السيرة النبوية

الحلقة 109

🌺سيرة_الرسول🌺
الحلقة 109
يلا صلوا على للنبى 💚
رد شبهة تعدد زوجات النبى (الجزء التانى)
اتكلمنا الحلقة اللي فاتت عن ان النبى عليه الصلاه و السلام مش زى باقى الرجال و ان الله عزوجل زى ما خصه بنزول الوحى. خصه كمان بالزواج من 11 إمرأة و كان له اسباب كتيره... و قلنا ان تعدد الزواج ليس سنه بل رخصه..
طيب هنقول النهارده حكمه كمان للتعدد و هى إثبات تمام الكمال للنبى صل الله عليه وسلم..طب يعنى ايه ؟ اصل العلماء بيقولوا ان الزوجة لديها عين ناقدة, يعنى لو عايز تعرف حقيقه راجل أسأل زوجته هيه أكتر واحده عرفاه.. انت مثلا دلوقتى بتسأل عن راجل, فممكن الناس تقولك ده رجل صالح و يشكروا فيه, و تيجى تسأل بقى زوجته هتلاقيها بتظهر حقيقته اللى بتبان جوه البيت،
فالرجل مهما تجمل أمام الناس, ميقدرش أبدأ انه يتجمل أمام زوجته. فصدق النبى حين قال: "خيركم خيركم لأهله" الشخص الطيب بجد هو اللى طيب مع اهله فى البيت وده احسن واحد فيكم ♡..طيب النبى صل الله عليه و سلم بقى تزوج من 11 امرأة، وكلهم أجمعوا على كمال أخلاق النبى و رقه معاملته و حسن خلقه المبهر و تعاونه..و كانوا يوصفوه بإنه "كان قرآنا يمشى على الأرض", فنفهم من ده ان لو النبى كان قاصد يتجمل أمام السيدة عائشة, فميقدرش يتجمل أمام السيدة حفصة بنفس الطريقه و هكذا مع الباقى.. فصدق و كمال النبى كان فى ثبات معاملته بنفس الاخلاق مع كل زوجاته.
حاجه كمان مهمه جدا .. يعنى ايه الحديث المتواتر.. الاحاديث النبويه وصلت لنا ازاى؟ عن طريق التواتر .. و دقة الاحاديث دى مدروسه فى علم اسمه علم الحديث .. و الحديث المتواتر ده اعلى درجات الصحه فى الحديث..طب ليه؟ علشان شروطه بتحدد ان 9 او 10 اشخاص ينقلوا كلام النبى مباشره و يكون كلامهم متطابق .. يعنى مثلا النبى يقول حديث, فيسمعه 10 من الصحابة, و كل واحد منهم يبلغ 10 تانين و هكذا بيستمر التواتر لحد ما يوصل لنا حديث النبى عليه الصلاه و السلام ..
فبسبب الشرط الدقيق ده لا يمكن ان الأعداد دى كلها تكذب أو تألف الحديث. طيب وده علاقته ايه بالتعدد؟..النبى مات وهو متزوج 9 فالنبى لما يقول حديث, التسع زوجات يتفقوا عليه, وكل زوجة تبلغه ل 9 أشخاص, وكل شخص من ال9 يبلغ 9 تانين, فلو كان عدد نساء النبى اقل من 9 مكنوش هيبلغوا حد التواتر :) ..و النبى محمد هو نبى اخر الزمان يعنى مفيش نبى تانى هيجى للبشريه من بعده .. ف علشان كده لازم كل اللى يخصه يوصل لنا بدرجه عاليه و موثوق منها..و دى حكمة ربنا من اختيار 9 زوجات بالذات علشان الاحاديث اللى هينقلوها تبلغ حد التواتر..
