السيرة النبوية

الحلقة 56

🥀سيرة_الرسول 🥀
الحلقة 56

يلا صلوا على النبى 💚
رحله الإسراء و المعراج من الأرض للسماء(ج5)
قم يا محمد إلى لقاء الله ...

و شفنا الجنه امبارح مع النبى عليه الصلاه والسلام و شاف قصور و انهار وحاجات تانيه بديعه و عجيبه لكن النبى حبيبك اللى أخلاقه القرآن شاف كل الحاجات المدهشه دى ورغم كده ربنا قال لنا علي النبى ﷺ:"مَا زَاغَ الْبَصَرُ وَمَا طَغَى" يعنى لا بص هنا ولا خطف نظره هنا ده احنا لو دخلنا قصر بيجذبنا جماله ونفضل نتطفل ونبص هنا وهنا وحبيبنا النبى عليه الصلاه و السلام طلع فوق السبع سموات لكن كان فى قمه الأدب شاف على اد ما بالصدفه عينه شافت ..

و بعدين يطلع النبى و يطلع، قال تعالى: ثُمَّ دَنَا فَتَدَلَّىٰ*فَكَانَ قَابَ قَوْسَيْنِ أَوْ أَدْنَى"
وصل النبى لمنزله و مكانه شريفه بتدل على حب الله للنبى عليه الصلاه والسلام و قاب قوسين يعنى اد المسافه اللى بين قوسين عكس بعض)( وسجد النبى و دعا ربه.عشان كده النبى قال: "أقرب ما يكون العبد من ربه و هو ساجد " طيب هل النبى شاف ربنا وللا لأ ؟ اختلف العلماء فى ده.. الله اعلم.. و هينزل النبي وقلبه متعلق بعرش الرحمن ♡،،

تخيلوا بعد كل الصفاء ده هينزل النبى تاني لعذاب قريش..و على فكره النبى كان بعد الاسراء والمعراج لما يسمع "الله أكبر" يترعش و فى سجوده يقول: سجد لك سمعي وبصري وقلبي وعظمي ومخي وعصبي و لحمي.تعالوا نحس بالتسبيح ده "سبحان ربي الاعلي" هو فعلا اعلي من كل شئ ليس كمثله شئ، شفتوا النبى وهوه طالع السموات مع جبريل عدى كواكب و مجرات ياااه سبحان ربى الأعلى العظيم :') ♡..

فينزل النبي من الإسراء و المعراج و هوه جميل و مرتاح أوي .. المفروض لو حد كان مكانه و وصل للمنزله دى و حصلت له هذه الرفعة كان ممكن ينزل متكبر "أنا محمد .. أنا وصلت لأقرب ما يكون من الله عزوجل" بس النبى متغرش بالعكس النبى ازداد تواضعآ على تواضعه..بيحكى سيدنا أنس خادم الرسول صلى الله عليه وسلم و يقول "والله خدمت النبي 10 سنين فما قال لي أفٌ قط .. ولا قال لي لشئ فعلتهُ..لمَ فعلته؟ .. ولا لشئ تركته..لمَ تركته؟ و كنت إذا تأخرت عليه في طلبٍ بعثني له ،قام بنفسه و ذهب فقضاه هو عليه الصلاة والسلام.. تعرفوا أن الرسول كان بيحب أنس و دعا له و قال : "اللهم بارك في عمر أنس و كثر ولده و ماله و أدخله الجنة"

فكان أنس يبكي من الحديث ده و يقول "دعى ليَ النبي صلى الله عليه وسلم أن يبارك الله في عمري [فمات عنده 110 سنه] و دعى لي أن يبارك الله في ولدي و في مالي و أنا والله أكثر الأنصار مالا و أكثر الأنصار ذرية .. و ها أنا أنتظر الدعوة الرابعة [و أدخله الجنة]" طب انس بيبكى جامد ليه؟ عشان النبى دعا ان ربنا يبارك فى عمر أنس.. وبعد موت النبى، أنس مشتاق للقاء النبى و حزين لأن بقى عمره طويل بعد دعاء النبى له♡ ..

حتى فى وقت موت أنس لما كان بيحتضر فضل يبكي بكاء شديد .. فقالوا لمَ تبكى يا أنس؟ ألست صاحب رسول الله؟ فبكى أكثر ..فقالوا ما بك يا أنس..ماذ تشتهى يا أنس من الدنيا؟ فقال أنس: لا أشتهي إلا أمراً واحداً .. أن أرى حبيبي محمد و أقول له يوم القيامة..يارسول الله ..انا أُنيس ،خادمك أُنيس يارسول الله". اصل ده الاسم اللى كان النبى عليه الصلاه و السلام بيدلعه بيه ♡

المهم نزل النبى من السماء للمسجد الاقصي ومنه رجع للبيت الحرام..فيلاقي مكان نومه لسه دافى ،سبحان الله كأن كل ده حصل فى اللا زمن..و ارتاح النبى وتاني يوم صحي مهموم طب ليه؟ النبى عمال يفكر احكي للناس وقريش تضحك عليا ولا محكيش وابقي كده بكتم وحي من الله! .. فيعدي ابو جهل وبسخريه ويقوم قايل: مابك يا محمد ، آراك مهموم؟ فالنبى سكت ..فسأله تاني فالنبي قام حكي له كل اللي حصل! فأبو جهل قال له: أحقآ يا محمد ؟ فقال النبى: نعم.فقال ابو جهل :ما رأيك فى أن أجمع لك قريش فتخبرهم بما قلت لي..؟ فقال النبي: اجل، فقال ابو جهل: كما انت (يعني كانه بيقوله هجمعهم لك حاضر.. عشان نضحك على اللي بتقولو شويه.. بس طبعا الصحابه هيصدقوا النبى)

فراح ابو جهل جاب رجال قريش و رجع للنبي و قال أقصص يا محمد ما قلته" فقال النبي والله دخلت المسجد الأقصى فصليت بالأنبياء و فضل يحكى كل اللى حصل.. طب و أيه كان رد فعل قريش؟ منهم اللى ضحك و منهم اللى صقف و صفر إستهزاءاً بالكلام و منهم اللى رمى التراب على وجه النبي صلى الله عليه و سلم و منهم اللى شتم.. فقام واحد من كبار المشركين راح قايل :يا محمد صف لنا الأنبياء..فقال :أجل وبدأ يوصف سيدنا عيسى روح الله وقال فرايته رجلاً طويلاً بعيد ما بين المنكبين..عظيم الفم ..جميلا ..شعره كأنه خرج من ديماس [يعنى كأنه خارج أخد حمام يعنى شعره كأنه مبلول..ناعم أوي ] وراح قايل كأنه شبهه عمر بن مسعود الثقفي..

و أما موسى فرأيته رجلاً طويلاً أسمر اللون.. أجعد الشعر و "عنده سنتين قريبين من بعض أوي او راكبين فوق بعض يعنى مش جميل زي عيسى " (بس تعرفوا رغم ان سيدنا موسى مكنش بجمال سيدنا عيسى إلا ان ربنا عز وجل قال:" وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَىٰ عَيْنِي" فكان كل اللي يشوف سيدنا موسى يحبه اوى..سبحان الله) و راح النبى قايل : و موسى كأنه من رجال شنوءة (دي قبيلة كلهم سمر و أجسامهم قويه البنيه) .. و أما إبراهيم خليل الله فكان .......

نكمل سوا إن شاء الله ❤
صل الله علي محمد صل الله عليه وسلم