السيرة النبوية

الحلقة 41

🌺سيرة_الرسول🌺
الحلقة41
يلا صلوا على النبى :)
هجرة المسلمين للحبشه (ج3)

أتكلمنا المره اللى فاتت عن التوقيت اللى نزلت فيه سوره مريم ..وكان ده مهم جدا لأن أهل الحبشة كلهم مسيحين فربنا عزوجل لازم يثقف الصحابة بالديانه المسيحية، فتنزل سورة مريم عشان تعلمهم إزاي يدعو للإسلام هناك، قال تعالى: "وَقَالُوا اتَّخَذَ الرَّحْمَٰنُ وَلَدًا*لَّقَدْ جِئْتُمْ شَيْئًا إِدًّا*تَكَادُ السَّمَاوَاتُ يَتَفَطَّرْنَ مِنْهُ وَتَنشَقُّ الْأَرْضُ وَتَخِرُّ الْجِبَالُ هَدًّا*أن دَعَوْا لِلرَّحْمَٰنِ وَلدا*وَمَا يَنبَغِي لِلرَّحْمَٰنِ أَن يَتَّخِذَ وَلَدًا"

ويبدأ الصحابة يستعدوا للهجرة، وفى سريه تامه وصلوا لحد شط البحر و تعدى سفينة تجارية كأن ربنا بعتهالهم و يركبوها..أصلها كانت رايحة الحبشة للتجارة،و فجأة أنتبهت قريش لهجره الصحابه لكن كانت خلاص السفينه فى عرض البحر..الحمدلله..دلوقتى الصحابة وصلوا الحبشة و يستقبلهم النجاشي"ملك الحبشه" بإستقبال جميل و يعيشوا في أمان ..

و قريش تبقى متغاظة، فتبدأ تضاعف العذاب على الصحابة اللى تحت إيديها فى مكه .و بعد هجرة الصحابه بأيام..يخرج النبي عليه الصلاه والسلام و يروح الحرم و يقرأ سوره النجم فقريش اتلمت حواليه و يبدأ يقرا "وَالنَّجْمِ إِذَا هَوَىٰ*مَا ضَلَّ صَاحِبُكُمْ وَمَا غَوَىٰ*وَمَا يَنطِقُ عَنِ الْهَوَىإِنْ هُوَ إِلَّا وَحْيٌ يُوحَىٰ*عَلَّمَهُ شَدِيدُ الْقُوَىٰ" فكل قريش ساكتة و بتسمع لحد ما يوصل عند اخر الآيات و يقول :"أفَمِنْ هَٰذَا الْحَدِيثِ تَعْجَبُون*َوَتَضْحَكُونَ وَلَا تَبْكُون*َوَأَنتُمْ سَامِدُون*َفَاسْجُدُوا لِلَّهِ وَاعْبُدُوا ".
و هنا في سجدة فيقوم النبيﷺساجد.. و أول ما النبي عليه الصلاة و السلام رفع راسه من السجدة ..عارفين لقى إيه ؟ لقى قريش كلها ساجدة وراه، قريش سجدت من قوة القرآن.. و بسرعه ينتشر فى كل البلاد ان قريش أسلمت ..

و تنزعج قريش و بسرعه تعمل إجتماع فى دار الندوه، بيحاولوا يفكروا فى حاجه يقولوها للناس تبرر سجودهم ده، فقرروا يقولوا : أصل محمد قال بيت شعر بيمدح فيه الألهه بتاعتنا فأحنا قمنا سجدنا للالهة.. و راحت قريش مألفه بيت شعر يليق على وزن الآيات القرآنيه وقالت بيت على الأيه والنجم إذا هوى " تلك الغرانيق العلا ،و إن شفاعتهن لترتجى" (الغرانيق يعنى الآلهه) ..
بس فى مشكله كبيرة دلوقتى، المشكله هيه إن إشاعه إسلام قريش كانت جامده اوى وللأسف وصلت للحبشه

و قريش ساعدت فى ده عشان الصحابة في الحبشة يطمنوا و يرجعوا لمكه، وفعلا الصحابة أفتكرت أن قريش أسلمت والصحابه كانوا متأثرين جدا لفراق النبي عليه الصلاه و السلام فمن فرحتهم مابعتوش للنبي ﷺ عشان يتأكدوا من الكلام ده وبسرعه قرروا يرجعوا.. وللأسف لاقوا قريش متربصه لهم على ابواب مكه و من ضمن الناس اللي كانت داخله صحابى اسمه عثمان بن مظعون ، عثمان شايف كل اللي بيدخل بيتقبض عليه و يتكتف بالحديد..

