السيرة النبوية

الحلقة51

🌹سيرة_الرسول🌹
الحلقة 51

يلا صلوا على النبى💚
محنه "مدينه الطائف"و إيذاء الحبيبﷺ(ج4)
و سماع الجن للقرآن من رسول الله.....

وقفنا المره اللى فاتت مع رحمه النبى عليه الصلاه و السلام فى معاملته و صبره على الكفار اللى آذوه و دعاؤه لهم بالهدايه .. قال تعالى: لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ .. و وقفنا مع دعاء النبى بالهدايه لأهل الطائف و مقابلة ملك الجبال للنبى عليه الصلاه و السلام طيب كانت إيه النتيجة لما النبى مدعاش على قومه؟

النتيجه هيه أن الطائف بعد كده هنشوف انها أصبحت من أحسن وأجمل بلاد المسلمين, وكلها مسلمين ومن أحسن المسلمين, لو رحتوا الطائف دلوقتى هتلاقى فيها نوع من الورود مش بينمو فى اى مكان إلا فى الطائف, فيها خير مش موجود غير فى الطائف, ونوع ثمار لا ينبت إلا فى أرض الطائف.وكمان كانت نتيجة دعاء النبى ليهم أن فى أيام (الردة) اللى هتحصل بعد موت رسول الله ..ارتدت كل البلاد و كفرت بالإسلام تانى إلا تلات بلاد بس ..همه مكه والمدينة ومعاهم الطائف و ثبتوا على دين الله و رسوله <3 ..كل ده بفضل دعوة رسول الله.شوفوا الأية دى: لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيم.. حرييييص عليكم ♡

وتخلص مقابلة ملك الجبال مع رسول الله ﷺ ويبدأ مشوار رجوعه لمكة, كان المفروض ينام و يرتاح شوية عشان يقدر يكمل المشوار بعد كل التعب ده, بس هو معملش كده, وقف صلى قيام ليل, وهيحصل حاجة غريبة اوى وهو بيصلى, ربنا هيوحى له أثناء الصلاة, إنه هيعدى من جنبه 7 من الجن و هيسمعوا القرآن لأول مره من النبى أكيد ده شىء مخيف.. فقرأ النبى عشان يسمع الجن القرآن وقرأ سورة الرحمن.

وبعدها نزلت أيات من القرآن حكت اللى حصل.
ربنا بيقول: "وَإِذْ صَرَفْنَا إِلَيْكَ نَفَرًا مِّنَ الْجِنِّ يَسْتَمِعُونَ الْقُرْآنَ فَلَمَّا حَضَرُوهُ قَالُوا أَنصِتُوا فَلَمَّا قُضِيَ وَلَّوْا إِلَى قَوْمِهِم مُّنذِرِينَ * قَالُوا يَا قَوْمَنَا إِنَّا سَمِعْنَا كِتَابًا أُنزِلَ مِن بَعْدِ مُوسَى مُصَدِّقًا لِّمَا بَيْنَ يَدَيْهِ يَهْدِي إِلَى الْحَقِّ وَإِلَى طَرِيقٍ مُّسْتَقِيمٍ * يَا قَوْمَنَا أَجِيبُوا دَاعِيَ اللَّهِ وَآمِنُوا بِهِ يَغْفِرْ لَكُم مِّن ذُنُوبِكُمْ وَيُجِرْكُم مِّنْ عَذَابٍ أَلِيمٍ * وَمَن لَّا يُجِبْ دَاعِيَ اللَّهِ فَلَيْسَ بِمُعْجِزٍ فِي الْأَرْضِ وَلَيْسَ لَهُ مِن دُونِهِ أَولِيَاء أُوْلَئِكَ فِي ضَلَالٍ مُّبِين"ٍ.

(شايفين ..الجن بقوا دعاة للإسلام بعد ما سمعو القران من رسول الله.. احنا كمان لازم ننشر و ندعوا اللى حوالينا بأى معلومه عرفناها عن الله و رسوله الكريم)
المهم قرأ رسول اللهﷺالقرآن و حواليه افواج كتيير اوى من الجن .. ربنا بيقول: "وَأَنَّهُ لَمَّا قَامَ عَبْدُ اللَّهِ يَدْعُوهُ كَادُوا يَكُونُونَ عَلَيْهِ لِبَدًا" ..
اكيد النبى استحمل الخوف ،دول برده جن :') ..بس بصوا الأيه بتورينا أن من شدة حبهم للقرآن ولرسول الله انهم اتجمعو حواليه و عايزين يبقوا جنبه اوى عليه الصلاه و السلام ..و أعد رسول الله يعلمهم الإسلام وأمور دينهم...

وخلصت مقابلة الجن, وبدأ النبى و زيد بن حارثه يفكروا إزاى هيدخلو مكة, زيد بن حارثة سأله يا رسول الله كيف سندخل إليهم؟, رد الرسول و قال: "يا زيد لا تخف, إن ربي لن يضيعنا, يا زيد إذهب إلى الأخنس بن شريق وإئذن منه أن ندخل فى جواره". يعنى ايه الكلام ده؟ يعنى الرسول هيطلب من الأخنس بن شريق إنه يكون فى حمايته لما يدخل مكه، وده بيكون شرف كبير أنك تبقى واخد ناس فى حمايتك ..وفعلاً راح زيد بن حارثة و طلب من الأخنس الحماية, لكن الأخنس قال: "لا والله, فليدخل محمد و ليرى ما أعدته له قريش" :'(

راح زيد للنبى وحكى له, فطلب النبى منه انه يروح يطلب الحماية من سهيل بن عمرو, بردو رفض, وبعدين قاله يروح لمُطعم بن عدى والحمدلله مُطعم وافق وقال: " هو فى جوارى.. محمد فى جوارى", (كل الاسماء اللى النبى بيطلب منها الحمايه من كفار قريش بس عائلات كبيره) الْمُطعم بن عدى بقه كان عنده حوالي 10 أبناء فقالهم إلبسوا كلكم حديد وأرفعوا السيوف و اول ما محمد يدخل مكه فى جوارنا اياكم حد يمسه أو يشتمه حتى..(سبحان الله ربنا عز رسول الله خلاه فى حمايه 10 جنود).

و راح ال10 من الشباب للنبى على باب مكة لابسين الدروع و الحديد ورافعين السيوف و حاوطوا رسول الله من كل جنب, وسألوه تروح فين هنوصلك؟, طبعاً المكان الطبيعى البيت, لكن لأ . النبى قالهم : هروح الحرم,( اصل النبى عايز يطوف حوالين الكعبه علشان محدش من قريش يفتكر إنه خايف أو هيبطل يدعو للإسلام) خلصت محنه الطائف و يخلص النبى الطواف و بعدين هيروح الفجر لدار الأرقم, يحكى للصحابة اللى حصل ويطمنهم بإسلام الجن، بس الصحابة هيزعلوا جدا بسبب الإيذاء اللى حصل له ..
بس هتحصل حاجة هتثبت لرسول الله إن ربنا راضى عنه

هنعرفها سوا إن شاء الله❤
صل الله علي محمد صل الله عليه وسلم
🌿 أذكروني بدعوة 🌿