الكبيره ٢ بقلم / لولو_محمد

الحلقه ١٥٠

((((((( الكبيره ٢)))))))
#لولو_محمد
الحلقه ١٥٠
نجاه تروح مع جوزيف و يشاور لها تبدا و هو بيصد
جوزيف / مالك؟!
نجاه / ركز فى التمرين
جوزيف / المهم تكونى انتى مركزه
نجاه / هو انت بجد هتشجع مين فينا فى الماتش ده
جوزيف / مش هشجع حد اللعبى
نجاه تبطل لعب و تبص له بحزن
نجاه / مش هتقدر تعيش حيادى العمر كله
جوزيف / هسالك سؤال بسيط .... لو واحد امه و مراته اتخانقوا يعمل ايه ؟
نجاه / الوضع مختلف كليا
جوزيف / و لا كليا و لا جزئيا بالعكس على الاقل انا مش مكتفك ليها و بحاول اساعدك تدافعي عن نفسك قدامها اهو
نجاه / انت مكتف البلد كلها ليها يا يونس
جوزيف/ مش عارف و الله مين مكتف مين لمين فى البلد دى و الله ... اللعبى يا نجاه الرجاله بتتفرج علينا
نجاه تهز راسها و تلعب
نجاه / انت بقي شايف انى ما اقدرش على امايا
.........................
جوزيف / هتاذى نفسك و انتى بتحاولى
نجاه / تقصد ايه ؟!
جوزيف / ما عندكيش نقطه رجوع محتاجه تبقي ارزن من كدا
نجاه / ارزن ؟!!
جوزيف / غريبه اوى صح ؟! مش عارف مش لاقي لها معنى تانى فى دماغى دلوقت خلينا بس نركز فى التمرين
نجاه / انت ازاى اقنعت بابا يوافق
جوزيف / هو كان عاوز بس محتاجنى اتحايل عليه شويه حفاظا على ماء الوجه
نجاه / مالك يا عم البحتري امال لو ما كنتش خواجه
جوزيف / واضح ان الشمس مأثره عليا شويه ما تدوقيش بقي
نجاه / اسمها كَبِرى عَقلوكِ
جوزيف / طب نركز بقي عشان انا لو نسيت نفسي و ضحكت هيطلع عنينا احنا الاتنين و انتى عارفه بيحبونى موت موت موت
نجاه / بعد الشر
جوزيف / انا مقدر طبعا خوفك عليا بس لو ما اتعدلتيش و ضربتى جامد هضربك
نجاه توقف و تبص له مبتسم تهز راسها ماشي و تبدا تطلع كل اللى جواها
جوزيف / ايوه بقي كان فين الوحش ده من بدرى
نجاه تكمل فى صمت جوزيف يضربها يوقعها فى الارض 
جوزيف / كل حركاتك متوقعه ما فيش جديد بتكررى نفسك اه سخنتى شويه بس هى نفس المشكله ما فاجئتنيش
نجاه تقبض بايدها على كبشه رمل و تحدفها فى وش جوزيف يداري وشه تكون قامت و ضربته وقعته فى الارض و لسه هتضرب يدحرج بعيد و يقوم يقف و هو مغطى عنيه تقف
نجاه / انت كويس ؟!
دياب من بعيد / وقفتى ليه خلصى عليه لو فاق اكيد هيرد
نجاه تبص لدياب داخل و فى ايده ازازه مايه لجوزيف يغسل عينه
نجاه / احنا بنتمرن ما ينفعش ناذى بعض و دى عين مش هزار
دياب / تمام ؟!
جوزيف/ شكرا ... عجبتنى الحركه بس هو معاه حق و بالمناسبه انا بعرف اللعب حتى و عيني مقفوله و دى بقي حواس المفروض نظريا انكوا متمرنين عليها
دياب / بصي اللى يونس بيحاول يقولهولك اننا مش فى بطوله رسميه فيها قوانين و حكام و نقط احنا فى حرب و الحرب ايه ؟!! الحرب خدعه
دياب يكعبل جوزيف من ورا يوقعه على ضهره و الاتنين يضحكوا و نجاه متفاجئه دياب يمد ايده لجوزيف يقومه و يفضل مركز معاه
جوزيف/ بالظبط كدا ما تخليش اللى قدامك يتوقع رد فعلك و لا فعلك حتى مش بس الرد و اللى تكسبى بيه اللعبى بيه حتى لو هتاذى لأنك لو ما اذيتيهوش هو هياذيكى
نجاه / بس احنا فى تمرين
جوزيف / اه بس انتى لازم يكون عندك غل انا عارف انك كيوت و قمر و كل حاجه
نجاه ترتبك و تبص لدياب اول ما عينهم تيجي فى عين بعض  جوزيف يضرب دياب بضهر ايده فى فم معدته دياب يقع فى الارض
جوزيف / بس لازم تعرفى امتى تردى و تاخدى حقك اول ما اللى قدامك يفقد تركيزه صح يا دياب
دياب يبص له و يهز راسه جوزيف يمد له ايده يقومه
دياب / خالصين ؟!
