متمردتي المطلقة

بقلمي: أريا ستارك

🍁الحلقة الثانية: الملكة دائما تصنع من الألم قوة🍁

متمردتي: 4

داخلة للدار كتحاول تبين فوجها بلا راه مدارت والو ولكن واخا هكاك فقلبها خوف لا مثيل لو، فارقات باها ودابا غاتفارق دارهم لي عرفات طول حياتها و لكن معرفاتش إمتى واش ليوم ولا غدا ولكن داك نهار جاي وقريييب، تنهدات وكرزات يدها على لميكة لي فيها لفطور كرواصات مسمن بطبوط ولحليب وقرعة ديال قهوة وكاع دكشي لي غاتحتاجو تلاقات بعمتها فوجهها.
لطيفة مخنزرة فيها: فين كنتي نتي؟؟
حنان هزات فيها راسها بزز ووراتها ايديها لي عامرين بلاستيكات بالتقدية: مشيت نجيب لفطور
خنزرات فيها وعطاتها بالظهر: ايوا دوزي عمري لبرارد ديال أتاي راه شوية يبداو يدخلو ناس... فهامة ديال والو باش تقادي سواني وتخلي داكشي مقاد عاد تخرجي تقداي جايبة لفهامة من لور بحال مك لكلخ كيجري فالدم.
حنان مجوباتهاش حدرات لعين ودوزات نهارها معاهم ناعلة شيطان وداخلة سوق راسها، ولغد ليه حتى فاقت على صوت لغوات هزات تيليفون بزربة دورات نمرة هي لولة هضرات بزربة وهي كتلبس فجلابتها ومشات تجري عند ماماها وخوها لقاتهم فصالة معنقين بعضياتهم باركين فلأرض وسيمو معنق مو ومخنزر فعمو لي واقف قدامو واخا باقي صغير حاس وعارف، شافت فلارض لقات حوايجهم وصيكانهم مليوحين لوسط حداهم  ولعائلة لكريمة كلهم واقفين كيسبو فيهم حيت ملقاوش الذهب اما لفلوس راهم كشطو لكونط ديال باها...
حنان حلات لباب ديال دار هو لول عاد رجعات عند مها حيت عارفاهم غايتحماو عليهم وهي بغات تخرج بأقل خسائر معنوية.
حنان وقفات قدامهم وحلات يديها مخابياهم موراها: تاحد مايقرب حداهم والله ولي يقيسهم تانطيح ليكم روح هنا.
عمها زوج سميرة لمختار: خرجي تقودي علينا نتي وياهم
شدها من دراعها كيجرها بانت ليها عمتها غادا لعند مها وهي دفع عمها ومشات كتجري وصلات لعمتها مع يديها تحطو على راس مها باغا تنتفها وهي كتغوت عليها: فين ذهب خويا هاديك بنت لحرام يا بنت زنقة.
حنان شداتها من دراعها ودفعاتها: حدك تم ولا سنانك نحسبهم لك وجمعي فمك ماما أشرف منكم كاملين
مشافتش شكون ولا إمتا حدها حسات بضربة لكرشها حتى طاحت لرض كان واحد من عمامها لاخرين بوطها برجلو مع كيتريني بلخفة ديالو مشافتوش.
ماماها وخوها على ركابيهم غادين لعندها فين طاحت عنقوها بزوج جابوها لعندهم وهي تدفعهم من وراها ووقفات بزربة واخا كتألم.
حنان بعينين كلهم دموع بقلب مجروح وصوت باح: نتوما رجال نتوما لي كتعداو على مرات خوكم وولادو
يالاه غايصرفقها عمها وهو يتحل لباب دخلو ولاد درب كيجريو حيت عيطات لواحد فيهم قبيلة ملي سمعات لغوات عرفاتهم غايعونوها ودكشي علاش حلات لباب، هي كانت من نوع لي ضريفة مع كلشي ومحبوبة عند كلشي وخصوصا معاذ لي كيقرا معاها وكيعجبها من صغر داك ولد جيران لي كتكبري معاه وكيتسلل لقلبك بشوية بشوية دخل هو لول كيجري وقف قدام عمها ودراري صحابو دارو بيهم وعاد شمكارة ديال درب لي ماكينعسوش هادوك ديما كيوقفوها فالزنقة تعطيهم درهم وديما كتعطيهم دكشي علاش عزيزة عليهم...
عائلتها بقاو غير كيشوفو متوقعوش هادشي مكانوش عارفين بلا تاهي كانت كتوجد ليهم واخا غير باش تحمي راسها منهم.
معاذ:كتمد يدك على بنت خوك
عمها نفخ صدرو وزاد قدام وقف فوجهو: وانت أش دخل ديمك لدارنا خرج تقود ولا نخلي ضاربوك
معاذ كان دري طويل ورقيق مايقدرش يدافع على راسو قدام عمها ولحسن الحظ كانو بزاف ديال ناس مايقدرش يضرب كلشي دخلات وحدة من الجيران وقفات مع ماماها وبداو دراري كيهزو فصيكان وكتسمع صوت عماتها كيعيرو وكيغوتو وكل مرة وحدة فيهم تبغي تلاح على ماماها تاخرجاتها من تم...داك نهار واعدات راسها تكون ديما فرحانة ديما ضاحكة ومعمرها ماتوري لبنادم ضعفها ولا دموعها...

بس: يتبع غدا البنات بليز شاركونا أرائكم وجيماتكم، بغيتكم ديرو اشهار للقصة باش طلع عند صحاباتكم ولكروب راه ديالكم ديرو لي حبيتو... موعدنا يوم الإثنين