السيرة النبوية

الحلقة39

🌷سيرة_الرسول🌷
الحلقه 39

يلا صلوا على النبى :)
هجرة المسلمين للحبشه (ج1)

وبعد ما " عَُتبه" خاف و نصح قريش انهم يبعدوا و يسيبوا النبىﷺ يعمل اللى هوه عايزه ..رفضت قريش وقالت : والله ما نفعل أبدا.. و قررت قريش أنها تعمل مفاوضات تانيه وقالوا لعل المشكله كانت فى اسلوب " عَُتبه" فقرروا يجربوا تانى.. وفعلا راحوا للنبى عليه الصلاه و السلام تانى و عرضوا عليه نفس العروض اللى بعتوا بيها " عَُتبه" المره اللى فاتت..
فالنبي ﷺ رد عليهم و قال: يا معشر قريش ما جئتكم أطلب أموالكم و لا أريد الجاه فيكم و لا السلطان عليكم ( و مرداش يرد على الحتة بتاعت النساء، أتضايق منها :'( لدرجة إنه مردش عليها ) و كمل كلامه وقالﷺ: و إنما جئتكم بشيراً و نذيرا فمن قبل منكم دعوتي كان حظه من الدنيا و إذا رفضتم فسأصبر لحكم الله حتى يحكم الله بيني و بينكم..

و بعد ما رجال قريش سمعوا رد النبى ﷺ مشوا، و قعدوا يفكروا شوية و بعدين رجعوا للنبى ﷺ تانى و قالوا له : يا محمد عندنا حل نعبد إلهك يوماً و تعبد إلهنا يوماً ،فنزل كلام رب العالمين قال تعالى : "قُلْ يَا أَيُّهَا الْكَافِرُونَ*لَا أَعْبُدُ مَا تَعْبُدُونَ* وَلَا أَنتُمْ عَابِدُونَ مَا أَعْبُدُ*وَلَا أَنَا عَابِدٌ مَّا عَبَدتُّم*وَلَا أَنتُمْ عَابِدُونَ مَا أَعْبُدُ*لَكُمْ دِينُكُمْ وَلِيَ دِينِ "سورة الكافرون. فمشوا تانى و رجعوا وقالوا : يا محمد هنؤمن بيك بس بشرط فقال النبىﷺ: ما هو ؟

فقالوا : فجرلنا في أرض مكة ينابيع من الماء في كل مكان أو خلي ربك يخلقلك جنة (حديقه) كلها بساتين و زرع و قصر كبير.أو نزل السماء تنطبق على الأرض أو خلى الله و الملائكة ييجوا يتكلموا معانا أو يكون لك بيت من زخرف (بيتك يكون كله من فضة و ذهب و ياقوت) أو ترقى في السماء و لن نؤمن لرقيك حتى تنزل علينا كتاباً نقرأه (يعنى تطلع للسما و مش هنصدق أنك طلعت إلا لو نزلت لنا بجواب يكون من رب العالمين ).. فيرد عليهم رسول الله صلى الله عليه و سلم و يقولهم برفض شديد : ما كنت أسأل ربى هذا..

وتنزل الايات ترد عليهم قال تعالى: وَقَالُوا لَن نُّؤْمِنَ لَكَ حَتَّىٰ تَفْجُرَ لَنَا مِنَ الْأَرْضِ يَنبُوعًا*أوْ تَكُونَ لَكَ جَنَّةٌ مِّن نَّخِيلٍ وَعِنَبٍ فَتُفَجِّرَ الْأَنْهَارَ خِلَالَهَا تَفْجِيرًا*أَوْ تُسْقِطَ السَّمَاءَ كَمَا زَعَمْتَ عَلَيْنَا كِسَفًا أَوْ تَأْتِيَ بِاللَّهِ وَالْمَلَائِكَةِ قَبِيلًا*أوْ يَكُونَ لَكَ بَيْتٌ مِّن زُخْرُفٍ أَوْ تَرْقَىٰ فِي السَّمَاءِ وَلَن نُّؤْمِنَ لِرُقِيِّكَ حَتَّىٰ تُنَزِّلَ عَلَيْنَا كِتَابًا نَّقْرَؤُهُ قُلْ سُبْحَانَ رَبِّي هَلْ كُنتُ إِلَّا بَشَرًا رَّسُولًا"
طيب دلوقتى قريش مش لاقيه حل عشان تخلى النبى يبطل يدعوا للإسلام.. فقريش بتفكر ..نرجع للإيذاء..نرجع للتعذيب و نعذب الفقراء المسلمين و نعذب اللي ملهمش ضهر ،

وفعلا يبدأوا ينفذوا الحل ده و يبدأ التعذيب يشتد و من كتر ما كان العذاب شديد، بدأ الصحابة يقولوا أمنا باللات و العزة قلبهم مطمئن بالإيمان يعنى مسلمين لكن بينطقوا كلمه الكفر بلسانهم بس عشان مش قادرين يستحملوا العذاب و زى ما عرفنا ان ربنا عز وجل قال :إِلَّا مَنْ أُكْرِهَ وَقَلْبُهُ مُطْمَئِنٌّ بِالْإِيمَانِ (يعنى مدام همه مجبرين ع الكفر ونطقوا كلمه الكفر همه برده مازلوا مسلمين ♡) ويحطوا وشهم في المياه المغلية و واحد يتكوى لحد ما جلده يتشوي.. طب وبعدين :'( !!. ربنا عز وجل نزل الايه دى : "وَأَرْضُ اللَّهِ وَاسِعَةٌ إِنَّمَا يُوَفَّى الصَّابِرُونَ أَجْرَهُم بِغَيْرِ حِسَابٍ"فالنبىﷺ بدأ يديهم حل فى أنهم يمشوا من مكه بس دى برده حاجة صعبة أوي على العرب، العربي مرتبط أوي بأرضه و قبيلته و عشيرته ،

طيب يا رسول الله نمشى و نروح على فين ؟ تروحوا الحبشة ، طيب ليه الحبشة؟ دى في قارة تانية خالص و بعيده و لغتهم مختلفة و ديانتهم المسيحية..أشمعنا الحبشه؟ النبى عليه الصلاه و السلام أختار الحبشه عشان سببين ،
السبب الأول: لأنها قارة تانية خالص و مكة سيدة العرب فعندها معاهدات سياسية و عندها حق استدعاء سياسي لأي حد يهرب من مكه و يروح بلد تانيه أما الحبشه في قارة تانية خالص فمكة ملهاش عليها سلطه
أما السبب الثاني: أن اهل الحبشه مسيحين ، بصوا كلام الله تعالى " وَلَتَجِدَنَّ أَقْرَبَهُم مَّوَدَّةً لِّلَّذِينَ آمَنُوا الَّذِينَ قَالُوا إِنَّا نَصَارَىٰ ذَٰلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لَا يَسْتَكْبِرُونَ*وَإِذَا سَمِعُوا مَا أُنزِلَ إِلَى الرَّسُولِ تَرَىٰ أَعْيُنَهُمْ تَفِيضُ مِنَ الدَّمْعِ مِمَّا عَرَفُوا مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِين.
حيقول النبى ﷺ للصحابه انهم لازم يسافروا..
طب وقريش حتسيبهم يسافروا؟

هنعرف سوا بكره إن شاء الله 🌷
🌿 لا تنسوني من دعائكم 🌿