ထိုစကားများက အခန်းတွင်း၌ ရှိနေသူများအားလုံးကို အံ့အားသင့်သွားစေသည်။
ချွင်းနန်းတော် ? အဲ့ဒါက မင်းသားခုနစ်ရဲ့နန်းတော် မဟုတ်ဘူးလား ?
မင်းသားခုနစ်က ဖုန်းအိမ်တော်ကို အင်္ကျီတစ်စုံပို့လိုက်ပြီးတော့ အဲ့ဒါကလည်း ဖုန်းရှန်းရုန်အတွက်ပေါ့လေ ?
ဖုန်းရှန်းရုန်က ပါးစပ်လေးဟကာ ဆွံ့အလို့နေသည်။ သခင်မကြီးကမူ ဖုန်းရှန်းရုန်၏ကိုယ်ထဲ၌ ဖုန်းယွိဟန်၏၀ိညာဥ်များ ရောက်နေတာလားဟု တွေးနေလေ၏။
ရွှမ်ထျန်းဟွာက ဖုန်းယွိဟန်အား ကောင်းကောင်းမွန်မွန် ဆက်ဆံပေးသည်ကို အားလုံးအသိပင် ။ ထိုသည်က မင်းသားကိုးနှင့် ပတ်သက်နေ၍သာ ဖြစ်လေသည်။ သို့သော်လည်း ယခုတွင်မူ ဖုန်းရှန်းရုန်ကို အင်္ကျီတစ်စုံ လက်ဆောင်ပေးလိုက်တာတဲ့လား ။ ထိုသို့ဆိုလျှင် လူအများက ဘယ်လိုတွေးကုန်ကြတော့မလဲ ။
သခင်မကြီးက ခဏအကြာမှ အစေခံလေးကို ပြန်မေးသည်။ " လာပို့သွားတဲ့သူကရော ဘယ်မလဲ "
အစေခံလေးက ပြန်ဖြေသည်။ " ဂိတ်ကိုလာပို့ပြီး ပြန်သွားတာပါတဲ့၊ အိမ်ထိန်းဟယ်ကတော့ ကုန်းကုန်းတစ်ယောက်လို့ ပြောပါတယ် "
သူမ တွေးတာသာမှန်ပါက တော်၀င်နန်းတော်အပြင်တွင် မင်းသားများ၏နန်းတော်များ၌သာ ကုန်းကုန်းများရှိတာဖြစ်သည်။ သို့ဖြစ်၍ ဖုန်းရှန်းရုန်ထံ သိလိုစိတ်ဖြင့် မေးလိုက်မိသည်။ " သမီးနဲ့ အရှင်မင်းသားခုနစ်နဲ့က တော်တော် ရင်းနှီးကြတာလား "
ဖုန်းရှန်းရုန် ခေါင်းခါပြလိုက်ပြီး အမှန်အတိုင်း ဖြေပေးလိုက်သည်။ " ရင်းနှီးတယ်လို့ကို ပြောလို့မရပါဘူး ၊ ဒုတိယအစ်မနဲ့အတူ နှစ်ကြိမ်သုံးကြိမ် တွေ့ဖူးတာမှန်ပေမယ့် အရှင့်သားက ဒုတိယအစ်မနဲ့ပဲ စကားပြောနေခဲ့တာပါ ၊ အရှင့်သားက ဘာလို့ပို့လိုက်တာလဲဆိုတာကို ရှန်းရုန်လည်း မသိပါဘူး "
ဖုန်းရှန်းရုန်က ဖြေနေရင်းဖြင့် မျက်နှာရဲလာတော့သည်။ မည်သို့ပင်ဆိုစေကာမူ မင်းသားခုနစ်ထံမှ အင်္ကျီလက်ဆောင်ရတာဖြစ်၍ ရင်ခုန်နေမိလေသည်။
YOU ARE READING
ပဏာမ ဇနီးသည်ဖွား သမီးပျို
Historical FictionDivine doctor : Daughter of the first wife [ မြန်မာ ဘာသာပြန် ] Author : 杨十六 (Yang Shi Liu) English Translator : Spring Rain Translations Group Disclaimer : I do not own any part of this story. All credits go to original author and English Translator.