السيرة النبوية

الحلقة ١٥٧

🥀سيرة_الرسول🥀
الحلقة 157
يلا صلوا على النبى 💚
الدعوة العالمية لدين الإسلام و إرسال رسائل إلى ملوك العالم (ج2)

النبى عليه الصلاة و السلام بدأ يرسل الرسايل لملوك العالم يدعوهم للإسلام.. رسالة لهرقل عظيم الروم ..أسلم تسلم و إلا كان عليك إثم الأريسيِّين ، و إلى كسرى عظيم الفرس.. أسلم تسلم و إلا عليك إثم المجوس ، و إلى المقوقس عظيم الإسكندرية ..أسلم تسلم و إلا عليك إثم القبط..( و ده اللى أهدى النبىﷺ الجارية مارية القبطية اللى خلف النبى ﷺ منها ابنه إبراهيم و توفى و عمرة حوالى سنتين و هنحكى عن تفاصيل ماريا القبطية فى البوست رقم ( 237))
المهم لما بعت النبى ﷺ مرسال برسالة لهرقل و قال : بسم الله الرحمن الرحيم، من محمد بن عبد الله ورسوله، إلى هرقل عظيم الروم، سلام على من اتبع الهدى: أما بعد، فإني أدعوك بدعاية الإسلام، أسلم تسلم يؤتك الله أجرك مرتين، فإن توليت عليك إثم الأريسيِّين، { قُلْ يَا أَهْلَ الْكِتَابِ تَعَالَوْا إِلَى كَلِمَةٍ سَوَاءٍ بَيْنَنَا وَبَيْنَكُمْ أَلا نَعْبُدَ إِلا اللَّهَ وَلا نُشْرِكَ بِهِ شَيْئًا وَلا يَتَّخِذَ بَعْضُنَا بَعْضًا أَرْبَابًا مِنْ دُونِ اللَّهِ فَإِنْ تَوَلَّوْا فَقُولُوا اشْهَدُوا بِأَنَّا مُسْلِمُونَ } و دقق هرقل فى الموضوع أوى لأنه سمع عن إن فى نبى هييجي فى آخر الزمان و فى علامات لظهوره..، و كان هرقل مش عارف إمتى هيجى النبى ده..

فلما وصلته الرسالة من النبى عليه الصلاة و السلام ..هرقل طلب إنه يعرف معلومات أكتر عن النبى محمد ﷺ و طلب ناس من قوم محمد.. و فعلاً كان أبو سفيان سيد قريش هو و أصحابه فى تجارة فى الشام .. فدعاهم هرقل لقصره وسط حاشية كبيرة من ناس مهمة ..و بدأ يسأل عن النبى عليه الصلاة و السلام و كأن ربنا أراد أن اللى يتكلم عن النبى ﷺ يكون واحد من أعدائه من كفار قريش..

و من ذكاء هرقل أنه دعا أبو سفيان و أصحابه.. فبكده أبو سفيان مش هيقدر يكذب لأن عار على العربى أنه يكذب فهيبته قدام أصحابه العرب هتضيع..و بيحكى أبو سفيان و يقول : فوالله لولا الحياء من أن يأثِروا عليَّ كذباً لكذبت ..(خايف أنهم يكذِّبوه)..و جاب هرقل مترجم علشان يترجم الكلام بينه و بين أبو سفيان.

هنعرف بكرة إن شاء الله ❤
#السيرة_النبوية_بالعامية_لنورهان_الشيخ
هذة الحلقات نقلا عن استاذة نورهان الشيخ "