متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الثانية عشر:الحجر تحت سقف واحد  😷

متمردتي:2

جرات كروسة قدامها ورائد جار وحدة قدامو من لي دخلات لمحلات لقات تنظيم ماتخيلاتوش يكون... ممر مواد التنظيف لي فيه لمعقمات والكحول مكتوب فوق منهم بلي ممنوع تشري اكتر من زوج، حتى من الأدوية خصوصا لمسكنات ودوا ديال برد غير مسموح تشري أكتر من واحد من كل نوع...
رائد لحق عليها كيقلب على بابيي جينيك: واو دنيا خاوية مخلاوش رولو واحد
حنان وقفات حداه كتشوف رفوف خاوية قالت بصوت شبه مسموع من تحت لماسك: وراه بنادم كيموت يالاه نشريو بابيي جينيك عل اقل نموت وترمتي نقية تفو على عقلية!!!
رائد هنا تفرگع بضحك حنان خرجات عينيها فيه: سمعتيني؟؟ قلتها بصوت عالي؟؟
رائد تيحاول يحبس ضحكة: يالاه نسربيو قربو يسدو
حنان بتاسمات من ضحكتو ويالاه غاتحرك بان ليها واحد برا بكمية كبيرة من بابيي جينيك خلات كروسة حدا رائد ومشات تجري: هاني جااااية...
خرجات عند دري لي واقف برا كيحل طوموبيلتو لحوار بالإنجليزية: سمحلي ممكن نسولك؟؟
شخص: يااس بيوتيفل
حنان: منين يمكن ليا نشري بابيي جينيك؟؟
شخص: انا نبيعو لك
حنان: اوكي شحال؟
شخص: عشرين دولار للوحدة (علما أن مجموعة من ربعة رولوات كدير تلاتة دولار)
حنان بعصبية هضرات بالدارجة: أشنو زعمة هاد بابيي جينيك كيتسناك تخرا ويمسح ليك بوحدو ولا من لي كتستعملو كتولي تخرا ذهب متلا؟؟؟
شخص لي قدامها بقا حال فمو عاد ضحك ديال بصح : هههههههههههه مغربية ههههههخهخههخخخخ ناري هربتيني الأخت ههههههههههههههههه نعطيه لك فابور الله ياودي ولاد لبلاد هوما لولين
حنان عاد زادت خنزرات: وماحشوماش ترزي بنادم ففلوسهم وعاد كتشطب دنيا باش بنادم أخر مايلقاهش؟؟؟
شخص: لا أختي نتي معارفا والو هادي زوج سيمانات وانا خارج من لخدمة بسباب هاد لوباء سدو ومعنديش لمدخول وباقي ماصايبتش لوراق عاد لواليدة فلمغرب أنا لي كنسيفط ليها وعلى قبل لميمة ندير اكتر من هاكة
حنان بتاسمات بحزن: تانا حصلت هنا جاية غير توريست
شخص: ايلا معندكش فين تبقاي واخا كاري غير ستوديو مرحبا اختي واللهما تخافي حنا ولاد ناس وولاد للبلاد
حنان بتاسمات ليه ويالاه غاتجاوبو شافت عينيه شافو من وراها وقرن حجبانو: هاداك خونا مالو حاضيك واقيلة نبقا معاك حتى تاخدي طاكسي؟؟ ولا..
حنان قاطعاتو من لي ضارت وشافت رائد واقف حدا طوموبيلتو ولكروسات كلهم ميكات: لالا هداك صاحب خويا جاب الله كان هنا هو لي غانبقا معاه
شخص جبد ورقة من طوموبيلتو وستيلو وكتب نمرتو: هانتي أختي واخا على قد لحال ولكن لاوقعات شي حاجة  ولا حتاجيتي شي حاجة غير عيطي ليا ونجي نعاون باش مكان
حنان: شكرا بزاااف  وممكن تعطيني شي رولوات نخلصك فيهم والله
دري هز ميكا كبيرة وعمرها: هاكي اختي واللهما نشد شي ريال
حنان: الله يحفضااااك شكرا بزاف
دري: دعي ليا غير مع لواليدة يطول فعمرها تانزل نشوفها
حنان: غاتكون راضية علك راك الله يعمرها دار وعرفات اش ربات
هادي كانت غير نبذة من كرم المغاربة لبعض فالغربة وكيما ديما جميع شعوب فيهم لخايب وزوين غير حنا كنبغيو نركزو على لي يسلكنا...
رائد شاف فيها ونعت للميكة واخا شافها خدات ورقة فيها نمرتو قرر مايتدخلش: شحال خلصتي؟؟
حنان بتاسمات: دري مغريبي صدق ضريف وحلف لاتخلص
رائد: ممممم اوكي
حنان نسات راسها: اش كنتي غادير بلا بيا؟؟ تمسحها بلحجر ههههههههه
رائد هز حاجبو: شكون هي؟؟
حنان بتوتر : ههههخ تقدينا بزااااف واو
رائد تنهد: ومزال نمشيو للدار خاصنا نعقمو كلشي ونغسلو الخضرة
حنان: ايوا شوية غانعومو دجاج ونديرو لو ديميلور
رائد: أشنو هاد ديميلور شي نوع دمعقم؟؟
حنان: لا برودوي كيحيد تجاعيد
رائد شاف فيها بتشكيك هز كتافو وطلع طوموبيل من بعد مادخل سلعة لي شراو...