السيرة النبوية

الحلقة ١١١

🌻سيرة_الرسول🌻
الحلقة 111
يلا صلوا على النبى 💚
غزوة "بني المصطلق"
زواج النبى من السيدة جويرية رضى الله عنها.

من أجمل أحداث السنة التالتة و الرابعة من الهجرة ميلاد الحسنيين : الحسن والحسين "سيدا شباب أهل الجنة" وأحفاد النبى صل الله عليه وسلم، والنبى كان فرحان بيهم جدا وكانوا أولاد فاطمة و على، و كان النبى بيحبهم أوى لدرجة أن الناس كانوا بيقولوا عليهم "أبناء النبى" ، وكان سيدنا أبو بكر بيمسك سيدنا الحسن، ويحضنه ويقبله و يقول له: "فداك أبى وأمى، شبيه النبى و لست شبيها لعلى" ..

و يوم ما جه خبر ولادة السيدة فاطمة للحسن، فيفرح النبى جدا و يجرى على بيت فاطمة ، ويدخل فيحمل "الحسن" قبل ما يحمله أبوه سيدنا "على".. و يقول النبى لسيدنا على: "يا على، ما سميته؟"، فيقول سيدنا على: "يا رسول الله، سميته حربا..! أريد أن ينادونى بأبى حرب". فيقول النبى: "يا على، هلا سميته حسن؟" فيوافق سيدنا على.. و بعد 9 أشهر يتولد سيدنا الحسين ، و يفرح النبى جدا ويجرى على بيت فاطمة و يدخل فيحمل "الحسن" و يقول سيدنا محمد لسيدنا على: "يا على، ما سميته؟"، فيقول سيدنا على: "يا رسول الله، سميته حربا! أريد أن ينادونى بأبى حرب". فيقول النبى: "يا على، هلا سميته حسين؟" فيوافق سيدنا على. و بكدة كان لقبهم بالحسنيين، أحفاد النبى والنبى كان دايما بيحضنهم ويشمهم زى ما بتشم الأم أولادها (دى حاجة مش هيحسها غير الأمهات)، و كان النبى يقول: "اللهم إنى أحبهما فأحبهما" ..و فى ولادة أطفال فاطمة عرفنا حاجتين من السنن و هما التحنيك والآذان.. النبى حنك الحسن والحسين وأذن فى أذنيهما..

التحنيك :يعنى تاخد تمرة، وتمسك لب التمرة الطرى و تضعه فى سقف فم الرضيع، فيبدأ الرضيع باستطعام التمرة ويكون أول ما يدخل فى جوف الرضيع هو التمر. و ده له قيمة عظيمة لأنها السنة و الولد بيبقى مبارك، يرضى بأقل شىء ويكون قنوعا ... التحنيك كان شرف للحسنين، لأن أول حاجة امتزجت بريقهم هو ريق النبى لأنه خلى لب التمرة طرى أكتر بريقه صل الله عليه و سلم قبل ما يحطها فى فم أحفاده.. و سنة الآذان فى أذن الرضيع اليمنى، فيكون أول ما يطرق أذن الطفل كلمة: "الله أكبر" .

و ندخل دلوقتى على أهم أحداث بداية السنة الخامسة من الهجرة، وهى غزوة "بنى المصطلق"، طيب إيه أحداثها ؟ إن كان فى قبيلة اسمها "بنى المصطلق و كان قائدها "الحارث بن أبى ضرار"، و الحارث جهز جيش لمحاربة المسلمين.. و المسلمين عرفوا بده وقبل ما يخرج النبى للقتال، بعت صحابى اسمه "بريدة الأسلمى" عشان يتأكد من خروج بنى المصطلق، وفعلا اتأكد بريدة و أخبر النبى بده.. فجهز النبى عليه الصلاة و السلام جيش لرد العدوان من 700 مقاتل و خرج و اعتمد على عنصر السرعة والمفاجأة وعسكر أولا .. و الجيشين حاربوا بعض وانتهى القتال بانتصار النبى والمسلمين.

وقام المسلمون بأسر 100 من قبيلة بنى المصطلق، وكان من بين الأسرى "جويرية بنت الحارث بن أبى ضرار" بنت قائد الجيش..وعادة فى الحرب الأسرى كانوا بيتقسموا على جنود المعركة، عشان نعمل تبادل أسرى، أو ان الأسير يدفع مبلغ من المال مقابل حريته، عشان القبائل تفكر ميت ألف مرة قبل ما تحارب النبى مرة تانية، لأن الفلوس بتوجع ومش من السهل ان أى حد يدفع فلوس، وكان النبى بيوصلهم فى النهاية للسلام و يفهمهم أن الحرب و العدوان مش هو الحل..