عشقك إدماني

parte 126

نهار جديد
اصبحنا واصبح الملك لله
فاق إلياس بكري دوش عليه مشا دريسينغ لبس قميجة بيضة وسروال كحل مع تجاكيطة كحلة ولبس ساعة يدوية لزينات معصم يد و نشف شعرو عاد صلى صلاتو و تاجه فتح ريدوات ووقف عند راس إسراء ونطق : إسراء يلاه اعمري فيقي يلاه عندك قراية
بقا شحال كعيطلها بسيف باش قدرات تحل عينيها ونطقات : شحال ساعة
إلياس : دبا راه 7 يلاه هانا نزلت تحت عندك 15 دقيقة تكوني تحت باش نفطرو على برا
إسراء كتشبح بإيديها فوق نموسية كتستاعد الاستيقاظ ونطقات وهي عينيها تقريبا مغمضهم : وخا صافي
هو يهبط إلياس تحت جلس فصالون كما العادة شاد قهوتو وكقرا فجورنال
اما هي ناضت دوشات ومشات دريسينغ ختارت لباس لغتلبس لبسات قميجة قهوية مع سروال دجين ونشفات شعرها ولبسات عباية صلات بيها عاد حيداتها ولبسات تجاكيطة كحلة وسرحات شعرها قداتو كوب شوفال وبالنسبة وجهها دارت فقط ليكخون ومرطب شفاه وهزات شكارة كحلة دايرة فيه دفتارها وستيلوات عاد هبطات تحت من بعد مهزات كورميط دارتو فإيديها وخاتم زواج ديما عايد فإيدها مكتحيدوش ورقات إلياس كرشف من قهوتو وطلع عينو فيها ونطق : كصبحتي اعمري
إسراء بتاسمات ونطقات : حمدالله
ناض إلياس ودرع لإسراء فجنبو كما العادة وخرجو من فيلا ركبات هي عاد هو ركب فاللوطو ودمارا نيشا لواحد ريسطو مطل على بحر افطرو فيه
بعد دقائق كانو وصلوا تم نزل هو ونزلات هي من بعد مبلاصا اللوطو ودخلو ريسطو ختارو وجهة لكتبين منظر واعر جلسو فيه وإسراء نطقات : واو هاد بلاصة واعرة حبيتها
إلياس حدو بتاسم لها
خداو طلباتهم وجلسو كفطرو وكهدرو ومتنغمين بجو ديال صباح
خرجو من ريسطو من بعد مكملو فطورهم ودمارا نيشان الجامعة حطها تم رقات ديجا صوفيا وريتاج كاينين تم وهو من بعد موصاها دمارا نيشان خدمتو اما هي جات عندهم ونطقات : وتبارك الله نتوما ديما لولين
صوفيا : اوا ختي حنايا ماشي بحالك نتعطلو
إسراء : شتيني معطلة راه جيت بكري
ريتاج طلعات عينيها فيها ونطقات : الهبيلة هانيا عندك توحشتك اختشي
إسراء : ههههه توحشتيني ولاش معايراني البارح
ريتاج جات عندها وعنقاتها ونطقات من بعد مفصلات عناق : يلاه زيدو عودولي شنو خلاكم تمشو لكازا.
صوفيا : زربانة نتيا
ريتاج : ونتي قلتيلي تجي إسراء وهاهيا جات يلاه عودولي
إسراء : اوا باش غنبدا
ريتاج : فيما بديتي
إسراء : مهم هانا انعاودليك
عوداتلها كلشي مخلات تاحاجة وريتاج غكتشوف مصدومة ونطقات : هاد خونا وخا مزوجة مبغاش ايبعد من طريقك
صوفيا : ويه راه ملي كنا فالليسي و هو غتابع إسراء وإسراء كتقمعو
إسراء : وبنادم اصلح لو هو لقلب عليها
ريتاج : صراحة بصحة ولد خالتي عطاه قتلة ديال العصا تاأنا الله يجيب ليغير عليا واضارب على ودي
صوفيا : ههههه حمقة صافي
ريتاج : قولو امين قولو
إسراء : ههههه ، امين يارب
بعد دقائق كهدرو بنات تجات جوهرة
جوهرة من بعد متسالمات عليهم ونطقات : كدايرين البنات لباس عليكم
صوفيا : حمدالله وانتي
إسراء : حمدالله
ريتاج اكتقلب بعينيها على معتصم تنطقات : اجوهرة
جوهرة : اه نعام
ريتاج : وش خوك متلاش كوصلك ولا شنو
جوهرة : ااه راه ...إسراء لدارت إيدها على راسها ونطقات مقاطعة جواب جوهرة لغتجاوبها : ماشي نتي لقلتيلي نسيتيه لاش كتقلبي عليه
صوفيا : وداكشي كنشوف
ريتاج : وعادي غسولنا احيث كجيك ولد عمتك اإسراء ضروري نسولو عليه مالو مسكين مبقاش كجيبها وصافي
معتصم كان واقف بعيد مشافوهش وكسمع حديثهم ونطق هو باغي فخاطرو يحرج ريتاج : نعام اختي كتسولي عليا ؟! علاش ؟!
