السيرة النبوية

الحلقة22

💎سيرة_الرسول💎
الحلقة 22
يلا صلو على النبى :)

امبارح بدأ النبى صلى الله عليه وسلم بالدعوه السريه للإسلام وده طبعا عشان يبنى لنفسه قاعدة داخلية, عشان لما يجهر بالاسلام, فيكون معاه أصحابه وعدد من الناس يأيدوه..

ونزلت على النبى ﷺ الأيه الكريمه :" وانذر عشيرتك الاقربون "
هتعمل إيه يا رسول الله؟ النبى ﷺ يعمل وليمة (عزومه)ودعا كل أسياد بنى هاشم , وكانوا 45 رجل.. فقعدوا و خلصوا الأكل و أول ما وقف النبى ﷺ ولسه هيبدأ يتكلم معاهم..فوقف قدامه "أبو لهب" (ده عم رسول الله .. وأولاد أبو لهب تزوجوا من بنات النبى, و طبعآ لاحظوا تغييرات مفاجأه على زوجاتهم, عشان كده عرف أبو لهب باللى هيقوله النبى)..

ووقف ابو لهب وقال: يا محمد لا تتكلم, فانى لا أعلم برجلا جاء على قومه بشر مما جئت به يا محمد!"(مشفتش حد جه بشر قد اللى أنت جى بيه يا محمد). فالنبى ﷺيسكت و يتحرج , و طبعا ميرفعش صوته على عمه أدبا وحياءا منه,
إنك على خلق عظيم بشهاده رب العالمين :') ♡

كان الحبيب عليه الصلاه و السلام بيصبر على آذى الناس بكل رحمه و رفق ..عارفين الصحابه بيقولوا : كنا نرى رسول الله يمشى فى طرقات مكة, وخلفه رجلا وضيئا يقذفه بالحجارة, فنقول من هذا؟ فيقولوا عمه أبو لهب! فيتعجبون لم لا يرد النبى ﷺ عليه ... (ليه النبى سايبه يأذيه كده ومش بيوقفه عند حده) ..وكان أبو لهب شديد الحسن, ولقب بأبو لهب لأن لحيته كالشمس, وكان أزرق العينين, ففيه من جمال النبى ﷺ بحكم القرابة, ولكنه مات كافرا...الله يعافينا ويعافيكم ♡..

المهم بعد ما العزومه الأولى باظت.. النبى صلى الله عليه و سلم مستسلمش وعمل وليمة تانيه , ولكن المره دى بئه قرر يتكلم قبل ما ياكلوا , وقام النبى ﷺ قايل كلمات جميله جدا : إن الحمد لله,نحمده و نستعينه ونستهديه ونستغفره, من يهده الله فلا مضل له, ومن يضلل فلا هادى له. أيها الناس, أما انى رسول الله اليكم. أما انها جنة أبدا, أو نار أبدا, أسلموا الى الله رب العالمين".

و يقف أبو لهب ويقول: يا محمد, اسكت! اسكتوه... فيقف أبو طالب يزعق ويقوله : دع محمد ..ويبص للنبى ﷺ ويقوله: والله انا اسرع واحد فى الدنيا عشان اعمل اللى تحبه (انه يسلم لله يعنى) و لكن لولا انى متمسك بدين أبائى كنت أسلمت .. بس والله يا محمد لأحميك منهم طول منا عايش .. قول اللى انت عيزوا يا محمد انا جنبك..

وبعد ما سمع النبى عليه الصلاه والسلام كلام عمه ابو طالب فرح جدا جدا .. ومن هنا, بدأ النبى ﷺبالجهر بالدعوة فى كل وقت,
فيقف فوق جبل الصفا, و فضل ينادى كل قبيله بإسمها يا معشر فلان ابن فلان .. لحد ما اتجمعوا ..
فراح قايلهم ﷺ : أرأيتكم لو أخبرتكم أن خيلا بالوادي تريد أن تغير عليكم (تحاربكم) أكنتم مصدّقيّ؟، قالوا: نعم، ما جربنا عليك إلا صِدْقا !!، (ازاى ميصدقوش دول بنفسهم لقبوه بالصادق الأمين <3 ).فرد النبى ﷺ عليهم وقال: إني نذير لكم بين يدي عذاب شديد..وينادى كل قبيله بإسمها : "يا معشر فلان بن فلان, أسلموا لله عز وجل, فإنى لا أغنى عنكم من الله شيئا. يا فاطمة بنت محمد, أسلمى, فانى لا أغنى عنكى من الله شيئا" ...

فيقف له أبو لهب و يقول : "تبآ لك سائر اليوم, ألهذا جمعتنا؟ تبآ لك!" ... فتنزل فيه الآيات من الله عز وجل . فتنزل فيه الآيات من الله عز وجل : تَبَّتْ يَدَا أَبِي لَهَبٍ وَتَبّ ( يعنى الهلاك و العذاب لأبى لهب) الأيه دى فيها إعجاز جميل اوى .. بتقول ان ابو لهب اكيد هيموت على الكفر.. لان الأيه بتقول ان العذاب و الهلاك لأبو لهب .. و الأيه دى خالده مخلده ليوم الدين.. طب كان ممكن ابو لهب لما تنزل الأيه دى يعمل مقلب كويس و يقول طيب انا هسلم بئه.. يبقى انا هخش الجنه و محمد بيقول تبت يدا ابى لهب ..يبقى القرآن غلط .. لكن طبعا محصلش ده ..قال تعالى : وَمَنْ أَصْدَقُ مِنَ اللَّهِ حَدِيثًا ♡ و فعلا هيموت ابو لهب على الكفر

نكمل بكره إن شاء الله 💗
🌿 لا تنسوني من دعائكم 🌿