متمردتي المطلقة

🩸متمردتي المطلقة🩸

بقلمي: اريا ستارك

🍁الحلقة الحادية عشر: بعض الأحلام تتحقق🍁

متمردتي:5

حنان كتفيق بتيليفونها كيصوني وبزز كتحل عينيها ضرها ظهرها لبارح بتزلج على لجليد عشية كاملة وهي فمركز روكفيلر دابا كتسمع تيليفونها بحال فقاع لبير عضامها مدقدقين...
هزاتو وجوبات قبل ماتشوف شكون: وا حلي لباب
رجعات تيليفونها من ودنها وشافت فيه بحال تسكن حاولات تشوف مبان ليها والو عينيها باقين مضببين سدات وحدة وحاولات تشوف بلأخرى والو رجعات تيليفون لودنها وهمسات كتحاول تأكد من لي سمعات: ألو!!؟
رائد بنفاد صبر:واحلي لباب احنان
حنان وقفات فوق سريرها بزربة حتى داخت ورجعت بركت:هاااا؟ رائد؟؟ أشمن باب انا مكايناش فدار... كيفاش نتا..!!
رائد قاطعها ودق فلباب بجهد: هاد لباب احنان هاد لباب حلي خلاص
حنان ناضت تجري للباب حتى قربات وهي ترجع تجري لسرير هزات بينوار لبساتو فوق من بيجامتها لخفيفة وسدات ليه لحزام عاد تحركات بزربة حلات لباب وهي مزنگة وسخفانة: رائد اش كدير هنا؟؟
رائد دخل وسد لباب ومشا ديريكت للتلفازة شعلها : شحال ماتفرجتي فلأخبار نتي؟ ولا دخلتي لإنستغرام گاع؟!!
حنان ربعات يديها بعصبية: ملي جيت لهنا بغيت ندوز عطلة زوينة بعدت من أخبار لكئيبة وحتى تيليفون خديت منو عطلة...
رائد وقف وشاف فيها: عشر يام ونتي هنا راه بزاف لحوايج تبدلو.. اول حاجة لحجر هنا غايتشدد شوية وغايسدو لي ريسطو فين غاتاكلي؟؟ وثانيا هاد لي أوطيل تاهوما غاسدو وفين غاتبقاي؟؟ ...
حنان: غانمشي لفلوريدا أصلا قطعت لبارح
رائد: لا مشيتي لتم غايحبسوك 14 يوم فلكوارنتين وأصلا مرض داع دغيا هنا خاصك فعلا تردي لبال ولمغرب تاهوما سدو لحدود لبارح فليل...
حنان خرجات عينيها وطلقات يديها لي كانو مربعين هزات راسها فتلفازة على شاشة كاتبين عدد لإصابات ليومية ولوفيات: كيفاش حدود مسدودة على كلشي؟؟
رائد: وي لمغرب سدات لحدود باش يسيطرو على الوضع ولوطيل هادا غايكونو دابا كيعيطو للناس يعلموهم بلي خاصهم يسدو...دابا توصلك نوبتك
حنان: لالا مايمكنش زهري تال هاد الدرجة منحوس؟؟ لا لا لا
واقفات مقابلة تلفازة ورائد حداها حاط يدو على دقنو كيفكر ف شي حل...
حنان عينيها مغرغرين: دابا اشنو معمول؟؟ حصلنا هنا ولا شنو؟؟
رائد: عيطت لشحال من واحد ممنوع طيران بصفة عامة ولحدود ديال بلدان بزاف تسدو تاحد مايقدر يدخل ولا يخرج...
حنان بتوتر غادية جاية : ولكن خاصني نرجع نكون حدا ماما عل أقل ولا مرضات بهاد لعجب الله ينجيها... وحتى سيمو ماكاينش كيفاش يرجع هو وعلياء اا لا لا لا خاصني نلقا حل
رائد شدها من كتافها ودورها لعندو : ماكينش لحل احنان خاصنا نبركو نتسناو بحالنا بحال ناس .... هاد لمرض مامعروفش وباقي غريب علينا ماعندك علاش تخافي على ماماك دويت معها فطريق قالت ليا غايبقاو راسهم غير فدار وغايردو لبال متخافيش عليهم
حنان : لالا واخا نعرف ندير لي كان مهم نمشي..
رائد: اشنو عندك ماديري متلا ضربيها سباحة عل ظهر ولا فراشة؟؟ حنان ديري عقلك حنا هنا فآمان خاصنا نتسناو لمغرب يحلو للحدود باش نقدرو نرجعو للبلاد...انا أصلا من ورا عرس سيمو وانا هنا عندي داري فlang island لونغ ايلند اي لجزيرة طويلة ههه.
حنان غادة جاية فشومبر معرفات مدير: لالا لا غايكون كاين حل ضروري نلقى حل ... سيمو لي عيط لك ياك عطاك لوطيل فين باركة وكلشي قوليه مايخافش أنسلك راسي
رائد تعصب: دابا فبحال هاد لأزمة اش عندك ماديري؟؟ راه غير خوك وماماك مخلوعين علك اما گعما نجي نصدع مخي معاك وهاد قصوحية راس ديالك
حنان كتغوت عليه بكل عصبية:حتى دابا باقي لحال سير فحالك اش كتسنى؟؟
رائد ماطة ليها تيليفون مدوز نمرة ماماها كيصوني: نعيطو لشاهد لي بيناتنا؟ تعقلي داك نهار قلتي ملي نبغي شي حاجة غادي تقولي اه وحلفتي وماماك شاهدة!!! دابا نعيطو ليها تشهد علك كتقولي لا ومن فوق هادشي هي لي مخلوعة علك ومعندك فين تمشي...غاتبقاي مقصحة راسك غاتجيبيها فراسك ولكن لقرار قرارك...

#تصبحون على خير غدا ونحط بحال هاد لعدد ديال أجزاء ان شاء الله ولكن شاركوني فهادشي لي جاي أشنو بان ليكم فلأحداث ديال دابا؟؟