متمردتي المطلقة

الحلقة الأولى: أنثى بدون قيود

🩸متمردتي المطلقة🩸

بقلمي: أريا ستارك

🍁الحلقة: أنثى بدون قيود🍁

متمردتي:1
داخلة كيتسمع صدى خطواتها هزات راسها كتمعن فشكل معماري لقديم ديال هاد لقلعة، بتاسمات حيت كيعجبها هاد ستيل غوتيك ghotic قديم لي هو اسلوب معماري كانت معروفة بيه فرنسا بين لقرن الثاني عشر والسادس عشر، كيتميز بأسوار عالية وقبب مزخرفة، ولي زاد لمكان جمالية هو النقش اليدوي المغربي على الجص (كنقولو ليه لجبص على حساب كل منطقة) ونقوش على زليج الفاسي وتطواني وحتى النقش على لحجر ومنحوتات كتجسد لعصور لوسطى...
هزات راسها فقنات ديال سواري لي عاطييه طابع تاريخي، مستعملين الخط العثماني منحوث عليه أيات قرآنية كتحمي من لعين، تخيلات راسها للحضة هي لي دايرة لعرس هنا ضحكات باستهزاء من سخافة لفكرة، هزات راسها لفوق دفعات دوك افكار للور ديال دماغها مباغاش تبرزط راسها بأفكار سلبية، موجو ديالها فالحياة هو
**كل الإحباطات هي من صنع الذات ، يمكن للعالم الخارجي أن يدعونا إلى الشعور بالضيق ، لكننا في النهاية نقبل الدعوة**
تنهدات ورسمات ابتسامة على وجهها بصح فرحانة لخوها وصاحبتها ولكن سيرة زواج ديما كدخلها فاكتئاب...
كيقولو شخصية متمردة شخصية صعيبة تفهمها، عمرها دارت شي خطة وكملاتها ديما كتلقى لمشاكل او بالأحرى لمشاكل لي كيلقاوها، طريقة تفكيرها بسيطة نشرح ليكم بمتال:أي انسان عادي كيشد ورقة وكيكتب على سطر!! وملي مايبقاش فين يكتب كيرجع للسطر لي تحتو، اما بالنسبة لحنان سطر ممل علاش ماتكتبش بين سطور، فوقهم ولاتحتهم علاش تبع عقلية لقطيع لالا هي مغاتكونش بحالهم هي غاتكون مغايرة من جميع نواحي.. هادا كان تفكيرها من صغرها انها تكون ضد تيار تسير حياتها راسها تكون مستقلة بداتها.
بحال اي واحد باغي يبني مستقبلو حتى حنان بغات شهادة ولا ديبلوم ينفعها فحياتها...دوزات ربع سنين وهي كتحاول تاخد ديبلوم ديال عامين علاش؟؟ حيت تزوجات فاول عام قراية ليها ايه تزوجات بحبيبها ديال ليسي( اييه هايسكول سويتهارت كيما كيقولو) ومن مورا عامين زواج رجعات تكمل قرايتها...
لفشل طعم خايب بزاف وهي جرباتو خلاها تكون عندها رغبة فالنجاح فحياتها على اقل حياتها دراسية ولا لمهنية اي نجاح يعوضها على اول فشل فمسيرتها...
**كيقولو لغدر ماشي هو غدر الأعداء، ولكن غدر ناس لي فتحتي ليهم قلبك وسلمتيه ليهم **

الحاضر
واقفة قدام قاعة الأفراح كبيييرة راقية اي وحدة تشوفها تجيب ليها رغبة فالزواج بطبيعة لحال كلشي إلا حنان...
واقفة كتفكر حتى فيقها صوت صاحبتها: عرفتي هاد قاعة تبنات ف1834 تاريخية دكشي علاش ديكورها بحال هاكة دكشي لقديم وهاد زخرفات فصقف ولحيوط محفورين بليد، عندها طابع خاص كتخلق جو رومنسي بحال عايشة يامات روميو جولييت
حنان هزات راسها فيها وهي شادة كتابها لي ماكيفارقهاش: فراسك بزوجهم ماتو؟؟ ماعرفتها رومنسية ولا فيلم ديال خلعة..
علياء نخلاتها بحال مادواتش: عرفتي قالك حفيدة ديال كيت لي متلات مع ليوناردو ديكابريو تيتانيك عرفتيها؟؟
حنان: تيتانيك وي عرفتها
علياء وقفات وشافت فيها: وا كيت عرفتيها؟؟
حنان: اه عرفتها كان جامعني معاها غير شريب اتاي خيطي بيطي عند بعضياتنا...  تي فين غانعرفها انا من نيتك البشر؟؟
علياء: تفو على صحبة كيدارة زعمة راه عرسي خاصك ديري ليا خاطري يخزيت..
حنان تنهدات: مال ديك ختنا؟؟
علياء فرحات وشدات ليها فدراعها: حفيدتها دارت عرسها هنا
حنان كتحاول: واو بصاااح
علياء: والله واخة صدقات مامزوجاش هرب عليها لعريس
حنان صفقات: ييييس هادي هي قاعة لأفراح لي خاصك ديري فيها لعرس مكاين غير تشاؤم ديمهم قصص كئيبة حقة ماحقة في سبيل لحب مراض هادو
علياء رجعات خنزرات: نتي في سبيل طاكوس وقرعة سبرايت تبيعي حبابك ولكلوة ديالك
حنان: نزيدهم كبيدة كاع الكبيييدة
سمحمد تسمع صوتو من موراهم خلاهم دارو بزوج بزربة: ودابا يجي يالكبيدة ودابا يجي!!!