[Unicode]
ကားပေါ်သို့ရောက်သော်၊ ကုံးရင့်ရှန်၏မျက်နှာသည် ပင်ပန်းနွမ်းနယ်မှုများနှင့်ပြည့်နှက်နေပြီး၊ မျက်လုံးအောက်ဘက်တွင်လည်း စိမ်းဖန့်ဖန့်အရိပ်လေးရှိနေကြောင်းကို ရန်ရိတွေ့လိုက်သည်။
ရန်ရိသည် မျက်မှောင်ကြုတ်ကာပြောလိုက်သည် ：
“ မင်း အမှုဖြစ်ပြီးကတည်းကအခုထိ အိပ်ရောအိပ်ပြီးရဲ့လား ？”
“ ခဏမှေးထားတယ်။ ”
ကုံးရင့်ရှန်သည် သိပ်အရေးမစိုက်စွာဖြင့် ပြောလိုက်သည်။ ဖျော်ဖြေပွဲတွင် ဖြစ်ပျက်ခဲ့သည့်——ကျစ်ယန့်၏ကိစ္စဖြစ်စေ၊ ရန်ရိ၏ကိစ္စဖြစ်စေ——အကုန်လုံးသည် သူ့အား အိပ်ပျော်ဖို့ရန်ခက်ခဲစေခဲ့သည်။ ထို့ကြောင့် သူသည် ယခုအချိန်အထိ အလုပ်ကို မနားစတမ်းလုပ်နေခဲ့ခြင်းဖြစ်သည်။
“ ငါ မောင်းပေးမယ်လေ။ ဘာပဲဖြစ်ဖြစ် ငါက ခဏလောက်တော့အိပ်ထားသေးတယ်။ ”
နှစ်ယောက်သား နေရာလဲလိုက်ကြပြီး၊ ရန်ရိသည် မြောင်မြောင်ကို ကုံးရင့်ရှန်၏ကိုယ်ပေါ်သို့ တင်ပေးလိုက်သည်။
“ မင်းလည်း ခဏလောက်အိပ်လိုက်ပါ။ ”
“ အိပ်မပျော်ဘူး။ ”
ကုံးရင့်ရှန်သည် မြောင်မြောင်ကို ပွတ်ပေးရင်း၊
“ သူ နည်းနည်းလေးထွားလာပြီ။ ”
“ နေ့တိုင်းစားနေမှတော့ သေချာပေါက် ထွားလာတာပေါ့။ ”
ရန်ရိက ပြောသည်၊
“ ထိုင်ခုံကိုချလိုက်၊ နည်းနည်းလောက်ဖြစ်ဖြစ် ခဏနားလိုက်။ ကောင်းကောင်းအိပ်မထားရင် စဥ်းစားနိုင်စွမ်းကို ထိခိုက်လိမ့်မယ်။ ”
ကုံးရင့်ရှန်သည် ထိုင်ခုံကိုချလိုက်ပြီး၊ ခါးကို နည်းနည်းလေးဆန့်လိုက်သည်။ ထို့နောက်၊ ကုတ်အင်္ကျီဇစ်ကို ဆွဲဖွင့်လိုက်ပြီး၊ မြောင်မြောင်ကို ရင်ခွင်ထဲသို့ထည့်လိုက်သည်။
မြောင်မြောင်သည် ခေါင်းသေးသလေးဆန့်ထုတ်ကာ၊ ညှောင် ဟုတစ်ချက်အော်လိုက်ပြီး၊ ကုံးရင့်ရှန်၏ကိုယ်ပေါ်တွင် လိမ်လိမ်မာမာနှင့်ဝမ်းလျားမှောက်လိုက်သည်။ ခန္ဓာကိုယ်ကို ကောင်းကောင်းကွေးလိုက်ပြီး ဆက်အိပ်ရန်ပြင်လေသည်။ ဤကဲ့သို့သော နွေးထွေးသည့်ထုပ်ပိုးပေးထားမှုကို အလွန်သဘောကျနေကြောင်း သိသာပေသည်။
YOU ARE READING
Fight The Fire 《火焰戎装》Myanmar Translation
General FictionOriginal Author : 水千丞 (Shui Qian Cheng) Myanmar Translation of Fight the Fire 《火焰戎装》 196 Chapters + 4 Extras Disclaimer : I don't own this story and any picture that I used in this story. All credits go to author 水千丞 and original artists. I transla...
