متمردتي المطلقة

🩸متمردتي المطلقة🩸

بقلمي: اريا ستارك

🍁الحلقة العاشرة: عقد قران وعقد إنكسار🍁

متمردتي:8

ليوم نهار فرحة علياء كتحس براسها طايرة وسط سحاب أخيب شعور كانت كتكره هادي سنين هو من لي كتقول باي لسيمو وكل واحد كيمشي لدارو، كانت كتمنى أنه يكون هو دارها فينما كان تكون بجنبو وليوم تحقق حلمها، من ليوم عمرها تفكر إمتى غاتشوفو ولا إمتى غايرجع من ليوم رجلها على رجلو...
هزات راسها فلمراية مبتاسمة لإنعكاس صحبتها وختها لفرحة فعينيها مكتوصفش تنهدات من قلبها وعاد رجعات شافت فراسها، علت السعادة ملامحها وبتسامتها لكبيرة لي مرسومة على محاياها زادتها جمالية كتحس بيها خارجة من قلبها، هزات يدها ببطء ونكافة كترجع ليها خواتمها وعاد هزات براصليات كتسدهم ليها وكتقاد ليها تاجها فوق راسها...
علياء: كنحس براسي شي ملكة ههههههه
حنان: نتي راك ملكة فعيون اهم شخص فحياتك
علياء بتاسمات كتر: هههه بشاااخ على كلام لكبييير فين صاحبتي اش درتي ليها
حنان قربات ليها وشدات فيديها: فورماطيتها وعاودت ليها سيستيم
علياء: حيدتي ليها شوية لعناد؟ راه قهراتني هههه
حنان باستها فحنكها بلخف وحسات بنكافة ضربتها لضهرها: قلنا بوسان ولبكا لا ...ولا راه غانمنعك مادخلي لهنا
حنان: حاضر شاف! ساطة مهم نتمنى لك كاع دكشي زوين وشي لاخر راك عارفة وتوصلي لقمة لألاعيب وراك عارفة
علياء رمشات عينيها: يالاه قلنا لكلام لكبير كدبتيني فلبلاصة اش هاد لجملة لغير مفيدة؟!!
حنان عنقاتها وبتاسمات: غاندوي غانبكيو لاهوما خليها تال غدا وأرا مانبكيو
علياء: اوكي تافقنا
نكافة: هادو واش مسطيات؟؟ كيتافقو على رونديفو باش يبكيو هادي اول مرة نشوفها ...
                                   ********
كيف ما كيقولو عرس ليلة تدبيره عام ولكن عند لبنات كان سنين وسنين ديال تخطيط من لي كانو صغار وحضرو لعرس مع بعضياتهم بداو كيخططو وكل عام خططهم كتقاد كتر وكتطور نهار على نهار... كتاب من بعد كتاب كانو كيلصقو فيه تصاور تكاشط ديكورات وحتى انواع ذهب وأشكالو...
دخلة لعروس من اهم حدث فلأعراس ودائما لعمارية هي أحسن بداية للأفراح، كيختالفو ناس فأصل لعمارية شي كيقولو بلي كانت من تقاليد لأمازيغ قبل مايدخل لإسلام وشي ناس كيقولو بلا ليهود لمغاربة هوما لي دخلوها من لأندلس، أما تقاليد فهي لي كتقول ليوم من فوق لعمارية بلا حمل هاد لعروس وطواف بيها وسط لمكان والناس كيوصل مساج واحد وهو، منزلة لعروس فوق ريوس لحاضرين حيت هي ملكة لحفل بدون منازع وهي مركز لإهتمام لذلك كاع لعينين خاصهم يكونو عليها..
حنان كتشوف لعمارية لي طلبات هي لي كاينة قدامها بتاسمات كتبان كيما كانو رسموها وهوما صغار وفعلا إستوحو لفكرة من مسلسل تاريخي عثماني؛ هودج لونو مزيج فضي وذهبي مرصع بأحجار ألوانها متناسقة بشكل أنيق، علياء فوق منها كتدير إشارة لناس بيديها وهي مبتاسمة وكلها سرور لابسة تكشيطة بيضاء مخدومة بالصم ذهبي مرصعة هي لأخرى بأحجار صغيرة زادتها جمالية بيها دخلات كتحيي لمعجبين وكتشكر لحضور...
حنان غادة بجنبها بلباسها لأنيق تكشيطة فلون ذهبي غامق فوقها سلهامها لأخضر لي مخدوم بلون تكشيطة سامبل لي تحتو، مزينة حلتها بمضمة كتجمع بين حزام أخضر وذهب خالص كتزيين، هازة فيدها شبكة ذهبية فيها طرز بلأخضر وسطها ورد بلون ابيض وأصفر كتلوحهم فلهواء قدام لعروس ومرة مرة فوق لعروس وفعلا كتحاول تعميها مرة مرة بكل شر ههههه