جوزيف / مؤقتا
دياب / فى اى وقت يا صاحبى
نجاه/ امشي انا طيب و لا ايه
دياب / فهمتي حاجه و لا ضربنا بعض على الفاضي
نجاه / فهمت
دياب / تمام نبدأ
جوزيف ياخد دياب على خوانه و يقلبه فى الارض و يقوم يقف يبعد بسرعه و هو هلكان ضحك
جوزيف / خليكي فاكره خليكي دايما بغل و الضربه تترد اتنين
دياب / اتعلمى
نجاه / اتعلمت عقبالك
........................
فى سرايا الجوارحه
مغاورى يدخل يلاقي سماح قاعده لوحدها فى الجنينه يروح لها
مغاورى / الجو حلو النهرده
سماح / كنت فين؟
مغاورى / كنت بخلص حاجه السفر حجزت على الخميس الجاى باذن الله هنقعد هناك إلى أن يشاء الله
سماح / و هتقدر تبعد عن البلد الفتره دى كلها
مغاورى / محتاج ... انا مش قادر اخدم البلد و لا قادر افوق من اللى انا فيه هروح اصلى و ادعى و انسي الدنيا باللى فيها
سماح / لحد امتى هتقدر تعمل كدا
مغاورى / لحد ما اشحن طاقتى لحد ما اخرج من اللى انا فيه امتى بقي الله اعلم
سماح / يومين تلاته بالكتير
مغاورى يبتسم لها
سماح / اول ما اى حد فيهم يقع فى مشكله هتبقي اول واحد يجرى يرمى نفسه فى النار عشانهم
مغاورى / ربنا يستخدمنا و لا يستبدلنا و اكيد لو اقدر اعمل اى حاجه ما ينفعش اتأخر ابدا
سماح تطبطب على كتفه
مغاورى / الجماعه مش عاوزين يرجعوا
سماح / لما نسافر هيرجعوا ما تقلقش
مغاورى / انا مش عاوز اجى عليكي بس ... مهما كانت ظروفك و وجعك ما ينفعش تيجي على حد خصوصا لو كان من اللى منك يا سماح
سماح / انت عاوزنى اروح أراضيهم ؟
مغاورى / انا مش عاوز حاجه انتى عارفه الصح من الغلط و الحلال من الحرام انا بحبك و واثق فيكي هتعملى الصح... انا هطلع انام شويه صاحى من بدرى
سماح / مش هتاكل ؟
مغاورى / لما اصحى
سماح / طب تعال نريح سوا يلا
مغاورى / يلا
مغاورى يقوم يمسك ايد سماح و ياخدها تحت باطه و يطلعوا على فوق
.......................
