အလှလေး ရှောင်မန် (Myanmar translation) Book 2

အခန်း (၂၃၃)

အခန်း(၂၃၃) : ပါတနာ၏ စွမ်းရည်များကို ရရှိခြင်း

Husky ဆိုတာ ဘယ်လိုမျိုးလဲဆိုတာ အဲလ်ဗစ် မသိသော်လည်း ဂူမန်မန် သူ့ကို အဲ့လိုခေါ်တာ ခဏခဏကြားဖူးသည်။ ထို့ကြောင့် ဂူမန်မန်နေသော ကမ္ဘာတွင် Husky ဆိုသည်မှာ ဝံပုလွေကို နောက်တစ်မျိုး ခေါ်သည်ဟု  သူ ထင်မှတ်လိုက်မိသည်။

သူ လေးနက်စွာ ခေါင်းကိုညိတ်ပြီး ပြောသည်

“ နတ်ဘုရားတမန်တော်မှာ ပါတနာရဲ့ စွမ်းရည်ကို ဆက်ခံဖို့ စွမ်းရည်ရှိတယ်လို့ လီရာပြောတာကို ကြားဖူးတယ်။ လွန်ခဲ့တဲ့ နှစ်ပေါင်းများစွာထဲက ဘယ်လိုလုပ်ရမယ်ဆိုတာကိုတော့ မသိခဲ့ကြဘူး။ ဒါပေမဲ့ မင်းကြိုးစားလို့ရပါတယ်။ husky အဖြစ် ပြောင်းနိုင်မလား ကြည့်ကြည့်ပေါ့။”

ဂူမန်မန့်နှုတ်ခမ်းတွေကွေးညွတ်သွားကာ ခြောက်ကပ်စွာရယ်ရင်း ခေါင်းယမ်းကာ ပြောလိုက်သည် “ မကောင်းပါဘူး။ ကျမ ခွေးအဖြစ်မပြောင်းချင်ပါဘူး။”

အဲလ်ဗစ် ဂူမန်မန် မေးစေ့လေးကို ဆိတ်ဆွဲကာ အမှန်ပြင်ပေးလိုက်သည် “ ဝံပုလွေပါ”

ဂူမန်မန် နှုတ်ခမ်းတွေကို ဖိကိုက်ပြီးနောက် ပြန်ပြောလိုက်သည် “ ဝံပုလွေ အဖြစ်ဆိုရင်တောင် ကျမ မပြောင်းချင်ပါဘူး။ အကယ်၍ ကျမ ပြန်ပြောင်းလို့ မရရင် ဘယ်လိုလုပ်မလဲ။ မဖြစ်ဘူး..မဖြစ်ဘူး”

အဲလ်ဗစ် သူမကို ဖိအားမပေးပေ။ သူ့အတွက်တော့ သူ့လို အမြင်အာရုံကို ရတာနဲ့တင် တော်တော်ကောင်းနေပြီ ဖြစ်သည်။ ရှေ့လျှောက် သူမ ဂူထဲလမ်းလျှောက်လျှင် တစ်ခုခုဝင်တိုက်မှာကို မစိုးရိမ်ရပေ။ ထိုအရာက သူ့ကို ကျေနပ်စေသည်။ အမြန်နှုန်း၊ အားအင်နဲ့ တိုက်ခိုက်စွမ်းရည်တွေကတော့ သူ့မှာ ရှိရုံဖြင့်လုံလောက်သည်။

ဂူမန်မန် အမှောင်ထဲသွားရန် ပထမဆုံး အကြိမ်ကြိုးစားခဲ့သည်။ သူမ စိတ်လှုပ်ရှားမှုကြောင့် အဲလ်ဗစ် သယ်တာမခံချင်ပဲ သူမဘာသာ မြေပြင်ပေါ်ဆင်းချင်သည်။ အဲလ်ဗစ် သူမကို မတားပေ။ သားရေအဝတ်နှစ်ခုနဲ့ သူမ ခြေထောက်ကိုပတ်ပေးကာ သူမ သွားတဲ့နောက်မှ လိုက်ခဲ့သည်။ သူမ မြင်သမျှအားလုံးကို ကြည်နူးစွာကြည့်နေသည့်အတွက် အဲလ်ဗစ် ပြုံးလိုက်သည်။