السيرة النبوية

الحلقة 108

🦋سيرة_الرسول🦋
الحلقة 108
يلا صلوا على النبى 💚
رد شبهة تعدد زوجات النبى و زواجه من 11 إمرأه (الجزء الاول )
هندخل على أحداث السنة الرابعة من الهجرة, و هيحصل أحداث إجتماعيه و هى زواج رسول الله صل الله عليه و سلم من السيده "زينب" و السيده "أم سلمة" و السيده "جويرية" رضى الله عنهم و أرضاهم ..بس قبل ما نحكى زواج النبى من 3 سيدات, لازم نقول الحكمة من تعدد الزوجات..ليه النبى عليه الصلاة والسلام تزوج أكثر من واحدة.. تزوج 11 إمرأه ؟
أولآ : الرجل المسلم شرعآ مسموح له يتزوج أربع نساء فقط.. و زمان كان من العاده ان الرجال بيتزوجوا عدد كبير جدا من النساء ممكن يوصل لعشرين زوجة. وبالتالى كانت بتحصل مشاكل زى مشكله أختلاط الأنساب , فالإسلام حدد عدد معين للزواج بأن الرجل يتزوج اربع نساء فقط.. و ده للحد من المشاكل دى و كمان ربنا خلى التعدد حل لمشاكل بظروف خاصه جدا و شروط صعبه لو اتوفرت ساعتها بتسمح للراجل انه يتزوج اكتر من واحده لحد 4 نساء فقط .. يعنى التعدد رخصة وليس سنة .. يعنى أيه؟
يعنى التعدد مش سنه النبى عملها فأى حد يعملها من بعده. لأ..تعدد النبى بزواجه من 11 إمرأه كان حكم شرعى يخص النبى فقط وكمان كان لأسباب هنعرفها سوا.. إذن التعدد مش سنه... التعدد رخصه ربنا شرعها للمسلم عشان تكون رخصه و حل بيبقى مسموح بيه فى وجود مشاكل و ظروف خاصه و تنفيذها له شروط و مش هندخل فيها دلوقتى.. وبيبقى مسموح له ان يتزوج لحد 4 نساء فقط..
طيب النبى عليه الصلاة و السلام له وضع خاص، النبى تزوج 11 إمرأة .. ومات منهم أتنين فكان قبل وفاته متزوج 9 نساء .. قلنا قبل كده فى رد شبه زواجه من السيده عائشه فى سن مبكره أن النبى لا يستوى مع غيره من الرجال.. و ان النبى حياته كلها عبارة عن منهج, و تفسير عملى للقرآن الكريم محتجاه البشريه كلها .. طيب احنا عندنا فى السنة حاجة اسمها "سنة قولية" وحاجة اسمها "سنة فعلية". السنة القولية هى الحاجات اللى النبى قالها, و السنه الفعلية هى الحاجات اللى النبى عملها. فالنبى وهو خارج بيته اللى بينقل أقواله وأفعاله مين ؟ الصحابة. (المسلمين فى غزوة بدر كانوا 313, أما فى حجة الوداع قبل وفاة النبى المسلمين هيوصلوا ل 30,000 بنى آدم) يعنى بره البيت فى 30,000 بنى آدم بينقلوا سنة النبى و احاديث النبى, طيب ده بره البيت .. طب معقول ان زوجة واحدة فقط داخل البيت تكفى لنقل سنة النبى و كل اقواله و افعاله اللى جوه بيته؟
طبعا يستحيل, لأن كل كلمة النبى بيقولها وكل حركة بيعملها دى رسائل للأمة, فمفيش شخص يقدر لوحده يرصد كل أقوال وأفعال النبى, يعنى ممكن الزوجه تنسى حاجه أو فى حاجات النبى يعملها تفوتها و متشوفهاش .. فأكيد زوجة واحدة لا تكفى لنقل السنة النبوية للبشرية..و من الدلائل على ان زواجه من 9 نساء كان عشان رساله هو ان مفيش زوجة من زوجات النبى كانت بتخلف و خلف بس من السيده خديجه, طيب يعنى بقيت الزوجات كانوا كلهم عقيم؟ بالعكس, دول كانوا بيخلفوا عادى من أزواجهم اللى قبل النبى, طيب ايه الحكمة؟
الحكمة هى تفرغ الزوجات الكامل لنقل السنة عن الرسول عليه الصلاة والسلام, فكل زوجاته مخلفوش منه ما عدا السيدة "ماريا القبطية", اللى تزوجها النبى قبل وفاته بفتره.. طيب اشمعنا؟ عشان محدش يفتكر ان ده كان ضعف جسمانى عند النبى او كبر السن و انه خلف من خديجه لمجرد انه كان لسه شاب.. بل بالعكس ، ماريه خلفت.. فده يدل ان النبى يقدر يخلف عادى جدا و كمان رغم سنه مكنش بيعجز حتى قلنا قبل كده ان النبى مات و عنده 17 شعره بيضه بس ..فعدم خلفه زوجاته كان لحكمه التفرغ الكامل لنشر السنه النبويه.