فى عربيه دياب
نجاه تركب و دياب يركب و يقفلوا البيبان
نجاه / لحد اخر ثانيه كنت مستنياك تضربه
دياب / و هو كمان عشان كدا ما عملتش حاجه
نجاه / عجبانى علاقتكوا على  فكره مع انك متربى مع جابر و بينك و بينه دم عمرك ما قبلت منه هزار زى ده و لا هو و لا اى حد
دياب / جابر عمره ما يعمل حاجه زى دى اصلا و لا حتى بهزار و بعدين جوزيف لو عاوز ياذى او جواه غل مش هتبقي حركات زى دى هيوجع جامد فانا فاهم انه بيهزر
نجاه / بس هو فعلا بيحاول يقرب منكوا نفسه يبقي واحد مننا بجد
دياب / طب ما هو واحد مننا فعلا
نجاه / نظريا انما عملى بقي مش عارفه
دياب / انا مش شايف اى تقصير من ناحيتنا خالص بصراحه بالعكس احنا معدين له كتير و كتير اوى كمان
نجاه / طب عموما انت ايه رايك فيه
دياب / عاوزه الحقيقه ؟
نجاه / اكيد طبعا
دياب يفكر
دياب/ مش عارف
نجاه / ازاى يعنى
دياب / حقيقي ... بتكلم جد ... مش عارف ... ساعات بحس أنه كويس و بقتنع قد ايه تاب و بقي كويس و بنبهر بيه كتير جدا بس فى اوقات تانيه بخاف منه و بخاف اثق فيه صعب اوى تتعاملى مع حد طول الوقت لازم تبقي حريصه اوى فى التعامل معاه
نجاه / تفتكر ممكن يخون
دياب / يخون دى تقوليها على واحد مننا انما يونس مش مننا
نجاه/ ازاى و انت بتقول يونس مش جوزيف
دياب / ما هو المشكله انه صريح و قال انه مستمر فى هدفه و لازم يقنع الكل انه مكمل دى برده بتزاول الواحد
نجاه / انت توهتنى اكتر
دياب / و انتى ايه رايك
نجاه / رايي انه بيحاول ... تايه و خايف ... خايف يصدق خايف يطمن بيحاول يداري و يرسم زى هاله كدا حواليه يحمى نفسه بيها ... نفسه يعيش زى باقي الناس نفسه الناس تحبه و يندمج ... ساعات بحسه عيل صغير و بشوف لمعه فى عنيه كدا لما ... مش عارفه اوصفها ازاى  ... هو بس حوار انه معتبر امايا اخته و بيدافع عنها بالشكل ده قافلنى منه اوى
دياب / قافلك و لا قالقك
نجاه / اصل مش هو لوحده اللى بيدافع يعنى ما عمى مختار كمان عنده امل كبير انها ممكن تتغير ... عشم ابليس طبعا
جوزيف يخبط على شباك عربيه دياب دياب يفتح الازاز
جوزيف / فى حاجه و لا ايه
دياب / لا تمام ماشيين اهو
جوزيف / هشوفكوا تانى قريب مش كدا
دياب / ممكن بكره فى الملعب بقي
جوزيف / تمام هستناكوا ... سلام
دياب / سلام
دياب يقفل الشباك و يسوق و يلف بالعربيه جوزيف و نجاه عنيهم تيجي فى عنين بعض و جوزيف مبتسم 
.................
فى شقه عويس
بدر / يعني احنا هنفضل عايشين هنا طول العمر
نسمه / ما اعرفش بس اكيد هيجي وقت هنروح البيت
بدر / امتى
نسمه / قريب ان شاء الله
بدر / امتى يعني
نسمه / هو انا مش جبت لك لعبك كلها مالك بقي
بدر / مش عاوز اقعد هنا
نسمه / ليه بس حد هنا بيضايقك
بدر / انا بخاف من جدى اوى
نسمه/ ليه بس يا حبيبى دا حتى بيحبك اوى
بدر / طول ما هو فى البيت بيزعق و ببقي خايف... بابا ما كانش بيزعق
نسمه / الله يرحمه... هو فى زى ابوك
بدر / هو صحيح اللى قتله عاوز يتجوزك ؟
نسمه / انت بتقول ايه ؟! مين اللى قالك الكلام ده
بدر / سمعتكوا بتتكلموا
نسمه / انا ما اعرفش مين اللى قتل ابوك بس انا شخصيا مش عاوزه اتجوز حد انا عاوزه اربيكوا و بس و بالنسبه للراجل اللى بيتكلموا عليه فدا اللى  كان هيموت عشان ينقذك هو ما قتلش ابوك و لا له دعوه باللى جراله بالعكس دا اكتر انسان اتاذى ان ابوك الله يرحمه مات
بدر/ امال ليه جدى بيتعصب اوى كدا لما بيسمع اسمه
نسمه / مشاكل ناس كبار ما لناش دعوه بيها
بدر / مش انتى كبيره
نسمه / مش اوى يعني انت عاوز تكبرنى عشان ابطل اللعب بلعبك اه منك انت يا لقيم
نسمه تزغزع بدر يضحك
نسمه / الراجل ده مش وحش الراجل ده اتظلم جامد اوى و مع كدا عمره ما فكر ينتقم او ياخد حقه بالعكس عمرنا ما احتاجناله الا اما كان قبل الكل فى ضهرنا يا بدر ماشي ؟!
