السيرة النبوية

الحلقة54

🔸️سيرة_الرسول🔸️
الحلقة 54

يلا صلوا على النبى 💚
رحله الإسراء و المعراج من الأرض للسماء(ج3)
قم يا محمد إلى لقاء الله ❤

و كنا مع النبى عليه الصلاه و السلام المره اللى فاتت لما جبريل خده و لف على المقابر و النبى شاف احوال القبور و لقى قبر ريحته حلوه.. فسأل و رد جبريل وقاله انه قبر ماشطه ابنه فرعون و أولادها
ايه قصتها ؟؟؟...
ماشطه فرعون دي كانت ست فقيره وكانت الكوافيره بتاعت بنت فرعون و كانت الست دى عندها اربعه اولاد وكانت مؤمنه وكاتمه ايمانها خوفآ من فرعون،،ففي مره وهي بتسرح شعر ابنه فرعون وقع المشط من إيدها فوطت تجيبه من الأرض فلا إراديآ قامت قايله بسم الله، فسمعتها بنت فرعون و قالت :.. ابي؟ اصل فرعون كان بيقول انا ربكم الاعلي...فأتغاظت الست اوى وقامت رده عليها و قايله : لا .. بل ربي وربك ورب ابيك الله ..

فالبنت اتجننت و قالت : إذن سأخبر ابي عنك..فقالتله :'( و جه فرعون و قبضوا على ماشطه ابنه فرعون و سألها :ماذا تقولين؟ قالت ربي وربك الله ،فراح فرعون جايب ولادها الاربعه قدامها وجاب برميل كبير فيه زيت بيغلي،،وقالها هرمي ولادك فى الزيت لو لم تشهدي ان انا ربنا،،فقالت: ربي وربك الله ،،فأخد ابنها الاول فرماه فى برميل الزيت المغلي فساح الولد .. وقام سألها تانى: من ربك فتقول بصرخه و عياط و ألم و ثبات : ربي وربك الله فأخد ابنها التانى و رماه فى الزيت وساح و هكذا عمل كده مع الابن التالت وراح سألها فرعون تانى: من ربك ؟

فقالت : ربي وربك الله وكان الابن الرابع هو اللي الدور عليه وكان رضيع لسه صغير فى حضنها، فجه عشان ياخده منها فمسكت الولد ورجعت لورا عشان محدش ياخده منها..(بقى نقطه ضعفها) بس ربنا هيثبتها على الحق لحد اخر لحظه فى حياتها..ربنا خلى الرضيع ينطق و يقول لها: يا امي انتي على الحق ،اثبتى انها جنه..فسألها فرعون فقالت : ربي وربك الله ..
فاخد الولد منها عشان يرميه و يرميها معاه فى الزيت المغلى ..فطلبت ماشطه فرعون من فرعون جمع عظامها وابنائها و طلبت أنهم يندفنوا سوا ..فقال فرعون لها : لكي ذلك واخدها والطفل و رماهم فى الزيت المغلي و اتجمعت العظام و أتحطت فى القبر.. وعشان الريحه كانت ريحه حرق ومش حلوه.. ربنا خلاها فى القبر ريحه مسك واحلى من المسك ♡.

و بكده تعرف يا رسول الله ان صحابك اللى ماتوا بالتعذيب هيشوفوا نعيم كتير اوى فمتزعلش عليهم.و دلوقتى تبدأ رحله الصعود للسماء ...النبى عليه الصلاه و السلام هيخترق الغلاف الجوي والنجوم و الكواكب..و كل ما يطلع لفوق لفووووق اوى و كل حجم الاشياء بيصغر و يصغر لحد ما تبقى الارض نقطه قدام عينيه..فين بقى ابو لهب اللي مزعلك يا رسول الله ،فين كفار قريش اللى مضايقينك ؟دول ولا حاجه فى كون ربنا الواسع اوي،،
كأن ربنا رايد يقول للنبي انا كوني واسع وقدرتي وسعت كل شئ،،يعني كنت اقدر اخليك تخترق الزمن يا محمد واخليك تنتصر على قريش ،،بس مش من الحكمه يحصل كده ،،انت تعبان وانا اقدر أوقف تعبك فى ثانيه بس اللي انت فيه ده لحكمه..فعشان كده اي حد عنده مشكله ، اعرف أن ربنا قادر يحلها لك،،بس مدام ربنا محلهاش دلوقتي يبقي ده لحكمه ولمصلحتك،،.

