السيرة النبوية

الحلقة19

💐سيرة_الرسول💐
الحلقة 19
يلا صلو على النبى :)
نكمل مع جبريل و محمد ﷺ

خديجه خدت محمد عليه الصلاه والسلام و راحت لأبن عمها ورقه بن نوفل ... ورقه كان عجوز اوى عنده حوالي ٩٠ سنة .. اعمي من كتر الكتابة .. كان نصرانى.. يقرأ الإنجيل ويكتب وهو كان الوحيد اللي من أهل الكتاب قي مكة ..

وصل محمد ﷺمع خديجه لورقه وقالتله يا ورقه اسمع من محمد ((ورقة عارف الإنجيل وحافظه " قبل تحريفه" والانجيل فيه بشارة بمحمد صلي الله عليه وسلم وفيه وصف الرسول .. وفيه وصف لأحداث هتحصل بعد كده)) ..
فبدأ محمد ﷺ يحكي لورقة .. وكل ما يحكي تتسع عين ورقة .. مش مصدق ..منبهر .. و فجأه راح ورقة قايل : يا محمد .. يا محمد .. هذا الذي جاءك لا تخف منه .. هذا الناموس الأكبر (جِبْرِيل) الذي هبط علي موسي .. يا محمد .. انت رسول الله ..

وبعدين ورقه راح قايل : يا محمد ياريتني كنت لسه فى شبابى و صغير فى السن كنت عشت بس عشان أدافع عنك لما قومك يخرجوك من مكه .. فالنبى ﷺ اتخض وقال : همه هيخرجونى من مكه؟ فقال ورقة : ايوه هيحاربوك.. يا محمد مفيش نبى جه بالكلام اللى بتقوله إلا بقا له أعداء كتير .. ووالله يا محمد لو اعيش لحد اليوم ده لادافع عنك بروحى :'( ..

خرج النبى عليه الصلاة و السلام من عند ورقة وبعد ساعات قليلة .. مات ورقة ( من حكمه ربنا أن لازم ورقه يموت عشان محدش يقول ان الكلام اللى جى بيه محمد ﷺ هوه مجرد كلام بيتعلمه من ورقه )

المهم بعد ما رجع النبي ﷺ من عند ورقة وبدأ بحاول يستوعب اللي بيحصل .. فقامت حصلت حاجة عجيبة اوي "فتر الوحي" (يعني الوحي مجاش للنبى ﷺ تانى وفضل غايب أيام و أيام فالنبي ﷺ بدأ يطّلع غار حراء يستني جِبْرِيل .. ولما غاب عنه الوحي بدأ يبكي لانه فكر ان ربنا أختاره رسول وبعدين استبدله بحد تانى ..

وكأن حكمه ربنا فى تأخير اللقاء التانى بين جبريل و محمد ﷺ.. ان ربنا أراد ان محمد عليه الصلاة و السلام يهدى ويستوعب ويشتاق للوحى والرساله..
و لحد اليوم الموعود يوم اللقاء التانى.. و محمد ﷺ قاعد فى الغار ..حزين مستنى جبريل عليه السلام ........
إيه اللى حصل ؟

هنعرف سوا إن شاء الله 💚
🌾 لا تنسوني من دعائكم 🌾