عشقك إدماني

parte 124

تنطق إلياس من صالون : يلاه اسيادنا خليناكم على خير
خرجات عندو رحمة ونطقات : اولدي مالك على هاد زربة باقي الحال جلسو معانا
إلياس : مرة اخرى ان شاء الله
مصطفى: بقاو تاتخذو معانا ݣوطي وديكساعا سيرو
إلياس : مرة اخرى ان شاء الله ممسالي عندي غدا الخدمة وكما كتعرف إسراء حتاهيا قارية غدا
مصطفى : شغانقولكم الله يوصلكم على خير
عمر : امين يارب كن مانا خدامين غدا وصوفيا ماهي قارية كون بقينا معاكم ولكن راه القراية والخدمة
رحمة : مسخينا بيكم عمرتو علينا مرة مرة جو عندنا راه ولات دار خالية خصوصا ملي مشاو بناتي صوفيا وإسراء
خرجو البنات من البيت جات عندها صوفيا وعنقات مها ونطقات ممازحا لها : اوا رحمة شتك وليتي تبغي العمارة ياك كنتي تقوليلي مصدعا الوقت دبا بغيتيني
رحمة لوات فيها قرصة لين طارت صوفيا كتنقز من حر ونطقات : وماما وعلاش قرصتيني والله تاحشوما عليك
رحمة : باش مرة أخرى تعيطيلي بماما ماشي برحمة يقلل حياك ابنت كرشي
إسراء بتاسمات وخا بريق عينها فيهم حزن ولكن قالت تايوصلو تم وتشرحلو ويحلو مشاكلهم فالسر ونطقات : هكاك امي رحمة عطيها يلاه باش تقاد مع طريق
صوفيا : سيري نتي بعدي مني كتشعلي عوافي ياشعالة العوافي
إسراء عوجات فيها وصوفيا كذلك وتخطاتها وعنقات رحمة ونطقات رحمة هامسة لها : سايسي ابنتي مع راجلك الا شتيه باقي معصب متهدريهش تاتشوفيه برد وشرحيلو باللتي هي الأحسن
إسراء همسات لها : وخا مي رحمة وسمحيلنا على هاد صداع لطرا بسبابي
رحمة همسات لها كذلك : اهذيك هبيلة اشمن صداع مزيان باش نيت داك ولد حليمة يتهدا ويبعد من طريقك
إسراء فصلات عناق ونطقات : انتوحشك امي رحمة ان شاء الله انجو عندك مرة اخرى
رحمة : تاأنا انتوحشك ابنتي وردي بال راسك
ومشات إسراء سلمات على مصطفي وصوفيا سلمات على مها وباها ونزهة سلمات على رحمة ونطقات : احسن حاجة تعرفت عليك ارحمة
رحمة : تاأنا انزهة عرفتي كنتذكر فيك غير خديجة الله يرحمها بحالها فوطوكوبي ديالها
نزهة : ونعم بالله الله يرحمها يوسع عليها انا حنا اصلا توأم
رحمة : بصح مشاء الله ، امين يارب
رحمة سلمات على حاجة فاطمة : حاجة زورينا مرة اخرى ان شاء الله عندك متزورينا
حاجة فاطمة: ان شاء الله ابنيتي الا كتبها الله الله يرضي عليكم ويجعل اعمالكم في ميزان حسناتكم ان شاء الله
مصطفى : امين يارب الحاجة تهلاي فراسك
حاجة فاطمة : الله يكثر من امثالكم تهليتو فبنيتي وحفيدتي الله يجازيكم بالخير كن مانتوما علم الله كيأتكون حالتها الوقت صعابت
إسراء دمعو عينيها ومسحتهم بالخف ونطقات صوفيا : ناري على دراما فيك بكي ابنيتي بكي دموع نشفتيهم
إسراء : نتي بعدي مني لهيه متخلي حد اتأثر على خاطرو والو
اما مصطفي مشا خدمو ملي تسالم مع عمر وإلياس وحاج مهدي
وخرجو ركبو فاللوطو ديالهم عمر فاللوطو ديالو وإلياس معاه مهدي لراكب قدام فاللوطو ديالو لكان باغي يركب اللور وهو يقولو ركب قدام