بدر / ماشي
نسمه / اجيب لك تاكل؟
بدر / عاوز بيض عيون
نسمه / عيونى ... ثوانى بس
نسمه تقوم و بدر قاعد بيلعب جنب فايز
......................
فى الشيلتر
شاكر يدخل مكتبه و يفتح باب لاوضه فيها سرير و دولاب صغير يروح يقلع عبايته و يرميها على السرير و يرمى الموبايل و المفاتيح عليها و يقلع الجزمه و يحط جواها الشراب و يروح يفتح الدولاب و يطلع غيار و يروح الحمام و يقفل عليه الباب تليفونه يرن يفتح باب الحمام و يروح يقعد على السرير و يرد
شاكر / السلام عليكم
مختار / و عليكم يا سيدي انت مش هتهدى الا اما تجنن لى الست دى مش كدا
شاكر / انا ؟! انا عملت ايه بس و بعدين هى فين ردوا التحيه بأحسن منها بقي فين هاه فين
مختار / امك هتيجي تجيبك من شعرك اخوك وصل و انت رايح لى الشيلتر ؟!
شاكر/ ادخل عليكوا بعفرى يعني جيت بصيت على الدنيا و هغير و اتشطف و هاجى و الله انا وعدتها ساعه زمن بالكتير و ابقى عندكوا
مختار / و احنا ما عندناش حمامات هنا تتنيل فيها
شاكر / فرقت ايه بس ليه العصبيه دى
مختار/ نص ساعه و تكون قدامى
شاكر / حاضر
مختار/ سلام
شاكر / سلام
شاكر يحط التليفون و يدخل الحمام و يقفل الباب
........................
فى سرايا الزنايته
جابر رايح يركب العربيه عباده ينادى عليه
عباده/ جابر
جابر يقف و يبص و يروح له يقرب المسافه
عباده / على فين كدا
جابر / على الجبل معاد تغير الورديات فى حاجه و لا ايه
عباده / لا بطمن عليك بس
جابر / انا تمام الحمد لله
عباده / لما الجبل يرجع باذن الله هنعمل فرح عمران و ناصر
جابر / هى نور وافقت على الكلام ده
عباده / دى مشكله ناصر بقي عاوز يتجوز يتفضل عاوز يصبر براحته المهم ان فى فرح لما ربنا يكرم و الجبل يرجع المهم يعني انا قررت باذن الله ان فى اللمه دى هعلن انك هتبقي الكبير
جابر / مش وقته يا كبير
عباده / ليه دى اصلا كانت فكرتى من الاول و كلمتكوا كلكوا فيها قبل كدا بدل المره اتنين و تلاته و دلوقت انا شايف ان فعلا لما تمسك الموضوع و انا موجود اوجهك و اساعدك احسن مليون مره اما تصحى فجأه تلاقى نفسك فى وسط البحر كدا عميانى
جابر / لما الجبل يرجع نبقي نشوف
عباده / ليه بتقولها كدا هيرجع باذن الله
جابر / بالطريقه دى ... سفارى و مشاوي و فسح و لعب ... هننجز كدا يعني؟!
عباده / عندك طريقه احسن و اسرع و ما نخسرش فيها رجاله كتير ؟
جابر / و حضرتك تضمن انهم بعد كل الوقت ده هينزلوا بالسهوله دى لما يتزنقوا هيغدروا و ساعتها برده هنخسر رجاله كتير
عباده / يبقي تفتح عنيك كويس للحظه الغدر دى
جابر / و الله انا عامل اللى عليا و ربنا يقدم اللى فيه الخير
عباده يطبطب على كتف جابر
جابر / حضرتك هتعوز منى اى حاجه تانى ؟
عباده / سلامتك
جابر / عن اذن حضرتك
جابر يركب العربيه و يمشي مختار يروح يقف مع عباده
مختار / ما اهتمش صح
عباده/ فاقد الشغف
مختار / عمرى ما فهمت الجيل ده.. عمرى..  حساسين اوى احنا كنا بناخد كل كف من الدنيا ينطح اخوه و لا عمرنا كنا حساسين بالشكل ده و سبنا الحزن يسيطر علينا بالشكل ده 
عباده / كف عن كف يفرق ... انا رايح المسجد
مختار / انا جاى معاك تعال
..........................
