متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الرابعة عشر: بين الشوق والنسيان 😷

متمردتي: 7

دوزات نهارها كلو نعاس كتفيق تاكل وترجع ونيت كتنعس بحال وقت طويل مانعسات، حتى وصلات طناش ديال ليل عاد خرجات من سريرها لابسة بيجامة كتمنى مايكونش رائد لي بدل ليها واخة عندها إحساس غايكون غير هو.
لبسات بينوارها وخرجات مشات لكوزينة قلبات لفريكو لقات أيس كريم هزات معلقة وبقات واقفة كتاكل فيه..
رائد واقف مقابل معاها من جيهة لأخرى: بركي بعدا وكولي ممنوع علك إرهاق لمدة تلت يام على أقل 
كملات ماكلة ديالها ودارت ليه اشارة بيدها بلا فهمات أما رائد فمقابل حركاتها متحركش من بلاصتو كيشوف فيها أخيرا لقاها مابغاش تبقا تغيب على عينيه..
هزات راسها كتشوف فيه قرب ليها بزاف رجعات بلور حل رائد بلاكار حدا راسها خلاها قفزات هز كاس منو ورجع بلور للتلاجة هز عصير كب ليه: فيك جوع مزال؟!!
فعلا تحلات ليها شهية وجوع لي فيقها من نعاس، رجع للتلاجة وهز زوج بواطات لولة شربة دارها تسخن فكسرول صغيرة وجبد سطيك من لاخرى  كيطيب فيه فلمقلة بقات حالة فمها من لي جبد بواطة اخرى فيها بروكلي مع خضرة اخرى طايبين غير سوطاهم فوق مقلة: مافقتيش وقت لعشاء قلت نخليك تاتفيقي ورجعي معاك داك ايس كريم
تفكرات لي فيديها لقاتو نيت ذاب شمت ريحة لماكلة هزات راسها فيه شاد لمقلة وكيحركها بشكل دائري مركز مع كل حاجة تفكرات مكالمتها قبل ماتنعس هاد لعشية مع علياء وسيمو..
#فلاش باك
سيمو معصب: ولكن هادوك ماشي فعايل ديري، غير تهزي راسك وتزيدي ومتعيطيش لينا وتمشي عند واحد غريب تسكني عندو؟!! واش هادشي عقلاني عندك؟ ديال وحدة مزوجة وبعقلها
علياء بعفوية تاهي دخلات فاللومة كل مرة على حاجة: بغيت غير نفهم نتي لي عزيز علك تهضري وتحلي مشاكل بعقلانية غير بلحوار هو لول...نضتي هربتي؟؟ علاش مافهماش؟
بكل عصبية:شحال من مرة غانبقا نقوليكم باااش عرفتها انا كدابة؟ وماحملاش منو؟ بحال أي واحد بلاصتي تصدمت غير انا تسرعت وخرجت مقدرتش نسمع منو شي كلمة تجرحني وتهرسني .... الماضي ديالي خلاني نقول بلا تقولبت ثاني
علياء: مابغيتيش تجرحي ولكن فضلتي تجرحيه وتهرسيه هو! ... سمعي انا غانقولها لك بلا زواق! نتي لي خربقتيها من لي هربتي بنتي فأول مشكلة واجهكم هربتي وخليتيه.
سيمو:رائد دوز هاد ليام عَيش فطوموبيلتو حاضي ديك سوبرماركت وكيتسناك نتي ولا عادل تبانو...ماستسلمش وفعلا مارجع حتى جابك معاه
حنان بعصبية: دابة أش بيتيني ندير نمشي نعتاادر متلا؟؟
علياء نقزات: ومالها اشنو فيها غلطتي عتارفي وعتادري.
رجعات للواقع برائد كيدوز يدو قدام وجهها كيحاول يرجع انتباهها ليه: هيهوو!! حنااان!!
رجعات بلور قافزة: نعام نعام هاني نعام
نعت ليها بصباعو للماكلة فين محطوطة فوق طابلة كيمسح فيديه وغادي فاتجاه بيتو: كولي ورجعي رتاحي
حنان وقفات بزربة: إمتى ندويو؟
رائد وقف فطريقو ورجع شاف فيها لونها مخطوف غير بلخلعة ماعرفش مناش خايفة: من لي تولي لباس وصحتك اونفورم نهضرو
معرفاتش باش تحس واش بلإهتمام حيت مدايها فيها وكيطيب ليها ولا تكعى من برودو من جيهتها وكيفاش كيتفادى أنو يبقى فنفس لمكان معايا مطولا..
كلات عشاها وناضت لكلوار راجعة لبيتها عاد لاحضات بلي حطها فبيتها دخلات تجري قلبات بلاكار ديالها لقات حوايجها لي كانت دات لبيتو وخلاتهم فلماريو عندو، وريحتها لي خلات فبيتو كلشي جابهم ليها هنا...
وقفات شحال كتشوف فحوايجها معلقين فبلاكار: مممممم باغي دير فيها نتا لي عندك لحق وبنادم كلو غلط؟؟ كون ماكنتيش كل نهار فمجلة مع بنت فشكل مانشكش وكارمن علاش عارفاك فين ساكن اشنو كان سبب؟؟ (غير فكرة أنه شي حاجة كانت بيناتهم كتعصبها وتفقصها).. دابة نشوفو شكون غايربح فقصوحية راس