حليمة حزمات راسها بزيف ايطرطق بصداع : نوضي من قدامي جيبي ليا دوايا يا المساخيط طلعتو ليا سكر اتقتلووني ما فيهاش...
سومية ناضت كتغبن وتضرب فرجليها مع الأرض ...
حليمة : بقاي تغبني عليا تم شوفي معاك ختك تجي تفطر وتشرب دواها راه من كان راجلها ما دخلات نعمة لكرشها تقول بحالي عمرها شافتو ...
سمية بزز منها جابت ليها دوا : راه فطرات مع ولدها اتكون لتحت ناعسة حيت فاقت بكري...
حليمة : من ناعسة خليها وجيبي ليا ورقة وستيلو نقيد كاع دوك لي حلو عليا فمهم نهار طلقات هاجر لا ما طرطقت ليهم لعنين والقلب بهاد الخطوبة و العرس راني ما تزوج فيا العسكري غير لخلا...
سمية كتقاد شعرها لي تشعكك: على هاد لحساب خاصنا جوج قاعات لا بغينا نجمعو كاع هاد ناس لي هضرو نهار طلقات ....
حليمة : ماشي صوقك انا قادة بشغلي والله يخلف على نسيبي قالي فيديك كلشي ديري ما بغيتي..
سمية مدات ليها كتاب وستيلو وهزات لمرايا كتشوف وجها واش مقموش : اوا هو قال هادشي حيت نتي قلتي نهار طلقات ما خلاو ما قالو عليها وحنا بلا ما نكدبو على راسنا عارفين معزة ديال عصام لهاجر ..يسمح لكلشي الا لي يهبط منها ولا يقولها خايبة عليها...
حليمة : حنا ما قلناش العكس ولكن صحة بنتي هي لولة وهي من مشات عندو وهي لور لور وانا من شفت بنتي حالتها فصبيطار طار لي لعقل و العيب خرجناه لا مني ولا منهم تا هما ما شدوش فخاطرهم جيهتي...
سمية : غير نتي والياقوت اما عصام مادخلش كاع وخا تعصبنا من رسلها وغبر هاد لغبرة قلنا واقلة مبقاش باغيها ساعة ها هو جا و وافق على شروط ديالنا كاملين وسد لينا فامنا حنا قبل كلشي...
حليمة : نوضي بعدا عيطي ليا على ديك فضيلة هي لبركاكة ديال الحومة واي حاجة سمعاتها اتوصلها ليهم سخونة تجي نقول ليها هاجر ايعاود راجلها يدير ليها لعرس نطرطق ليهم دوك العروق لي ركبو فيا نهار طلقات....
سمية هزات يديها لسما كطلب لعفو من مها : واعيطي بعدا على ختك راه مزال شادة من جيهتك ونتي نسيتيها كاع...
حليمة: ما نسيتها والو خلي غير تفيق هاجر ويرجع حاتم من المدرسة ونمشي عندها بيدي نصفيو الخواطر كنت غير معصبة اما ديك كلمة متخرج من فمي ...
وصل لدارو مسخسخ وعيان جر فاليز ديالو وطلع فسانسور نيشن ابرطمو ديالو... جبد ساروت حل و دخل كيحك فراسو ...دور عينو على شقة لي كانت كبيرة ومفرشة فراش مغربي عصري بلون ابيض داخل فيه رمادي ..نقية وريحت الورد منتاشرة فيها حيت قبل مايجي عيط لعساس ديال عمارة يطلع شي عيالات ينقيوها...
دخل بيت نعاس حيد حوايجو ودخل نيشن لدوش تخشى تحت رشاشة ولما سخون كيهبط على طول داتو وجسمو المنحوت...خرج كينشف شعرو لبس شورط قصير وتلاح فوق ناموسية عنيه كيتلصقو بنعاس هز تليفون بانت ليه اسماء مصونية عليه بزاف وهو يتنهد ما بغاش يجاوبها عارفها اتهضر غير على لكلام لي قالت الياقوت ليه وتطلبو يرجع لدار ..
لكن بالنسبة ليه فعلا الياقوت ما قالت عيب هو لي تيق راسو وضن انها عائلتو لكن الحقيقة المرة هو ما عندو تا علاقة بعائلة "بن جلول" ....
طفا تليفون بدون ما يعاود يصوني عليها ..ما باغي مشاكل مع منير لي مدخلاش ليه راس العلاقة الاخوية لي بينو وبين اسماء وديما في فمو "غريب كيبقى غريب"...ربما شخص الوحيد لي حسبو عائلتو و كتر هي هاجر..فور ما تدكر اسمها داز خيالها قدام عينو شي لي خلاه يتبسم بحنية ...خشا راسو تحت المخدة ونعس بحال شي طفل صغير....
بعد مدة وهو في سباته العميق طاح طيحة وحدة بحال لميت..حل عينو وملامحو مخصرين فدقان لي ملئ كل ارجاء الشقة....جمع الوقفة كيسوط ومزال منو لشورط معول على خزيت فهادا لي هرس لباب بدقان...