فى الشيلتر
شاكر يطلع من الحمام بينشف شعره يلاقي امايا نايمه فى السرير و بتلعب فى موبايله يتفاجئ
امايا / نعيما
شاكر / بتعملى ايه هنا
امايا / المفروض تأمن موبايلك اكتر من كدا افرض وقع فى ايد حد كدا و لا كدا
شاكر / هجيب غيره
شاكر يروح يفتح باب الاوضه
امايا / فرقت معاك اوى ؟! هو فى غيرنا فى الشيلتر كله
شاكر / لا انا بطردك عشان عاوز اجهز امى مستنياني و دى لو اتاخرت عليها اجارك الله بقي فلو الموبايل عاجبك حلال عليكي و ان كان المكان عاجبك اشبعى بيه بس دلوقت اطلعى بره لحد ما اكمل لبسي و اتوكل على الله
امايا / الكداب بيروح فين يا شاكر
شاكر / بيروح مع اللى بينشروا الفحشاء وسط الناس يا ست الكل يلا بقي انا لحد دلوقت زوق معاكى اقولك اطلعى اقفى على الباب من بره و نتكلم من ورا الباب لحد ما اغير بس ... اقولك و على ايه صحيح خليكي انا هدخل اكمل لبسي فى الحمام
امايا / هو انت مكسوف منى و لا ايه
شاكر / اوى بتكسف اوى
شاكر يشد جلبيه من الدولاب و يدخل الحمام و يتكلموا من ورا الباب
امايا / جالى اتنين من رجالتك عاوزين يشتغلوا معايا عقبالك ما تعقل كدا زيهم
شاكر / رجالتى ما بيشتغلوش مع حريم 
امايا / و مالهم الحريم ؟! وحشين ؟!
شاكر يفتح الباب و يروح يلبس العبايه و الشراب و الجزمه بسرعه
امايا / انا ما بحبش اللف و الدوران
شاكر / كويس عشان ما تدوخيش
امايا / بس انت شكلك بتحبهم اوى
شاكر / مش قولتى ما بتحبيهمش ؟! ما تيجي سكه و قولى جيالى ليه ؟! ايه رجالتى ما ادوكيش اللى يريحك
امايا / انت ليه بتدى لكل واحد من الرجاله عنوان مختلف للدهب تفتكر لو عرفوا انك بتشتغلهم كلهم موقفك هيكون ايه ؟!
شاكر / انا ما بشتغلش حد و لا بكدب و كل مكان منهم فى دهب فعلا انا اللى حاطه هناك بايدى اصل انا امى اللى هتنفخنى دلوقت دى علمتنى ما احطش البيض كله فى سله واحده على العموم اديكي عرفتى العناوين سلتيهم انتى بقي بشطارتك
امايا / عشان تعرف مين منهم باعك و اشترانى؟! مش سهل انت خالص يا شيكو
شاكر / انا مضطر اقطع حديثنا الشيق اوى ده و امشي البيت بيتك ما انتش غريبه عن اذنك
شاكر يسيب المكان و يمشي
امايا / موبايلك يا شيكو
شاكر ما يردش و ينزل يجرى يروح يركب العربيه و يسوق و هى بتتحرك وراه ببطئ و دلع و ابتسامه
امايا / مستكبرين يشتغلوا تحت حرمه و هم حرمه بتجريهم بكلمه منها زى الفراخ عاش يا دودو اهى دى النسوان
امايا تقف و تبص للكاميرا و تضحك و الموبايل فى ايدها تحطه على المكتب و تمشي
..............................