إسراء وصوفيا بقاو كشوفو و ريتاج لولا وجهها مزنك من حرج وهمسات لجوهرة : علاش مقلتليش خوك هنا حشوما عليك والله
جوهرة : وراه كنت غنهضر غاقطعاتني إسراء
ريتاج لهمسات لها وهي قربات تبكي من حرج : اوف تفو سيري قوليه امشي و انا تفرشت لعطا الله عطاه عتقيني الله يرحم باك
جوهرة بإبتسامة بلهاء : خويا يمكنلك تمشي راه حنا غندخلو دبا ياك البنات
إسراء : ااه غندخلو
معتصم لداير اديه فجيب ديال تجاكيطة وهو عينيه حاضيين غاريتاج لمهبطة عينيها تحت وكتفرك إيديها بتوتر وهو ينطق : لا مغانمشي تتجاوب هادي على جوابي
إسراء همسات لصوفيا : اناري مال مها زهرها مكوز
صوفيا همسات لها كذلك : وحق الله زهر مزفت عندها
ريتاج طلعات عينيها فيه دغيا هرباتهم ديك جيه ملي شافت شوفاتو مفيكسيين عليها ونطقات : اااه اشمن جواب مفهمتش
معتصم حرك راسو يمين وشمال ونطق : بشمن صفة كتسولي عليا نتي ؟!
ريتاج سرطات ريقها دموع تحجرو فعينيها ولكن حبسات راسها ونطقات ببرود : علاش غادي نسول عليك مجرد كان ضحك بيناتنا فهذا مكيعنيش غادي نسول فيك اوك
معتصم : مزيان مزيان راه عندك الاجوبة لكلشي
جوهرة جرات معاها ريتاج وصوفيا وإسراء تابعينهم ونطقات جوهرة : بسلامة اخويا
معتصم حدو حرك راسو ومشا
هوما ماشيين داخلين مع بوابة جامعة وكهدرو
ونطقات صوفيا : ياه صحبتي على زهر عندك ديما مواقف محرجة تبعيناك
ريتاج : صافي سكتي اصوفيا الله يرحم باك
إسراء : جوهرة علاش مقلتيلنا بلي خوك كاين
جوهرة : وراه ملي بغيت نجاوبها وقطعتيني وجيت بغيت نهدر تاني بقيتو بلا بلا بلا ومكتسكتوش
صوفيا : وصافي لعطا الله عطاه دبا غتنسايه عليك وتهنينا وتركني رانك سمعتي شقالك
إسراء : كما قتلك صوفيا خاصك طبقيه نسايه صافي ريتاج : وراه غنساه اصلا نتوما تيقتوني انا غمعجبة بيه دبا صافي داك إعجاب مشا ندير انا ضحك فراسي ملي مسطية
صوفيا : اوا هكاك
جوهرة : شوفي اريتاج ميبقاش فيك الحال راه خويا هكا داير بحال هكا كهدر عندو نيشان هو
ريتاج : اصلا لاش غيبقا فيا الحال راه قلنالكم صافي نسيناه واصلا موجود تيتيز عطالله فمن نتزعط
إسراء : لاحول ولاقوة الا بالله العلي العظيم مزال معجبة بداك خو راجل ختك
ريتاج : راه خو خطيب ختي ماشي خو راجل ختي
إسراء : وبحال بحال فأخير غيكون راجل ختك وجوبي تبقاي ديريلنا لف دوران
ريتاج : هو من ناحية الزين زين وختكم كتموت على زين والوسامة
صوفيا : ايه كملي
جوهرة : ههههه اميمتي زهوانية نتي لشتيه تزعطي فيه
ريتاج نسات راسها وبقات كتهضر وتعبر من داخلها : ومهم هو طولة ولكن مغيكونش بحال معتصم ناري على صوت عندو وتكظيرة والوسامة وطولة لا لا ختي معتصم لاغير وزيد شخصية وكبان معقد واو معندي مندير بدوك لمتفتحين لا لا معتصم هو لصلحلي
