اولدي انا عندي مرا بوهلاية وبعد لمرات مكتعرفش تلاقي لكلام مديش عليها وعلى كلامها وهاديك راها مراتك وحلالك بغيتي ديها دابا معاك مكاين لي يمنعك منها ...
عصام : مكاين تا عيب اسي حميد العرس بغاتو انديرو ليها.. بغيتها تفرح براسها وتنسى ما داز عليها حيت ماشي ساهل لا عليا ولا عليها ولكن حمدلله كلشي رجع كيف كان وصبر لي صبرتو عام مافيها باس نزيد صبر تا هاد شهر مهم تكون عندي هي مرتاحة ...
سي حميد ما عرف ما يقول بقا غير كيحرك راسو فرحان بنسيبو وكيف ما يفرحش وهو لقى فيه كل مواصفات الرجل لي يتمنى الاب لبنتو ...راجل معقول وصادق وزيد داخل سوق راسو مافيه عيب ..طبعا بنادم ماشي متالي ولكن لحد اليوم ما عمرهم شافو العيب منو ...دخلات عليهم حليمة لي سمعات جوب عصام على كلام راجلها ...جلسات حداهم كتفرنس وتشوف فراجلها بنص عين وترجع عينيها لعصام وداكشي لي فراسها نطقاتو بلسانها...
زاينة : مالكي نتي نايضة مغبنة هاد صباح ياك لباس...
سمية: اودي غير سكتي نهاري كحل ايدوز مع كمال حيت قالي ما تباتيش واجي لدارك وانا درت غير لي فراسي..
زاينة حطات صبعها على حناكها : اوعدي اختي واش كاينة شي مرا كتنعس بعيد على راجلها انا كون عملتها لجواد يقطع ليا رجلين راه تجي راجل فكلشي تال تباتي فبلاصة خرا ميسامحك فيه ...
سمية حطات يديها على راسها : اودي قلنا غير هاد ليلة.. ساعة صبح عند راسي كينكَر كرهني فالبيات ولي يجي منو ودابا مشا القهوى منفخ معرفت كيف ندير تا نتصالح معاه ...
هاجر دارت عندهم كتحرك فعنيها وبشوي قالت : علاش راجل مكيبغيكش تنعسي بعيد عليه ...
"تتبع"...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