طب عارفين الأحاديث اللى نقلتها أمهات المؤمنين عن النبى صل الله عليه وسلم وعددهم أكثر من 3000 حديث .. كان أغلبهم فى الفقه, فقه الوضوء, الطهارة, الغسل, التيمم, الحيض, النفاس والجماع و غيرهم من الأمور الخاصة جدا بالنساء والتى لا يصلح للرجال الحديث عنها. مرة السيدة عائشة كانت قاعدة بتفتى فى الحيض وتتحدث نقلا عن النبى, فقالوا لها:" يا أم المؤمنين! الصحابى الفلانى أفتى بأمر آخر", فقالت: "وما يدريه هو؟" يعنى وهو هيفهم منين, أنا امرأة وأنا أدرى بالأمور دى..و كان معاها النبى و بتسأله و بيفهمها و يعلمها.
المهم نفهم من ده أن النبى كان محتاج نساء ينقلوا عنه السنة الداخلية... أحنا النهاردة بفضل ده عارفين النبى كان بيأكل ازاى, وبيشرب ازاى, بينام على أنهى جنب, بيغتسل ازاى, يعنى أدق تفاصيل حياته كانت كتاب مفتوح لينا منقول عن أمهات المؤمنين...و ده يدل ان التعدد كان لحكمه إلهيه و رساله كبيره بتحملها أمهات المؤمنين للبشريه ..
ثانيآ ، ربنا فى القرآن قال: "لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا" , فالنبى يتزوج المطلقة مثلا, طيب ليه يا رسول الله؟ عشان يقول للعالم قلدونى, يعنى ممكن تتزوجوا مطلقة, المطلقة دى مش المفروض انها تكون منبوذة فى المجتمع، بالعكس, ده النبى نفسه تزوج من مطلقة. و النهاردة أى امرأة مطلقة المفروض مش تتحرج أبدا, يكفيها ان واحده من امهات المؤمنين (زوجات الرسول) كانت مطلقه قبل زواجها من النبى.. شايفين قد ايه النبى رفع من قدر المطلقة و المرأة عموما فى المجتمع.
طيب مين من أمهات المؤمنين كانت مطلقة والنبى تزوجها؟ السيدة "زينب بنت جحش" اللى طلقها سيدنا "زيد بن حارثة" ...طيب النبى قدوه كمان بإنه تزوج النبى من الأرملة اللى مات زوجها, زى مين؟ السيدة "أم سلمة", فالمجتمع مينفعش يقلل من قدر الأرملة لأن النبى رفع من شأنها بزواجه منها... طيب و يتزوج النبى كمان من اليهودية بعد إسلامها.. زى مين؟ زى السيدة "جويرية" والسيدة "صفية بنت حيى بن أخطب" , علشان لما امرأة يهودية تدخل فى الاسلام, المجتمع لا يحقر من شأنها علشان من نسل يهودى..
و تزوج النبى كمان من واحده أكبر منه فى السن ب 15 سنة, زى السيدة "خديجة بنت خويلد" ليرفع قدر المرأة الكبيرة فى السن و أن مفيش مشكله أنك تتزوج واحده اكبر منك مدام بتحبوا بعض و متفاهمين..و كمان تزوج النبى من اللى كانت مسيحية زى السيدة "ماريا القبطية".. طيب ربنا شاء ان النبى يعمل ده ليه ؟ علشان بكده هيبقى النبى جمع كل طوائف النساء فى المجتمع ورفع من قدرهم, فبالتالى مش من حق أى بنى آدم انه يقلل من قدر المرأة بجميع طوائفها و جميع حالاتها الإجتماعيه .
نكمل الجزء التانى إن شاء الله ❤