جوهرة مصدومة فيها اما صوفيا صافي ماتت بضحك ونطقات إسراء : سيري ابنتي سيري قالك نسيتو شوفي ادبا كفاش كتهضري عليه قالك اعجاب رانك طحتي على زنافرك
ريتاج يلاه عاقت براسها ودارت إيدها على فمها ونطقات وهي كدور لا يكون تاني معتصم : وشوفو لا متفهموش غلط نتوما قلتولي وش زوين عطيتكم وصف صافي فهمتو شجاب معتصم كاع مهدرت عليه
صوفيا : ياه على نكارة ماشي نتي عاد دبا كتوصفيه وتقولي معتصم ديالي هههههه وناري
جوهرة : عرفتك كتموتي على خويا ههههههه حالتك صعيبة نقدر نعاونك وخا خويا صعيب مهم الا تعاونا اقدر اطيح فيك هو دبا الا تزوجتو ونهارالعرس شنو غنلبس قولو البنات
إسراء: انا بعدا غنلبس داك قفطان جوهرة غيجيني على مزيناتي
صوفيا : تاأنا غنلبس قفطان جوهرة ونتي حتانتي لبسي قفطان
جوهرة : مزيانة غنجو واو بحال فتايات القوم
إسراء: تماما وندخلو حنا بزينا كتشاير
ريتاج كتشوف فيهم ومربعة إيديها ومخنزرة وشافت فيها إسراء ونطقات : امالكي اشكاين لاش كتخنزري فينا
ريتاج : سيرو عطوني تساع اخر مرة تهضروني
ودخلات القاعة وخلاتهم اكشوفو ونطقات
صوفيا : هذي مالها
جوهرة : منعرف لها شي حنا غا كنشوفو شنو غنديرو لها فعرسها
إسراء : ويه انا مفهمت مالها
ودخلو قاعة
يقراو دوزو ربعات سوايع ديال حصص عاد خرجو وريتاج متجهلاهم وهوما كجمعو بيناتهم تشداتها إسراء ونطقات : اييه اديك البوهالية اتبقاي متجاهلانا ولاشنو
ريتاج : خليني عليك عفاك نتوما كضحكو فيا حيث تكلمت بلا وعي عليه ولكن تيقيني راه باغا نساه غامفهمتش مالي ، معرفت كفاش وليت باغياه انا راه حاسة بالحرج من نفسي بزااف
صوفيا جات حداها ونطقات : الحمقة وعادي اصحبتي الحب راه ماشي حرام علاقة غير شرعية هي لي حرام حيث الا درتي علاقة غير شرعية او تصاحيب بصفة عامة راه اول حاجة كتخوني ثقة والديك والله مغاديش يرضا عليك اما الحب راه كلنا ضروري ولابدا غيعجبنا شي إنسان غنبغوه
إسراء: تماما وليبغاك اريتاج مغاديش ايضيع وقتو معاك فدوران فزناقي تحت مسمى تصاحيب راه نهار غادي يبغيك غيشوفك انك ديالو انك تكوني مراتو وغيقصد داركم وتانيا لاش مقلقة نتي عادي راه غأيام والا بغيتي تنسايه غتنسايه غير هو علاقة غير شرعية بعدي منها شيحاجة غادي تشوفي راسك غتفقدي فيها كرامتك وتولي مدلولة بعدي حيث الا وليتي مدلولة غتولي رخيصة لجا غيزمط عليك والا وليتي رخيصة راه باين عربون
جوهرة : ااه بصح البنات
ريتاج بتاسمات لهم وعنقات صوفيا وإسراء عناق الثلاثي ونضمات لهم جوهرة فعناق رباعي من بعد مفصلات عناق ونطقات : شكرا بزااف ليكم على نصائحكم لكتعطوني انا محضوضة بصداقتكم
إسراء : حتا حنا محضوضين بصداقتك اريتاج
صوفيا : نتي راه ختنا