فى فيلا دياب
الكل قاعدين بياكلوا و دياب قاعد بيتكلم فى التليفون
دياب / لا وديه الشركه و اكشف عليه الاول و الأفضل و الاضمن تجيب واحد تانى خالص ... لا ما تقدرش تدخل السيستم من تليفونك ما لكش اى صلاحيات على السيستم ... ممكن تكون بترميلك كلمه و خلاص بتشوف رد فعلك او عوزاك تتوتر ... لا هو اكيد لو اتعرف هيبقي فيها كلام مش هنضحك على نفسنا و اكيد كان المفروض تعمل حسابك فى حاجه زى دى قبل ما تبدا ... ايوه عارف ان ما دام عرفت يبقي فى اكتر من خاين و هى مش هتحرق ورقها و تقولك مين ... لا ما لكش دعوه باللى بلغونى ... لا دى مش زى دى طبعا مش معنا انهم بلغونى يبقي خونه ... خانوك انت ازاى يعني ايه الأوفر ده ... طب انا هاكل و اجيلك نتكلم ..اه عندك و هنقول للكبير و نحطه فى الصوره ... لو ليك رأي تانى قوله ... لا ما طلعناش بحاجه من الحرامى ... يا عم هاكل لقمه و اجيلك هاكل!! ايه ما اكلش ... تمام ساعه زمن ... ساعه يا عم مش سنه بقي ... وله وله انا باكل سلام
دياب يقفل السكه و يرزع الموبايل و يكمل اكل
نجاه / خير
دياب / دا شاكر ست امايا حطاه فى دماغها و بتنط له فى كل حته راح يتشطف فى الشيلتر و يغير طلع لقاها فاتحه موبايله و بتلعب فيه
ماجده / و يتشطف فى الشيلتر ليه ما روحش السرايا على طول ليه ؟
دياب / هو حاطت غياراته هناك انا مالى
نجاه / هو اصلا بقاله فتره طويله عايش فى الجبل و ما بيجيش السرايا غير زيارات كدا
ماجده / ايوه عارفه الحكايه دى بس عمرى ما فهمت ليه
دياب / و لا حد فاهم هو بيقول مرتاح كدا جرب مره عجبته و عايش من يوميها لازق لصابر زى ضله
نجاه / استفاد منه كتير على فكره
دياب / لا هو الجبل كدا كدا بينشف و بعدين هناك بقي لا فى نت و لا تلفزيون يعني  وقتك كله فى المفيد و بس
نجاه / طب انتوا كنتوا بتتكلموا عن خونه ايه الموضوع ده
دياب / بيقولك اعمل حساب عدوك مره و اعمل حساب صديقك الف مره ربنا يحفظنا شر الفتن
نجاه / هتوصل لحد فين نفسي افهم
دياب / كل واحد فينا ليه بدل نقطه الضعف ميه ما تحكميش على حد و انتى مش مكانه
نجاه / مفيش مبرر للخيانه يا دياب
ماجده / ما قالك ربنا يحفظنا شر الفتن
نجاه / امين
ماجده / كل يا قلبي كل عشان تلحق تروح تشوف هتعمل ايه فى الموبايل ده ... و انتى كمان كلى زمانهم هلكوكى هناك جرى و تنطيط مش فاهمه و الله عليكي بايه من دا كله
نجاه / جلد ذات بقي
دياب يبص لها و يضحك و يكمل اكل وفاء تدخل من بره
وفاء / خيانه
دياب / انتى اللى  اتاخرتى
ماجده / كان مصمم يستناكى على فكره بس جاله مشوار فكان لازم ياكل
وفاء / مش محتاجه تدافعي عنه يا ست الكل انا قولت له ياكل عشان كان فى ايدي حوار كدا
دياب / ايه الاخبار
وفاء / كله تمام الريبورت عندك على الموبايل
دياب يمسك الموبايل و يبص فيه ماجده تغرف لوفاء
...........................
فى سرايا الزنايته
شاكر و عمران قاعدين بيضحكوا فى اوضه
عمران / لا وربنا ليظبطه دا ابوك مستحلفله الراجل العره ده
شاكر / لا كلو كوم و امك كوم تانى
عمران / طب و الله البت بتصعب عليا اكبر دليل انها مش جينات و لا الدم بيحن و لا كل الكلام ده
شاكر / ربنا يهدى الجميع و يكفينا شر الفتن
عمران / امين المهم بقي انا عاوزك تنجزنى فى موضوع الجبل ده انا خللت
شاكر / لا ما تقلقش باذن الله خير و عن قريب كمان
الباب يتفتح و ناصر يدخل
ناصر / كنت بتعمل ايه انت و امايا فى الشيلتر
عمران/ طب قول سلام عليكم حتى ايه الدخله دى
شاكر / تفتكر ايه اللى ممكن نكون بنعمله يا ناصر
ناصر / ما بفتكرش و جيت اسالك
شاكر / انا دخلت الحمام طلعت لقيتها ماسكه موبايلي و فتحاه سبتهولها و مشيت
ناصر / بس كدا ؟!
عمران / انت بتلمح لحاجه يعني و لا انا فاهم غلط
شاكر / لا ما بيلمحش هو بس عاوز يطمن عليا مش كدا يا ناصر
ناصر / انا عارف البت دى اكتر منك و عارف السكه دى
شاكر / اولا كدا كل حاجه فى الشيلتر متسجله بالكاميرات و ...
