كمشات عنيها بصداع لي حدا شرجم..بقات كدور فراسها علها تلقى راحتها لكن عاد مكيزيد صداع و قوة لهضور..حلات عنيها بتعب..جلسات فوق ناموسيتها كتحك عنييها ...طلات من شرجم لزنقتهم شعبية لي نايض فيها نشاط ...
جراة كيهضرو مع بعض من شراجم و دراري كيتغاوتو فزناقي و رجال جالسين كيهضرو و يلعبو ضامة....تنهدات بجهد ولفات لكالم مع عصام.. تفيق و قت ماقالها ليها راسها و كلشي كيجي تال بين يديها ماتحتاج دير والو...
راحة لي كانت كتحس بيها وهي معاه ماشي نفسها وهي فدارهم لي مكيعملوهاش كاع كيف كيعاملها عصام....
لبسات بنطوفتها و غير بشوي طلعات لفوق لابسة قبية مغطية شعرها بالقب و عنيها منفوخين بنعاس...طلات عليها حليمة من كوزينة....
حليمة : تبارك الله على الحادكة ديك ساعة غير بقاي ناعسة تال لعصر حسن....
هاجر بصوت مبحوح غالب عليه نعاس: يالله 12 هادي احليمة مالكي كتغوتي...
حليمة خنزرات فيها : كتقولي فيها بوجهك حمر شوفي لالياتك فايقين مع صباح خملو و نفضو و جمعو دارهم و نصبو لغدا راه قرب يطيب و نتي عاد فايقة....
هاجر : افففف احليمة متزديش عليا بنکير الله يرحم باك عطيني لكان شي فطور نفطر....
حليمة : ادوزي تصاوبي لراسك لا عنداك تصحابي عندك الخدمات هنا يتصخرو عليك...
هاجر جاتها غصة فحلقها صرطاتها بصعوبة ..بشوي دخلات لكوزينة بقات كتشوف فبلاصتها تحاجة ما عجباتها...وهي تخرج معصبة...دخلات لصالون بان ليها حاتم جالس و كاع الهضرة دازت على ودنو ...
جلسات حداه منفخة وهو ساكت كيشوف فيها...حدرات راسها و نطقات بشوي...
هاجر: فطرتي....
حاتم وخا مفطرش حرك راسو : اه فطرت....
هاجر عرفاتو كيكدب غير من عنيه لي واضحين مكيعرفش يكدب...جراتو عندها معنقاه بحنية لحد الان مزال ممستوعباش كيف قدرات تربي بحال هاد الولد لمأدب و ذكي و كيعرف كيف يهضر عكسها هي تماماً ..لكن من كتفكر عصام كتفهم منين جات شخصيتو و تربيتو...حطات جبهتها على جبهتو بحنية...
هاجر : متبقاش تكدب على ماماك ،ما فطرتيش ياك....
حاتم شاف فيها وحناكو حمرين حرك راسو بشوي : تا واحد ما عطاني ناكل و بقيت كنتسناك تفيقي ....
هاجر تزيرات : علاش مفيقتينيش نعطيك تفطر ؟؟؟...
حاتم: كنتي ناعسة و بابا كيقولي من تكوني ناعسة منفيقكش و منديرش صداع حيت كتكوني عيانة ...
هاجر : هادشي علاش كنتي جالس و ساكت مبغتيش دير ليا صداع....
حاتم حرك راسو ببرائة...بقات كتشوف فيه و بحب بتسمات ليه..عنقاتو بجهد بين احضانها ...هزاتو معاها وهبطات بشوي لتحت دخلات لبيت هزات بزطام ديالها دارتو فجيبها و خرجات هي و ياها...وكاع ناس كتشوف فيها وهي دايرة راسها على حاتم كتهضر هي و ياه...دخلو لمحل ديال حلويات خداو طبلة و طلبات كل لي تشها ولدها و خدات راسها...
حدرات راسها كتاكل و نطقات بشوي....
هاجر: حاتم عارف حنا ما بقيناش فدار بحال لي عند باباك ..هنا كنديرو كلشي راسنا مكاينش لي يخدم علينا ....
حاتم هز طرف من لكاطو: عارف اماما بابا علمني هادشي كلو...
هاجر بتسمات كتمسح ليه جناب فمو لي عمرهم شكلاط: هاد لمرة من تبغي شي حاجة اجي قولها لماماك متبقاش ساكت و لا تخبي عليا صافي....
حاتم فقط حرك راسو كيضحك معاها و من طريقة اكلو واضح انه كان فيه جوع...عضات شفاه ديالها مزيرة جاتها البكية من تصرف حليمة و غضب على نفسها انها سمحات فولدها من نهار جات وهو مكيقول والو وفقط راد ليها البال بحالي هي لي بنتو ماشي لعكس... بزربة مسحات دمعة مبغاتوش يشوفها و كتحاول ضحك بزز منها باش ميحسش بيها ....
#يتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