طيب كمان فى حاجه مهمه جدا عن تعدد زوجات النبى.. هي أن النبى لم يتزوج إلا بأمر إلهى. الوحيدة اللى النبى اختارها هى "السيدة خديجة بنت خويلد". فاكرين زواج النبى من السيدة عائشة؟ لما النبى قال لها: "يا عائشة انى أريتك فى المنام ثلاث, يأتى بك الملك فى سرقة من حرير, ويقول يا محمد هذه زوجتك فى الدنيا و الآخرة, فأقول ان يكن هذا خير من عند الله يمضه" , ويقول ابن عباس: "رؤيا الأنبياء وحى", يعنى زواج النبى من السيدة عائشة كان أمر من الله,
والدليل ان تعدد زواجات النبى أمر إلهى يخص النبى فقط هو ان غير مسموح للنبى انه يطلق واحده من زوجاته و لو واحده ماتت مينفعش يتزوج مكانها واحده تانيه زى اى مسلم .. ربنا قال للنبى: "لَّا يَحِلُّ لَكَ النِّسَاءُ مِن بَعْدُ وَلَا أَن تَبَدَّلَ بِهِنَّ مِنْ أَزْوَاجٍ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَ ۗ وَكَانَ اللَّهُ عَلَىٰ كُلِّ شَيْءٍ رَّقِيبًا" سورة الأحزاب ..يعنى ربنا أمر النبى انه ميطلقهمش ... طيب هل فى زوج من المسلمين ربنا أمره بعدم الطلاق؟ لأ .. طيب يبقى النبى زى ما ربنا خصه بحكم الزواج من تسع نساء .برده خصه بحكم أنه ميطلقش ولا واحده فيهم..فده دليل ان كل ده كان خصائص نبوية..زى نزول الوحى، هوه ينفع أى حد ينزل عليه الوحى ؟ لأ طبعا دى أمور تخص النبى فقط .. كذلك برده زواج النبى من 9 نساء كان من خصائصه وليست سنة تتبع.. مينفعش حد يتزوج تسعه غير رسول الله فقط..
كمان النبى بس من حقه ان سيدة تهب نفسها له و تعرض نفسها عليه للزواج, يقول الله فى القرآن: "وَامْرَأَةً مُّؤْمِنَةً إِن وَهَبَتْ نَفْسَهَا لِلنَّبِيِّ إِنْ أَرَادَ النَّبِيُّ أَن يَسْتَنكِحَهَا خَالِصَةً لَّكَ مِن دُونِ الْمُؤْمِنِينَ قَدْ عَلِمْنَا مَا فَرَضْنَا عَلَيْهِمْ فِي أَزْوَاجِهِمْ وَمَا مَلَكَتْ أَيْمَانُهُمْ لِكَيْلَا يَكُونَ عَلَيْكَ حَرَجٌ وَكَانَ اللَّهُ غَفُورًا رَّحِيمًا" سورة الأحزاب. يعنى دلوقتى البنت لا تهب نفسها لأحد, ولا ينبغى أن تعرض الزواج على أحد, يعنى دى من خصائص النبى فقط, و رغم كده النبى لما كانت بتيجى إمرأة توهب نفسها له.. كان بيرفض انه يتزوجها إلا إمرأه واحدة فقط و هى السيدة "ميمونة بنت الحارث" وهنحكى قصتها يوم فتح مكة بعد كده..
فى حاجه مهمه لازم نعرفها و هي ان فى حديث عن السيدة عائشة بيقول: "والله, ما مات رسول الله إلا و قد أحلت له النساء" ده معناه ايه؟ احنا قولنا ان النبى كان بيتزوج بأمر إلهى.. وربنا امره انه لا يطلق و لا يتزوج تانى ابدا.فالسيدة عائشه قالت أن النبى قبل ما يموت بفترة ربنا سمح له بالزواج يعنى يا محمد لو عايز تتزوج لك الحرية فى الزواج .. بس النبى اختار انه ميتجوزش تانى.. طب ليه ربنا سمح له بالجواز بعد ما أمره بأنه ميتجوزش؟
علشان ربنا حب يبين ان النبى هو اللى رفض الزواج بعد التسعه زوجات بإرادته.. طيب ايه الحكمه من انه يبان ان النبى رفض بإرادته؟ الحكمه هى ان ربنا بيحمى النبى من ان اى حد يقول ان النبى متجوزش علشان بس ربنا كان مقيد النبى بال9 زوجات فقط.. فيقولوا ان محتمل ان النبى يكون كان عايز يتجوز 20 او 30 ست بس كان غير مسموح له بده..فربنا بعد كده سمح للنبى بالزواج بعد ال9 علشان يحميه من الكلام ده ♡. ويخلى البشريه تعرف قد ايه النبى كان لا يقبل أبدآ التعدد بهدف الرغبه..و على فكره النبى كان من السهل جدا انه يتزوج لانه كان جميل وكان لا يشيب, على الأقل كان ممكن يقبل السيدات اللى عرضوا نفسهم عليه(وهبوا نفسهم له) لكن النبى أختار ان لا يتزوج بعد ال 9 زوجات أبدا.. صل الله عليه و سلم
و بكده خلصت رد شبهة التعدد♡
ميعادنا الحلقه الجايه إن شاء الله ❤
صل الله على محمد صل الله عليه وسلم