اما داخل عندهم نطقات
رحمة : هاديك بنتنا احاجة والله شاهد لا بحالها بحال صوفيا بناتي وكنعزهم على قلبي وقبل متوفي خديجة كانت ديما إسراء معمرا علينا وصوفيا كذلك
نزهة : الله يخليهم لبعضياتهم
رجعات صوفيا عنقات مها وفصلات عناق ونطقات : انتوحشك بزااف اماما كن ماشي قراية كن بقيت معاك هنا
رحمة : امتا اديري عقلك اصوفيا المفششة لاخرا سيري دار راجلك وديها فقرايتك وتاراجل متهمليه بقاي حالالي داك الفم لين طيرو منك شيواحدة
صوفيا : صافي اماما صافي حرجتيني
رحمة : وتانتي اإسراء توكظي معايا ومتعكسيش وليقلهالك راجلك ديريها والا كان معصب سكتي تايكمل عاد هدري
إسراء : اااه صافي امي رحمة كوني هانيا
رحمة : يالله سيرو بناتي الله يفرشكم بالرضى ويغطيكم بالرضى
صوفيا : امين يارب
إسراء : امين
يلاه بغاو يخرجو حيت إلياس وعمر ككلاكصوني عليهم باش يخرجو
تنطقات رحمة لمشات ماشيا كوزينة : بلاتي نعطيك شي حليوات قديتهم والا تشاهتها منكم تاكولها
إسراء : الله يخلف عليك امي رحمة انا نيت تشهيت حلويات ليكونو مصنوعين من دار
صوفيا : شكرا ماما
رحمة مشات جابت سوبيرات فإيديهم عطات صوفيا وحدة وإسراء ووحدة وكذلك نزهة وحاجة فاطمة ونطقات : يلاه طريق سلامة الله يوصلكم على خير
نزهة : امين يارب اختي يلاه بسلامة
وئام : بسلامة اخالتي
أية : ان شاء الله فقريب نزوروك
رحمة : ان شاء الله ابناتي الله ينجحكم ويوفقكم
أية : امين يارب اخالتي طالبين غنجحو
رحمة : ان شاء الله علاش لا ونقطة زوينة
أية : ان شاء الله
وخرجو من دار ركبات صوفيا حدا عمر واللور وئام وأية ونطق عمر : على سلامة كن بتو معاهم حسن
صوفيا : هههههه الله يسلمك تعطلنا عليك
عمر : واه وبزااف هاد كامل سلام
صوفيا : ههه اوا شغدير
اما فاللوطو إلياس كان راكب هو حاج مهدي كجمعو تطلعات إسراء اللور وحداها نزهة وحداها حاجة فاطمة
ودمارو نيشان شاديين طريق
وإسراء اكتشوف و كتفكر كفاش إلياس مدهاش فيها بحلا مكيناش بقا فيها الحال وهي اعلى سبة مع هورموناتها مخربيقين
في مستشفى
حليمة كتمشي وتجي فداك كولوار ونطق معطي : ياهاد الامرة جلسي لارض تبتي
حليمة : اوف اميمتي راه ولدي هذا امعطي راه بغاو يرزوني فيه راه كبدتي هذيك و بغاو يشوني فيه
معطي اب اشرف ونطق هو مربع يديه وجالس فكرسي بالبينية ديالو متوسطة لابس عليه تريكو صوف بالرمادي وسروال كحل وبلغة فرجليه ونطق : ولدك لدارها بيديه اش قربو بنت الناس مزوجة داخلا سوق راسها بالطبع راجلها الا شاف هكا راه غيدير مكثر حمدي الله لولدك مغرقو فحباسات ولا قتلو وخلاه دبا ترحمي عليه راه هذاك عميد شرطة
حليمة جلسات ونطقات : صافي سكت المعطي راه ولدك عييت معاه ينساها ويديها فحياتو ولكن اشغندير معاه عييت
معطي طبطب على ظهرها ونطق : اكون خير اكون خير تاهو هاد ضسارة ديالو خاصها تحبس راه زعما بعقلو الله يهديه
حليمة : امين يارب وينساها عليه مبغاش نشوف ولدي اتعذب بسبب حب طرف وحد
