السيرة النبوية

الحلقة52

💞سيرة_الرسول💞
الحلقة 52

يلا بينا صلو على النبى 💚
رحلة الإسراء و المعراج من الارض للسماء (ج1)
قم يا محمد إلى لقاء الله 💚

النبي اتأذى من اللي حصل فى الطائف ،قلبه وجعه و حزين اوى كمان لأن الطائف رفضت الإسلام و ربنا الجبار جبر قلب حبيبه عليه الصلاه و السلام بإسلام عداس و إسلام الجن، طب و إيه كمان؟؟ حادثه الإسراء و المعراج و كأن حادثه الإسراء و المعراج بتثبتلك يا رسول الله ان لو اهل الارض مش مقدرين قيمتك ،تعالي عند اهل السماء وشوف قيمتك ،،و تحصل رحله الاسراء والمعراج و يسموها العلماء ذروه التكريم لرسول الله ،النبى هيشوف حاجات عجيبه ربنا عز وجل قال: " لَقَدْ رَأَىٰ مِنْ آيَاتِ رَبِّهِ الْكُبْرَىٰ" سوره النجم ..

دلوقتى الرسول عليه الصلاه والسلام فى نص الليل , قاعد عند الكعبه ، و كان زعلان من اللي حصل ف الطائف ، طاف شويه و راح قاعد وغطى نفسه بعبايته و نام وهو زعلان ،بس الرسول غالي اوي عند ربنا مش هيسيبك تنام زعلان ابدا يا رسول الله، يجيله جبريل عليه السلام يخبطه على كتفه،قم يا محمد فبيحكى لنا النبي فبيقول: فقمت، فقلت ماذا يا جبريل؟ فرد جبريل و قال لى : قم يامحمد للقاء الله ..هيقابل ربنا.. تعالوا نشوف الرحله بعين الرسول، طب ازاي؟ زي ما عبد الله بن عمر بيعمل بالظبط..

اصل مره عبدالله بن عمر كان فى المسجد النبوي مع النبي والصحابه، وبعد الصلاه اتكلم النبي عليه الصلاه والسلام معاهم وبعدين قام قايل: يا ايها الناس من منكم راي الجنه؟ (طبعا محدش شافها إلا النبي ف الاسراء والمعراج) فالمهم محدش رد ،فقام عبد الله بن عمر قايل : انا يا رسول الله ،
فسيدنا عمر بن الخطاب (أبوه) حط إيده على راسه كأنه بيقول لابنه : ايه اللى بتقوله ده.. جنة ايه اللى شفتها!! ^_^ ) لكن النبي ابتسم و قال من منكم دخل الجنه؟ فبرده رد عبدالله بن عمر وقال: أنا يا رسول الله ،فبدأ عمر بن الخطاب يغطي راسه بعبايته حيتجنن من ابنه .. بس برده ابتسم النبي وقال من منكم اكل من ثمارها؟ فقال عبدالله بن عمر : انا يا رسول الله' فسيدنا عمر بقى مكسوف وكان شويه و يسحب نفسه بهدوء و يمشى ..و برده تبسم النبي لكن قال : قم يا ابن عمر فاخبرهم كيف دخلت الجنه؟

فقام عبد الله بن عمر وقال : والله يارسول الله رايت الجنه بعينيك يا رسول الله،،ودخلت الجنه بقدميك يا رسول الله،واكلت من ثمارها بفيك يا رسول الله،..'فانا اري بعينك وامشي بقدمك واكل بفيك يا حبيبي يا رسول الله ..شوفتوا حب النبي فى قلبه قد ايه شوفتوا إيمانه بالنبى شكله ايه!! كان بن عمر بيمشي ف المدينه و يدور على الاماكن اللى ممكن يكون النبى مشى فيها و يمشى ويحط رجليه فوق اثر رجل النبي،،لدرجه ان كان فى شجره النبي بيحب يقعد تحتها دايما كان برده عبد الله يروح لوحده يقعد تحتها . لدرجه ان الصحابه قالوا :" والله كان يتبع اثر النبي حتي خفنا على عقله" ..ماشي عمال يدور على ايه بيحبه حبيبه عشان يعمله..ياريت نجرب نبقي زي ابن عمر ونشوف بعين النبي اللى حيشوفه فى رحله الإسراء و المعراج ..

نرجع لجبريل بعد ما قال للنبى: قم يا محمد إلي لقاء ربك، بس حصل حاجه قبلها..حادثه شق الصدر للمره الثانيه.. ملائكه نيمت النبي على ضهره وفتحت صدره تاني زى زمان فاكرين؟ و طلعوا قلبه و غسلوه بميه زمزم و خيطو الجرح.. عمليه قلب مفتوح سبحان الله.. الذي شق البحر لموسي قادر ان يشق صدر محمد فالله علي كل شئ قدير ..طيب ليه دلوقتي حصل شق الصدر؟ عشان قلب النبى يقدر يتحمل اللي هيشوفوا فى الرحله لانه حيشوف حاجات لا يمكن يستحملها بسهوله.

بعد شق الصدر ،جبريل جه للنبى عشان يبدا الرحله، طيب ايه وسيله المواصلات فى الرحله؟ دابه اسمها "البراق"طيب وبرنامج الرحله ايه؟ ربنا عاوز يجبر بخاطر النبي فالرحله من الحرم للمسجد الاقصي،و من المسجد الاقصي للسما،، وفى الرجوع حتبقى من السما للمسجد الاقصي ،،ومن المسجد الاقصي للحرم مره تانيه...البراق دى دابه شكلها ما بين الحمار و البغل لونها ابيض ، والخطوه منها توصلها لمنتهى بصرها (يعني خطوتها واسعه تجيب المدى البعيد اللى هيه شيفاه) احنا مثلا منتهي بصرنا ثلاثين كيلو منقدرش نشوف ابعد من كده ..

لو افترضنا ان البراق منتهي بصره زينا ثلاثين كيلو يبقى الخطوه الاولي من رجله تجيب الثلاثين كيلو وبعدين رجله التانيه ثلاثين كيلو تانيين.. يعنى سريع جدا ، قال تعالى : " يَا أَيُّهَا النَّاسُ ضُرِبَ مَثَلٌ فَاسْتَمِعُوا لَهُ إِنَّ الَّذِينَ تَدْعُونَ مِن دُونِ اللَّهِ لَن يَخْلُقُوا ذُبَابًا وَلَوِ اجْتَمَعُوا لَهُ وَإِن يَسْلُبْهُمُ الذُّبَابُ شَيْئًا لَّا يَسْتَنقِذُوهُ مِنْهُ ضَعُفَ الطَّالِبُ وَالْمَطْلُوب".. سبحان الله .مابالكم بأه بالبراق ! المهم فيقول جبريل: اركب يا رسول الله و ركب و ركب معاه جبريل .. والنبى ييقول كان جبريل لا يفارقنى و لا افارقه.. طيب رايحين فين؟ رايحين على ارض الشام ،على المسجد الأقصى بسرعه تفوق الخيال و يوصل النبي المسجد الأقصى و يوقف جبريل البراق عند باب المسجد الاقصي،و قال جبريل: يا محمد انزل.. عارفين النبي حيعمل ايه؟

هنعرف سوا إن شاء الله ❤
صلي الله علي محمد صلي الله عليه وسلم