و يطلع النبى عليه الصلاه و السلام و يوصل ومعاه جبريل للسماء الاولي ( العلم الحديث أثبت أن لا يمكن الوصول للمسافه دى ابدآ.. قال تعالى: "يَا مَعْشَرَ الْجِنِّ وَالْإِنسِ إِنِ اسْتَطَعْتُمْ أَن تَنفُذُوا مِنْ أَقْطَارِ السَّمَاوَاتِ وَالْأَرْضِ فَانفُذُوا لَا تَنفُذُونَ إِلَّا بِسُلْطَان" و السلطان هو امر و أذن من الله العظيم ويوصل للنبى لباب السماء الاولي ..لقى باب وقفل و جنود ..اصل ملكوت ربك منظم ،،فجبريل خبط على الباب.. فيقول الملك: من ؟ فيقول: انا جبريل و فيرد يقول: و من معك؟

فراح جبريل قايل: محمد.( و طبعا مش محتاج تعريف اكتر من كده يا سيدنا النبي عشان الملايكه تعرفك :') ♡ )،،فتقول الملائكه: أوقد ارسل إليه!نعم المجئ جاء.. ( الملايكه فرحت و بتقول ياااه هوه ربنا بعتله ! ..دى احسن زياره حصلت ) فتتفتح ابواب السماء الاولي وسيدنا النبي مبهور ..مش مصدق انهم عارفنيه؟ ،،ايوه عارفينك يا حبيب الله.. اهل الطائف مش عارفينك بس اهل السماء عارفينك يارسول الله فمتزعلش ابدا ..

فيدخل النبى السما الاولى فيلاقي راجل قاعد على جنب فقال جبريل : يا محمد هذا ابوك ادم.. اذهب فسلم عليه..فيروح النبي بكل تواضع و يقول السلام عليكم يا ابو الانبياء ادم ..فآدم عليه السلام يبص له ويفرح بيه ،ويقول : وعليكم السلام ورحمه الله ،مرحبا بالنبي الصالح والابن الصالح ، و بعدين ياخد جبريل النبى عشان يكمل الرحله، فالنبي يبص وراه فيلاقي ادم بيبص يمينه فيلاقي ناس كثير فيضحك،،ويبص شماله فيلاقي ناس كثير فيبكى، فالنبى استغرب و سأل جبريل لماذا يضحك ويبكي؟ راح جبريل قايل : آدم ينظر عن يمينه فيري ذريته من أهل الجنه فيضحك،، ثم ينظر عن يساره فيري ذريته من اهل النار فيبكي.. (فيارب انا و انتو نكون من الذريه اللي هتخلى سيدنا ادم يضحك و يفرح).

و يوصل النبى للسماء الثانيه فيخبط جبريل.. فيرد الملك و يسال من ؟ فيرد : انا جبريل ..فيسأله الملك: ومن معك؟ فيقول محمد.. فتقول: الملائكه أوقد أرسل إليه!! نعم المجئ جاء ♡ ،فيدخل فيلاقي اتنين شباب قاعدين شكلهم جميل. فجبريل يقول له : يا محمد أذهب فسلم هذا اخوك عيسي و أخوك يحيي،،فيروح النبي و يقول :السلام عليكم..فيرد يحيى و عيسي ويقولوا : و عليك السلام ورحمه الله مرحبا بالنبي الصالح والاخ الصالح ،،و بعدين يطلع للسماء التالته فيخبط جبريل و يساله الملك و يعرف ان محمد معاه و تفرح الملائكه و يدخل النبى فيلاقي يوسف عليه السلام فيسلم عليه النبى ،فيرد يوسف و يقول مرحبا بالنبي الصالح والاخ الصالح..

و يصعد النبى للسماء الرابعه و تفتح له الملايكه و يدخل يلاقي سيدنا إدريس و يسلموا على بعض و بعدين يصعد النبى للخامسه فيلاقي سيدنا هارون و يسلم عليه و يصعد للسماء السادسه فيلاقى سيدنا موسي، فيقول موسى: مرحبا بالنبي الصالح والاخ الصالح،، و بعد ما سلم النبى عليه سمع صوت بكاء ،فالنبى بيبص لقى سيدنا موسي بيبكى فيسأل النبى جبريل: لماذا يبكي موسي؟ فيقول جبريل موسى يبكى ويقول : " يارب انه غلام بعثته بعدي و يدخل الجنه من امته أكثر من أمتى " (كلمه غلام ليس للتقليل من شأن النبي محمد لكن المقصود انه شاب صغير) ولما النبى سمع الكلام ده اطمن النبي على امته ..

و يصعد النبى للسماء السابعه فيدخل و يلاقى سيدنا ...... و يا ترى حيقوله إيه؟
هنعرف سوا إن شاء الله ❤
صلي الله علي محمد صلي الله عليه وسلم