ناصر / الا اوضه النوم اللى كنتوا فيها
شاكر / ما الوقت اللى جمعنا فى الاوضه ما يكفيش اعمل اى حاجه اصلا بالعقل يعني
عمران يضحك
ناصر  / انا ما بهزرش
شاكر يقوم يقف قدام ناصر
شاكر / لا بتهزر عشان انا لو خدت كلامك جد هتزعل
ناصر / و انت بقي اللى هتزعلنى
عمران / اعقل يا ناصر و ما تركبش نفسك الغلط
شاكر / انا دخلت الحمام اتشطف طلعت لقيتها فى الاوضه كملت لبسي فى ثوانى و مشيت مفيش اى حاجه حصلت بينا تمام ؟!  تمام و لا لا
ناصر / تمام
شاكر / انا مقدر خوفك عليا و مقدر ان مفيش حد كبير على الغلط
ناصر / و هى مش سهله و عارفه هى بتعمل ايه كويس
شاكر / و احنا مش صغيرين ... كبرنا يا ناصر ... كبرنا
عمران / و بعدين البنات ما خلصتش يعني عشان يبص لدى يعنى
شاكر/ يا عم و لا دى و لا غيرها .. لان الحلال أجمل سانتظر يا جدع
ناصر / تمام
شاكر / دياب جه و لا لسه عاوز اروح الجبل
ناصر/ لسه
شاكر / امال عرفت منين
ناصر / من ابوك كان بيتكلم مع عمى عباده
شاكر / ابوك اللى انا اللى قايل له اصلا!! يعني جاى تكلمني و تسألني عن حاجه انا اللى قايل ليكوا عليها اصلا !!
عمران / خلاص بقي يا رجاله غيروا السيره دى خايف عليك يا جدع
شاكر يطبطب على كتف ناصر
شاكر / اقعد اقعد
........................
فى مكتب الزنايته
عباده/ كانت فكره ممتازه مش مضايق منها خالص على فكره
مختار / ما عملش حساب ان يبقي فى اكتر من خاين
دياب / انا عندى حل نصلح بيه الموضوع ده بس هيكلفنا حبه حلوين
عباده / سامعك
دياب / احنا هناكد فعلا كلام شاكر و هنحط دهب حقيقي فى كل الأماكن دى
عباده / و ده هنعمله ازاى و اكيد الاماكن دى دلوقت كلها متراقبه يعني اى رجل عليها هتثير الشكوك
دياب / الا لو كانت رجل شاكر و الراجل اللى اتفق معاه على المكان ده يعني بمعنى تانى احنا هنقول ان شاكر ما قدرش ينقل الدهب كله فعلا فى مكان واحد و لانه شك أن فى ناس معينه خانت فهو قرر ينقل الدهب من الأماكن دى لأماكن تانيه فهياخد الراجل اللى هو المفروض وثق فيه ينقل معاه دهب من المخزن التانى ده للمخزن اللى هم متفقين عليه و المفروض ان جواه الدهب ايه رايكوا
مختار/ حل كويس بس هيدوخ
دياب / هيدوخ شاكر اه ما قولتش لا بس هيدوخ وراه كمان اللى ما يتسموش
عباده / فى جميع الاحوال هيخلينا نكسب وقت و نبعد عنيهم عن المكان الاصلى
دياب / بس نفس المشكله محتاجين دهب و لو فكرنا نجيب من المخزن الاصلى
مختار / لا لا لا مش هنحتاج ابدا حاجه زى دى احنا لازم ننسي نهائى مكان مخزن الدهب الاصلى و رجلنا تتقطع من عليه خالص
دياب / امال هنجيب الدهب منين
مختار / من السوق عادى انا هتصرف و هجيبه
دياب / بس دا هيكلف جامد اوى احنا بنتكلم فى كميه دهب عملاقه
مختار يبتسم و يهز راسه لا دياب يستغرب و يبص لعباده
مختار / هو ما حدش قال لشاكر انك هنا و لا ايه هو فين الجدع ده
...........................
فى اسكندريه
ياسمينا / لو عاوز ننزل انا مش هقول حاجه ننزل بكره عادى
منصور / لا انا بس خايف اكون متقل على دياب
ياسمينا/ كلمه
منصور / عمره ما هيقول ما انتى عرفاه
ياسمينا / خلاص ننزل هيحصل ايه يعني و لا حتى هنعمل ايه هنا اكتر من كدا خلينا ننزل اهو على الاقل ما نربطش نجاه جنب العيال اكتر من كدا
منصور / نجاه مين ؟! نجاه قضت النهرده كله فى الجبل بتتمرن مع الرجاله
ياسمينا / هو الجبل رجع ؟!
