السيرة النبوية

الحلقة44

🌺سيرة_الرسول🌺
الحلقه 44
يلا صلوا على النبى :)
حصار قريش لبنى هاشم "قبيله رسول الله"(ج1)

دلوقتى الصحابة قاعدين فى الحبشة فى أمان مع النجاشى بعد ما فشلت خطه قريش لما بعتت عمرو بن العاص(قبل إسلامه) عشان يأثر على النجاشى لكن الحمدلله رفض النجاشى يسلم الصحابه له..طيب إيه الوضع دلوقتى فى مكة ؟ الوضع سيئ جدا لان قريش يأست، الإيذاء و تعذيب الصحابة فشل..كل المحاولات فشلت و الصحابة هاجروا..طب قريش هتعمل إيه ؟
هتاخد قرار واحد "نقتل محمد"، و خلاص ابو طالب عم النبى مبقاش له كلمة وسطهم ولا يقدر يمنع قريش زى زمان فأبو طالب كان حزين جدا جدا لما عرف بموضوع قتل النبى،طب ابو طالب عرف منين ؟

أصل بدات قريش تعمل اجتماعات فى الحرم و ميستدعوش ابو طالب رغم أنه من سادة قريش و كان متعود يحضر دايما، فبدأ أبو طالب يشك انهم بيخططوا لشئ يخص النبى..فراح ابو طالب باعت ولد يتجسس عليهم و قاله : تروح هناك و أعرف لى همه بيخططوا لأيه، وفعلا راح الولد وجه و قال:يا ابا طالب يريدون قتل ابن اخيك..فأبو طالب مبقاش عارف يعمل ايه فراح مع النبى عليه الصلاه و السلام و دخل الحرم و مسك إيد النبى عليه الصلاة و السلام

و قال:يا معشر قريش والله لو قُتِلَ محمد لنقاتلكم أنتم و نحن بنى هاشم حتى نتفان(يعنى هنحاربكم و تحاربونا لحد ما نخلص على بعض) و راح قايل: تعالى معى يا بن اخى و خد النبى عليه الصلاه و السلام و مشى..هيتعرض النبى ﷺ لمحاولات قتل هتستمر لمده 3سنين.. انتو متخيلين !! إيه إحساسك لما تبقى حامل هم انك ممكن تتقل فى أى لحظه؟! وابو طالب هيتجنن، لازم يحمى الرسول ﷺ بأى طريقه (رغم أن أبو طالب كافر) ..

طيب هتعمل ايه يا ابو طالب ؟ عشان نفهم الخطة العبقرية بتاعته لازم نعرف سوا شكل مكة عامل ازاى..مكة دايرة كبيرة و فى نصها الحرم (ده زمان مش دلوقتى) و حوالين الحرم بيوت فى شكل دائرى و مكة مليانة جبال و منحنيات حوالين الحرم و ما بين كل جبل و جبل ارض ضيقة جدا اسمها " شِعب" زى الحاره كده ، اهل مكة متقسمين اغنياء و فقراء ...الاغنياء ساكنين على الجبل و شايفين منظر الكعبة الجميل، و كل ما يكون البيت أغنى كل ما يكون اقرب للكعبة..أما الفقراء ساكنين فى الشِعاب اللى بين الجبال..

و بنى هاشم قبيلة النبى محمد عليه الصلاه و السلام فيها الاغنياء منهم ساكنين على الجبال و الفقراء فى الشِعاب..طيب ابو طالب هيعمل ايه؟أبو طالب بما انه سيد بنى هاشم هيصدر قرار ان كل بنى هاشم سواء الأغنياء و الفقراء هينزلوا و يتكدسوا و يعيشوا فى الشِعاب و نحط الرسول فى النصف و نعيش كلنا مع بعض و حواليه..( أصل ابو طالب عايز يخلى النبى عايش فى مكان متكدس و زحمه.. ويبقى كل الناس عارفه بعضها فيه عشان لو دخل حد غريب وسطهم، يتمسك على طول)

فكل بنى هاشم هتتكدس فى "شعب " واحد..بس كدة عندنا مشاكل :
منها ان بنى هاشم فيها فقراء و اغنياء يعنى معنى كدة الفقير معندهوش مشكلة لكن الغنى هيضطر يسيب بيته و الرفاهية و ينزل يتكدس تحت عشان يحمى الرسول ﷺ.. طيب ده لمدة اد ايه؟ ( هيفضلوا فى الشِعاب 3 سنين ..بس على فكره هما ايامها كانوا فاهمين ان الموضوع هياخد شهر بالكتير ^_^ ) المهم كلهم نزلوا الشِعاب وهدفهم حماية النبى ﷺ
..طيب المسلم نزل عشان يحمى عقيدته و دينه لكن انت يا كافر نزلت ليه؟

عشان "الحمية القبيلية" سبحان الله حتى لو هو مش من دينى بس ميتقتلش واحد من قبيلتى و انا على وش الدنيا..يستحيل يحصل..و نزلوا الشعاب فعلا (هنا بقى نسأل نفسنا سؤال و نفكر لو فى أيامنا دلوقت و قالولك سيب عربيتك و اللاب توب و البيت و تموت من الجوع بس كل ده عشان بس تحمى رسول الله ﷺهتوافق ولا لأ ؟ و قيس على ده.. إيه اللى ممكن تتحمله عشان بس تنشر سيرته عليه الصلاه و السلام؟ ) المهم أتكدست بنى هاشم فى الشِعاب و قريش شافت المنظر ده فأتجننت، و قالت قريش :مش انتوا اتكدستوا تحت، طيب احنا هنحاصركوا من فوق وبقى فيه حصار على شعب بنى هاشم ، حصار اجتماعى و اقتصادى و دينى و ده حصار شديد جدا.

و عملت قريش اجتماع طارئ و اتفاقيات تنص على أن ممنوع حد يتجوز من بنى هاشم و لا يبيع لبنى هاشم و لا يشترى منهم و غير مسموح لأى حد أنه يسمع عن الإسلام من أى حد من بنى هاشم و هنكتب الكلام ده فى وثيقة و نكتب الشرط الاخير فى الوثيقة وهو "يا معشر قريش لا تاخذكم ببنى هاشم رأفة و لا رحمة مهما حدث"و تتختم الورقه و تتوثق و تتعلق على الكعبة كأنها شئ مقدس و اللى يخالف الوثيقة دى هيتقتل..
طب موقف بنى هاشم أيه و هيعيشوا ازاى وسط الحصار ده

هنعرف سوا بكرة ان شاء الله 🌹
🌿 لا تنسوني من دعائكم 🌿