السيرة النبوية

الحلقة30

💐سيرة_الرسول💐
الحلقه ٣٠
يلا صلوا على النبى :)

نكمل سوا قصص الحجيج اللى وصلوا لمكه فى موسم الحج الوثنى..
واحد اسمه ابو ذَر الغفاري : هو من قبيلة اسمها غِفار ،له اخ اسمه اُنيس الغفاري كان شاعر وكان يٌلقب بأشعر العرب (احسن واحد فى الشعر) .. ف ربنا شاء ان انيس يكون في مكة بغرض التجارة قبل موسم الحج بأيام قليلة ويشوف النبيﷺ في طرقات مكة ويسمع عنه
فلما رجع انيس بلده .." ابو ذَر" سأله : شفت الراجل اللى بيقول على نفسه انه نبى؟ قاله: ايوه شفته ولاقيته بيصلى زى ما أنت بتصلى( اصل ابو ذَر بيقول والله لقد صليت لله ثلاث سنوات قبل ان ألقي رسول الله ﷺ يعنى كان بيصلى و يعبد ربنا من قبل ما ينزل الإسلام و مكنش بيعبد الأصنام)

المهم أبو ذَر قال : طب و قومه بيقولوا عنه إيه؟ قال أنيس : بيقولوا عليه انه شاعر فقال ابو ذر لأخوه :طب أنت شايف ايه؟ ( انيس شاعر كبير ) فقال أنيس : والله لقد وضعت كلامه علي اقراء الشعر فلم تستقم لي .. فوالله ليس بشاعر (الإقراء هي بحور الشعر يعنى مش ماشى مع اساسيات الشعر ولا انواعه اللى احنا عارفنها)

فأبو ذَر قال لأخوه انا عايز اعرف عن محمد أكتر أنا رايح مكه.. و فعلا راح أبو ذر لمكه..وهوه هناك عدى عليه سيدنا على بن ابى طالب و سأله : انت مش من هنا؟ انت عايز مين؟ فمردش ابو ذر عليه (خايف ان حد يعرف انه جى لمحمد فيأذيه) ويعدى على بن أبى طالب فى اليوم التانى و يسأله وبرده ميردش

لحد ما فى مره رد على سيدنا على وقال له: لو هتكتم السر هقولك، فقال عليّ : حاضر هكتم السر..فقال أبو ذر :انا جى لمحمد لو تعرف مكانه، خدنى معاك..فقال عليّ : حدلك على محمد بس وطى صوتك و امشى ورايا كأننا منعرفش بعض ولو انا لاحظت ان فى حد مركز معانا حروح جنب الحيطه كأنى أصلح نعلى(حذائى) و ساعتها امشى انت بسرعه و ارجع.

و فعلا راحوا سوا و الحمد لله وصلوا لدار الارقم ومحدش شافهم..ويتفتح الباب فيجرى ابو ذَر علي النبي ﷺ وهو يًبكي وراح قايل أشهد أن لا إله إلا الله و أن محمد رسول الله.. ففرح به النبيﷺ
بس النبى عليه الصلاه و السلام خايف على ابو ذر فقاله يرجع لبلده و أول ما يسمع ان الإسلام بقى علنى فى مكه ومفيش مشاكل.ساعتها يرجع على طول

لكن ابو ذر أقسم انه يشهر إسلامه..فمشى أبو ذر و راح واقف قدام قريش و قال : يا معشر قريش أشهد أن لا إله إلا الله و أن محمد عبده و رسوله..فقالوا : قوموا اضربوا هذا المجنون فقام "العباس" (ده كافر بس هيسلم بعد كده) وقال: اتضربون رجلآ من غفار !! و فيها تجارتنا و هى ممر لنا (يعنى لو حصل مشاكل بنا وبينهم ممكن يقطعوا علينا طريق التجاره ويقفلوه) فلما سمعوا كده ..سابوه.

و واحد اسمه عمرو بن عبسة ده شخص عنده فضول وحب إستطلاع فراح للنبي وحصل بينهم حوار
فيقول عمرو : ما أنت ؟
فيرد الرسولﷺ : انا نبي
عمرو : وما نبي ؟
الرسولﷺ : أرسلني الله
عمرو : بم أرسلك ؟
الرسولﷺ : بعبادته وحده لا شريك له و بكسر الأصنام .. وصلة الأرحام ..
عمرو : ومن معك؟
الرسول ﷺ: حر وَعَبَد ( يعنى اللى بيتبعونى فى منهم عبيد و منهم أسياد القوم كمان) فقال عمرو اني متبعك يا محمد وقال: أشهد أن لا إله إلا الله و أنك رسول الله..بس النبي طلب من عمرو أنه يرجع لبلده ويثبت على الاسلام،

وحاول عمرو انه يفضل جنب النبى بمكة ولكن الرسول خاف عليه بسبب الإيذاء اللى بيتعرض له المسلمين فى مكه .. و يقول عمرو فجعلت انصرف بظهري حتي املي عيني منه <3 خشية الا ألقاه مرة اخري (بقى يمشى بضهره عشان يملى عينه من النبى :') ) صلي الله علي محمد ..صلي الله عليه وسلم.
و بعد كده حتلف الأيام والنبيﷺ يروح المدينة و يجيله عمرو بن عبسة ويدخل علي النبي ويقول يارسول الله اتذكرني ..فيبتسم النبيﷺويقول اجل انت عمرو بن عبسة الذي جئتني بمكة .. فيقول عمرو والله ما أبكاني الا انه ذكرني (ياا لسه فاكره بالاسم يا رسول الله)

نكمل سوا إن شاء الله 🍀
🌿 لا تنسوني من دعائكم 🌿