السيرة النبوية

الحلقة 93

🔹️سيرة_الرسول🔹️
الحلقة 93
يلا صلوا على النبى 💚
غزوة أحد (ج1)
إِنَّ اللَّهَ يُحِبُّ الْمُتَوَكِّلِين ❤

إحنا دلوقتى بقينا سنة 3 هجرياً .. أبو سُفيان بن حرب (قبل إسلامه) كان عايز ينتقم من رسول الله و من المسلمين بسبب اللى حصل فى معركة بدر وانتصار المسلمين عليهم.. أبو سُفيان منع أن حد فى مكه أنه يعمل فرح أو يلبس ملون أو يعمل أى مناسبة و ده حداد على هزيمتهم فى بدر و أقسم ابو سفيان باللات والعُزى أنه لازم يحقق إنتصار على المسلمين .. أبو سُفيان كمان مكنش هدفه الانتقام و بس ..لأ..هو كان خايف على المكانة الأقتصادية لقُريش بين العرب بعد هزيمتها فى بدر

فعلشان كده كان هدف أبو سفيان الأكبر هوه أنه يرجع مكانة قريش وسط الجزيرة العربية علشان التجارة. ف هينفق فلوس كتيرة جداً ،و هيبدأ أبو سُفيان يجهز جيش بمبلغ 50 ألف دينار (دى فلوس كتيرة جداً دى ثروة تعادل تقريباً اكتر من 2 مليون دلوقتى ) ، و ربنا بيقول علي ده فى القرأن قال تعالى: " إِنَّ الَّذِينَ كَفَرُوا يُنْفِقُونَ أَمْوَالَهُمْ لِيَصُدُّوا عَنْ سَبِيلِ اللَّهِ فَسَيُنْفِقُونَهَا ثُمَّ تَكُونُ عَلَيْهِمْ حَسْرَةً ثُمَّ يُغْلَبُونَ "

طيب كنا قلنا ان العباس اسلم بعد غروه بدر و النبى ﷺ قال له يخفى إسلامه علشان يبقى وسط الكفار و يعرف الأخبار و الهدف من ده ان النبى كان عايز يتجنب اى حرب بينه و بين كفار قريش فبيبقى عايز يلحق اى خطه قريش تعملها ..لعله يقدر يتجنب هجوم قريش على المسلمين. فالمهم هيبعت العباس للنبى الخبر بسرعه و يقول له : أن قريش قد خرجوا بثلاثة آلاف مقاتل وسبعمائة دارع وثلاثة مائة فرس و معهم الكثير من السلاح (معاهم كميه سلاح غير طبيعيه) ،

وصلت الأخبار للنبى و بعدين النبى ﷺ هيشوف رؤية فبيقول : رأيت كأن ذراعى فى درعٍ حصينة ورأيت بقراً يُنحر فأولته خير (النبى ﷺ فسر الرؤية.. النبى شاف أن دراعه فى درع حصينة يعنى متحصن كويس يعنى فى حاجة حمياه فراح النبى ﷺ مفسر أن الدرع الحصينة دى هى المدينة .. يعنى ايه ؟ يعنى مش هيخرج يقابل جيش قريش بره المدينة.. طب ده صح ؟ اه لأن دول 3 آلاف و أنت يا رسول الله معاك ألف جندى..فلو أنت طلعت لهم فى الصحرا حيبقى ال3000 جندى حوالين جيش المسلمين و هيعملوا دايرة حواليكم و يحاصروكم .. فهيقضوا علي المسلمين فى عشر دقايق ..

فالرؤيه بتقول ان الحرب جوه المدينة ... طب ايه البقر الذى يُنحر ؟ النبى ﷺ فسر ان دول الصحابة يعنى فى ناس هتموت..ف هيجمع النبى ﷺ الصحابة و هيعمل مشورة ( النبى ﷺ عمره ما فرض رأيه مع انه قائد الدولة و رسول الله بس كان بيحب دايماً ياخد رأى الصحابة و ربنا بيحب ده قال تعالى: وَشَاوِرْهُمْ فِي الْأَمْرِ فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِين) ف هيجمع النبى الصحابه و يقولهم أشيروا علىّ أيها الناس .. فيطلع واحد و يقول له يا رسول الله نظل فى المدينة فإذا دخلوها علينا قاتلهم الرجال فى الأزقة وقاتلتهم النساء والأطفال من فوق الأسطحة (كلامه منطقى) فقال النبى أجل نبقى فى المدينة ..