متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الثانية عشر:الحجر تحت سقف واحد  😷

متمردتي:8

حنان بزعفة: لعلاقات ماكيخدموش فحال هاكا!!
علياء: بلعكس معاك نتي جميع طرق مباحة كون مدارش هاكة غاتبقاي دافعة كبير
حنان خرجات عينيها: انا دافعة كبير؟؟ فين عمرني
علياء قاطعاتها: حبسي حبسي قبل ماتبداي ايه نتي صحبتي وختي فيك عياقة وكترة لهضرة ونفسك حارة ومن لي كتكوني غالطة مكتعتارفيش بيها
حنان هنا وقفات معصبة: فين عمرني ماعتارفتش بغلطي
علياء: دابا من لي عاودتي ليا ومقلتيش بلي مكانش علك تقمعيه من لول وبلي كان علك تعطي لراسك وليه فرصة
حنان: ولكن انا ما باغة تاحاجة
علياء: بلي ماباغة والو لاش معيطة ليا؟؟
حنان بدات تعصب كتر: كنت معصبة ودابا زدتي عليا
علياء: كعيتي حيت عارفة عندي لحق كون كنت غالطة غادي تكوني كتسخسخي فيا دابا ولكن لا تعصبتي وغادي تقطعي عليا حيت كلامي صحيح نتي كتبغيه وديما كان كيعجبك وكتقصحي راسك حيت مباغاش تجرحي ولكن مكتفكريش فيه هو أنانية شوية هادي منك ومن لي غاتعيقي كنتمنى مايكونش فات لفوت...
فعلا قطعات لاپيل ولكن ناضت معصبة غادة جاية فلكوزينة دورات نمرة اخرى وغير سمعات صوتها رتاحت وبتاسمت من قلبها، هادا هو سحر لأمهات ديك طمئنينة لي كتدفي لقلب من قساوة لأيام...
حنان: ماماتي توحشتك
مليكة:سلام عليكم بنيتي حبيبتي
حنان حشمات ديما كتفكرها فصواب وتحية لي خاصها تكون هي لولة: عليكم السلام ورحمة الله وبركاته ماماتي بغيت نرجع بحالي
مليكة: مالك أبنتي ياك لباس؟؟ رائد مامهليش فك؟؟
حنان: اجي واش كاين شي أم تخلي بنتها مع دري بوحدهم؟؟ ياكما انا ماشي بنتك ومربياني
مليكة: فحقيقة لقيناك حدا واحد جامع ههههههه
تسمع صوت فريد: بعدي ليا من بنتي تعصبيها لينا
مليكة حيدات تيليفون من ودنها: ونت أش ضرك ياك وليدي رائد لي غايوحل فيها
حنان: ماما واااا ماما انا لي بنتك جي مني
مليكة بكل جدية: حنان لماضي خاصك تنسايه ديك شخصية قوية لي كتبيني ليا عارفاك منفوخة عال خوا كون كنتي قوية تجربي تحلي قلبك للناس جديدة بحال نقاشة فلعرس لي ولات صاحبتك دخلي ناس أخرين
حنان بركات فلأرض وتنهدات: كتهضري على رائد؟؟
مليكة: ابنتي لواحد كيبغي من قلبو ولكن مكاينش قد لي كيقتل هادشي من غير قلة اهتمام غادي يهز راسو وشوف بنات أخرين باش ينساك
حنان: عادي يدير لي بغا انا مالي
مليكة: راني مك زعما وكتخرجي فيا عينيك؟؟ وتكدبي
حنان: فين شتي عينيا من هنا؟؟
مليكة: نجي لمك نوريك كيفاش عرفتك مخرجة عينيك؟؟
حنان: هههههههه صافي صافي مسامحة
مليكة: دوي ابنتي مع لولد من زمان ونتوما صحاب عل اقل دوي معاه بحال ناس لمتحضرين
حنان سمعات نباح:روكووووو توحشتو كيدير معاكم
مليكة: لكلب بل كلب ماكيخاليني نعس تانخرجوه
حنان: هههههههههه بوسيه ليا
مليكة: لواه على بوسيه ليا نقدر لوضوء انا على قبلك؟؟
حنان: هههههه ولهيلا توحشتك اماما واش لباس بعدا هانين
فريد خدا تيليفون: ماتخافيش على ماماك راني معاها وعندنا دراري لي يتسخرو لينا مكنخرجوش ولي بغاتها كتحضر ومكنخرجهاش تايدوز هادشي بسلام ان شاء الله ورفع علينا الله هاد لوباء
حنان: امين أعزيزي أمين خليت ليكم الراحة