تخرج طبيب وناضت حليمة ومشات عندو بزربة ونطقات بلهفة : قولي عفاك طبيب ولدي امتى غيفيف من البنج
طبيب : واحد ربع ساعة غيفيق والله يجيب الشفاء
حليمة : امين يارب
وخلاهم مشا بقاو كتسناو تخرجو من عندو ممرضات ودخلو داخل غرفة لكان فوق سرير كتوسطها بنية أشرف وفاصمة لمدورا على راسو من ديك ضرب لضربو بيها إلياس مع الحيط وشي جروحا عليهم فاصمة وجلسات حليمة فكرسي لحدا سرير وكدوز إيدها على وجههو وكتغطيه واما معطي جلس فوق كنابة وكشوف فيهم ونطق : حليمة مديريش فبالك راه تبارك الله ولدك راه ولا راجل و غيصح وغيلقى بنت الناس لتبغيه ويبغيها متهزيش الهم
حليمة : على الله من فمك السماء راني خايفة عليه
تبدا أشرف كيحل عينيه وكانت رؤية مضببة وعاود سدهم عاد فتحهم وحس بألم فظيع على مستوى راسو ونطق كتأنن : اي الواليدة
حليمة : الله اولدي الله وش لباس كضرك راسك ياك اولدي
أشرف بقا شحال كستوعب ونطق : حمدالله
هو عينيه حاقدين ومغدد فقط افكار كدوه ويجيبوه باش ينتاقم منو ومزير على إيديه
حليمة : اولدي اش قربك للإسراء هانك شفتي حالتك دبا
أشرف مردش عليها ونطقات تاني : اولدي بعد منها راه مزوجة راه ولات براجل حيدها من بالك نساها صافي
أشرف : الواليدة نتي سباب
معطي ناض ونطق : اشرف كفاش هي سباب
أشرف زير على إيدو ونطق : ااه هي سباب ملي كنت كنقولها كنبغي إسراء خطبي هالي شكنتي كتقوليلي كنتي كتقوليلي خليها بقا صغيرة
حليمة كتستامع لو وهبطات راسها فلارض ونطق هو بالحقد :ولكن بربي الا مخذتها منو ومندمتو على نهار حط إيدو عليا منتسماش أشرف وشهدو على كلامي
حليمة طلعات عينيها بزربة فيه ونطقات :وش منيتك وش عارف شكاتقول ولا طايح على راسك وش باغي تحمقني وش باغي تقتلني بالمحاين هدر
معطي : دير عقلك اأشرف ولا هاد مرة منعقلش عليك
أشرف : انا مدايرش عقلي الواليد انا هاديك إسراء غتكون ديالي وغندمها حيث حݣراتني وراجلها الا مكانت موتو على يدي منتسماش
حليمة حطات إيدها على راسها ونطقات مغددة : وش عارف شكاتقول راه انت وقيلا كتقلب على حباسات وش بغيتي تعفن فالحباسات هاأ وش باغي تمحني دير عقلك فوت عليك سيدة راه مزوجة كن كانت كتبغيك مغاديش تزوج ومغاديش تبقا تقمعك راها مكتبغيكش اولدي شوف ليك شيواحدة تبغيك وتبغيها
أشرف نطق بزعاف : سكتو براكة خرجو عليا نتوما غكاتهضرو محاسينش بيا ولكن هانا انا مغندير دبا والو وخرجو الله يخليكم خلوني بغيت نبقا بوحدي
حليمة : الله يهديك هانا انخرج نمشي نجيبلك متاكول ودير عقلك
معطي : اشرف هاودني منك ياغدير عقلك ياغتشوف وجهي تاني ورانك عرفني وانت رانك تبارك الله كبرت وباقي كدير فعايل مراهقين اشهاد شوهة لداير فين نحط انا وجهي
هو يخرج معطي وحليمة وخلاو أشرف كتوعد
ونطق بينو و بين نفسو : سي إلياس الا مخليتك تموت ونحيدك من طريقي انا ماشي أشرف الا مقتلتك وخليت ساحة خاوية ليا انا ماشي أشرف ديتيها مني ولكن انت غتديك الموت