ပဏာမ ဇနီးသည်ဖွား သမီးပျို

၉၂။ ကံကြမ္မာက ဘယ်လိုသတ်မှတ်ထားလဲ စောင့်ကြည့်ကြည့်ပါလား

ကောင်းကင်ခန်းမဆောင်အတွင်း၌ ဧကရာဇ်ထျန်း၀ူသည် သ၀ဏ်လွှာအား ကိုင်ထားရင်းဖြင့် ဒူးထောက်ခစားနေသော နက္ခတ်ဗေဒပညာရှင်အား မေးမြန်နေ၏ ။ " ဇာမဏီကြယ်သက်ဆင်းလာပြီလို့ အရင်တစ်ခါတုန်းက မောင်မင်းပြောခဲ့တယ်မလား ။ အဲ့ကြယ်က အခု ဘယ်ရောက်နေပြီလဲ ။ "

နက္ခတ်ဗေဒပညာရှင်က ပြန်ဖြေသည်။ " ဇာမဏီကြယ်က မြို့တော်ထဲကို ၀င်လာပါပြီ။ သူ့ရဲ့ ဦးတည်ရာလမ်းအတိုင်း လျှောက်လှမ်းနေရင်း အရင်ကထက်လည်း ပိုပြီးတော့ အရောင်တောက်ပလာပါပြီ ။ ဆယ်နှစ်အတွင်း ဘာအပြောင်းအလဲမှ မဖြစ်ဘူးဆိုရင်တော့ ဇာမဏီကြယ်က.....သူ့ရဲ့ နေရာအမှန်ကို ရယူနိုင်လောက်ပါပြီ။ "

နက္ခတ်ဗေဒပညာရှင်၏ စကားများသည် ၀မ်းနည်းဖွယ် အမှန်တရားတစ်ခုကို သယ်ဆောင်လ််ို့ထားသည်။ အသစ်ဖြစ်သော ဇာမဏီကြယ်က နေရာအမှန်ကို ယူဖို့ဆိုပါက ယခင်ကြယ်သည် နေရာမှ ဖယ်ပေးရမည်ဟူသည့် သဘောပင်ဖြစ်၏ ။ ဇာမဏီကြယ်၏ သခင်ဖြစ်လာမည့် ဧကရာဇ်သည် လက်ရှိစိုးစံနေသော ထျန်း၀ူဧကရာဇ် မဖြစ်န်ိုင်ချေ ။ ဧကရာဇ်အသစ်တစ်ပါးသာ ဖြစ်ပေလိမ့်မည် ။

ဧကရာဇ်အသစ်တစ်ပါး ပေါ်ထွန်းလာခြင်းသည် ဧကရာဇ်ဟောင်း... ကြွေလွင့်သွားသည်ဟူသည့် အဓိပ္ပာယ်ပင် ။

ဧကရာဇ်ထျန်း၀ူက ခေါင်းတညိတ်ညိတ်ဖြင့် ရှိနေသည်။ " မွေးဖွားတယ် ၊ အိုတယ် ၊ နာတယ် ၊ သေတယ် စတာတွေအားလုံးက ဘ၀သံသရာရဲ့ အစိတ်အပိုင်းတွေပါပဲလေ ။ ကိုယ်တော်က နောက်ထပ် နှစ်အနည်းငယ်လောက်ပဲ ထပ်နေနိုင်ဖို့ကို မျှော်လင့်တာပါ။ ဘာတွေပဲဖြစ်လာဖြစ်လာ ...အဲ့ကလေးအတွက်  ကိုယ်တော်က လမ်းတော့ခင်းပေးဦးမှဖြစ်မယ်မဟုတ်ပေဘူးလား....မောင်မင်း သွားလ်ို့ရပြီ။ "

" ကျွန်တော်မျိုး နာခံပါတယ်။ " ဟုဆိုကာ အရိုအသေပေး နှုတ်ဆက်ပြီးနောက် နက္ခတ်ဗေဒပညာရှင်သည် ခန်းမဆောင်ထဲမှ ထွက်သွားတော့သည်။

ဧကရာဇ်ထျန်း၀ူသည် လက်ထဲမှ သ၀ဏ်လွှာအား ချလိုက်ကာ တစ်ကိုယ်တည်းရေရွတ်နေ၏ ။ " မင်အာ ၊ မင်းရွေးထားတဲ့ အဲ့ကလေးမက အရည်အချင်းရှိလားမရှိဘူးလားဆိုတာကိုတော့ သေချာမသိရသေးဘူး။ တကယ်လို့ သူမသာ ဖုန်းမိသားစုလက်ထဲမှာ ဒုက္ခရောက်သွားခဲ့ရင်တော့ အရေးပါတဲ့ တစ်စုံတစ်ယောက်ဖြစ်လာဖို့ အရည်အချင်းမရှိတဲ့သူလို့ ပြောရမှာပဲ ။ "