منصور / و لا رجع و لا نيله اهم عاملين حفله مشاوى و راصين شويه عربيات و فرحانين باللمه
ياسمينا / بس قالوا ان الاكل هيخلص و اكيد هينزلوا
منصور / و اهو عدى قد ايه و الاكل زى ما انتى شايفه مكفى و شكله فايض كمان
ياسمينا / مساله وقت مش اكتر
منصور / مش عارف ربنا يفرجها من عنده
ياسمينا / فكر فيها و شوف انت عاوز تعمل ايه و اى كان قرارك انا عمرى ما هقول لك لا و لا هضايق فشوف عاوز تعمل ايه
منصور يتنهد و يبص الناحيه التانيه
......................
فى شقه عويس
عويس خارج من الحمام كان بيتوضي يشوف بدر خارج من الاوضه رايح الحمام و هو بيدعك فى عينه
عويس / صح النوم على فين كدا على الصبح
بدر / رايح اتوضي عشان اصلى الفجر
عويس / يا ما شاء الله يا ما شاء الله طب يلا اتجدعن و أنجز عشان اخدك فى ايدي و انا نازل نصلى الفجر جماعه
نسمه تطلع من الاوضه شايله ملايه فى ايدها
نسمه / انت لسه ما اتوضتش يا بدر يلا يا حبيبي عشان تلحق تتوضي
عويس / هو عملها على روحه و لا ايه
نسمه / غفلت عنه امبارح و ما قلقتش اوديه الحمام بس الحمد لله يعني وديته قبل ما يغرق الدنيا كان يا دوب سرب كدا عدت الحمد لله
عويس/ غفلتي و انتى ما وراكيش غيره !!! امال لما تتجوزى يا ست العرايس هتعملى ايه ؟! ما باركتش لأمك يا بدر عدتها خلصت النهرده و  هتتجوز و هتجيب راجل غريب ينام مكان ابوك
نسمه / ارتحت كدا ؟! حسيت انك مرتاح و مبسوط ؟! دا انت متوضي و نازل تصلى الفجر حتى استفدت ايه قولى استفدت ايه
عويس / ما ارتحتش ما اللى تكون دى خلفته لا يشوف راحه و لا يشمها  ... انا نازل يا بدر خليك جنب امك يمكن تفتكرك انت و اخوك
عويس ينزل
بدر / هو انتى هتسبينا ؟!
نسمه تروح تحضنه و الدموع ماليه عنيها
نسمه / انا عمرى ما اسيبكوا ابدا عمرى
.........................
فى السوق
راجل من السيرك يروح عند بياع خضار
الراجل / بكام الطماطم النهرده
البياع / شطبنا الفرشة كلها متباعه
الراجل / متباعه ازاى امال بتوزن للناس دى كلها ازاى
البياع / يا سيدي انا زى ما بقولك كدا بعت الفرشه كلها الصبح و اقولك حاجه اريحك بيها كل السوق ده النهرده متباع ابقي تعال بكره بدرى يمكن تلحق لك حاجه
الراجل / يعنى مش عاوز تبيع لى كتر خيرك بس خليك فاكر
بياع على فرشه تانيه يدخل فى الحوار
بياع ٢ / يا اخينا الراجل مش بيشتغلك سى ناصر الزينى جه الصبح و اشترى السوق كله و قال نفرقهم على أهل البلد اللى محتاج حاجه ياخدها و اللى عاوز يحاسب فلوسه تتحط فى صندوق المسجد و اللى مش قادر ياخد اللى محتاجه ببلاش
الراجل / طب ما انا محتاج
بياع ٢ / و انت من اهل البلد يا عم الحج انت شغال عند الخوجات و دول بالذات كدا ممنوع نبيع و لا نشترى منهم و لا نتعامل معاهم اساسا
الراجل / ما انتوا اتعاملتوا معايا و خدتوا و اديتوا فى الكلام اهو على العموم انا زى ما قولت مجرد شغال عندهم هم بقي يصطفوا مع سي ناصر بتاعكوا ده انا مالى
بياع ١ / نورت السوق يا ابن عمى
............................