فعثمان خاف و اترعب فبدأ يجري بضهره فمسكه الوليد بن المغيرة (ده أبو خالد بن الوليد على فكره) فقال الوليد : يا عثمان لا ترجع.. ادخل إلى بلدك فإنك رجل عزيز و إنك في جواري لا يؤذيك أحد (يعنى انت فى حمايتى يا عثمان)، وراح الوليد معلى صوته وقايل : يا معشر قريش عثمان بن مظعون في جواري لا يؤذيه أحد و لا يسبه أحديقول عثمان : فأنطلقت في طرقات مكة فهذا يضرب امامى و هذا يجلد و هذا يسحل، فقلت: أيفعل هذا بأصحاب محمد و أنا سليم معافى..

فراح للوليد بن المغيرة و قال له: يا أبا عمارة رددت عليك جوارك (مش عايز حمايتك) فقال الوليد : يا بني هل أذاك أحد! قال: لا ، قال: هل سبك أحد قال: لا ،فقال الوليد: فلما ترد علي جواري؟ فقال عثمان : وجدت جوار من هو أعز منك ،فقال: من؟ قال عثمان: جوار الله عز و جل. فضحك الوليد و قال: يا بن أخي سنرى ما سيحدث لك..فراح عثمان عند الحرم لقى أهل قريش قاعدين و بيسمعوا لشاعر اسمه "لبيب" و واقف يقول أبيات شعر ..والعرب عندهم لما الشاعر يتكلم عيب أن حد يقاطعه ، فيقول لبيب : " ألا كل شئ ما خلا الله باطل" فراح عثمان قايل: صدقت.

فبصله لبيب و كمل و قال :" و كل نعيم لا محال زائل" فراح عثمان مقاطعه و قايل : كذبت بل نعيم الجنة لا ينفذ أبدا ..فقال لبيب: يا معشر قريش منذ متى يهان الشعراء في دياركم؟ فقالوا : هو في حماية الوليد فقال عثمان: رددت علي الوليد جواره فراحوا قايمين عليه و ضربوه ضرب جامد أوى لحد ما فقعوا عينه اليمين ..فمر الوليد و راح قايل: أرأيت يا بن أخي جوارك! كنت في جوار عزيز ، فقال عثمان: كذبت يا عدو الله بل أنا في جوار الله عز و جل و إن عيني السليمة مشتاقة لما حدث لأختها، فالنبيﷺ توصله الأخبار دى..فيسأل و يقول :أين عثمان بن مظعون؟ فيحملوه الصحابه و يوصل عثمان لرسول الله ..

فبيحكى عثمان و يقول: فوضع النبىﷺ رأسي في حجره الشريف و ظل يمسح على رأسي و تمنيت ألا أبرأ حتى لا أقوم من حجره صل الله عليه و سلم (أتمنى يفضل تعبان :') ♡ ) ، فجعل النبى يتفل (ذرات مايه من فمه الشريف) و يمسح على عيني و يقول اللهم اشفي عثمان.فبيقول عثمان :و الله قمت بعدها، لا أدري أيتهما كانت المصابة . يااا سبحان الله ،أحسنت الجوار يا عثمان جوار الله عز وجل♡..طيب و بعدين..حينفع الصحابه يكملوا قعاد فى مكه ؟..طب حيقدروا يهاجروا للحبشه تاني؟ طب حيفلتوا إزاى من قريش تانى؟

هنعرف بكره إن شاء الله 🌻
🌿 لا تنسوني من دعائكم 🌿