متمردتي المطلقة

🩸متمردتي المطلقة🩸

بقلمي: أريا ستارك

🍁الحلقة الأولى: انثى بدون قيود
متمردتي: 8

رائد رجع عينيه على طوموبيل ديال حنان لي ياله خرجات من باركينغ بخطوات سريعة مشا لموطورو هزو وتبعها...
حنان فطوموبيلتها رجعات بيها داكرة لور...
#فلاش_باك
راجعة من ليسي فعمرها 17سنة غادة حداها علياء من جيهة ومعاد صديقها وحبها الأول كل مرة كتشوف فيه بنص عين وصلات لدربهم، ياله غاتهضر حتى جات كورة لمعاذ فصدرو خلاتو كيكحب، دارت شافت شكون ضرب وخنزرات ومشات عندهم بخطوات سريعة ومعصبة...
حنان شدات خوها من دراعو: شكون شير عليه بلبالون؟؟
سيمو: طلقي ماشي انا
رائد وقف قدامها فنفس طولها واخة صغر منها بتلت سنين مخنزر:انا لي ضربتو
حنان ربعات يديها: وعلاش؟؟
رائد: مكنحملش ديمو
حنان: معرت مالك كبرتي وتبرهشتي؟ غانمشي نقولها لمك
رائد شاف فمعاذ: متبقاش تمشى مع حنان ياك نتا راجل واسير مع رجال لاش لاصق فلبنات
معاذ جاي غايضربو وقفات ليه حنان فطريق: تسطيتي دري باقي صغير
معاذ: حايدي من قدامي اشمن صغير هو قدك فطول
حنان حطات يدها على صدرو وحسات بسخونية طلعات معاها: لا ماديرش فيه راسك باقي صغير
رائد: طلقيه نشوفو رجلة ديال جدريال
سيمو: رائد صافي اصحبي أجي نكملو لماتش
رائد راجع مع سيمو وكل مرة يدور يشوف فيهم: ختك غاتقولب لابقات مع داك خونا
سيمو خنزر: جمع راسك اصحبي لخوادرية مامصاحباش معاه ومكتصاحبش واصلا داك قمقوم كيجينا من لعائلة ديالي جدي هو لوحيد لي ماشي بحال داك لقوم وكان ديما كيجي يسول فلواليدة ويتسخر ليها
رائد: عارف ولكن داك ولد لق*** غادي يقولبها والله
علياء دازو من حداها وهي ضرب رائد: صلح فمك اش هاد لهضرة كتقول
سيمو شاف فيها بكل حب: مرتي
علياء: غانضرب ديمك البرهوش
سيمو: راك كبر مني غير بعام وحضاشر شهر ماشي شي حاجة
علياء: بقا تحلم
سيمو جر رائد: ياله اصحبي نترينيو نوليو لعابة ديال كورة محتارفين باش نتزوج بعلياء...
عند معاذ لي معصب: حنان ماتبقايش دخلي بيني وبين دراري شغلي هداك نخلي داربوه لبرهوش نربيه
حنان: راه باقي صغير ويلي مديرش فيه راسك
معاذ: مرة خرا دخلي سوق راسك انا راجل انا لي كنقرر منبغيش برهوش اخر يدوي معاك
حنان تزنكات: راه غير دري صغير
معاذ لقى لفرصة لي كان باغي شد ليها يديها: تال من بعد وندويو ولكن من ليوم ماتشوفي فشي دري ولا تهضري معاه فهمتيني؟؟ كنغير علك بزاف
حنان حدرات راسها ولعصافير كيلعبو ليها فلمعدة وحنيكاتها ولاو حومر حدرات راسها طلعاتو وهبطاتو بمعنى واخة وشدات فعلياء لي جات حداهم...
#نهاية_فلاش باك
حنان ضربات يدها مع لفولو: وديمي كنت مكلخة كنآمن بالحب والخزعبلات...
وصلات للمطعم ودخلات لقات شخص لي دايرا معاه غداء عمل وقفات قدام طابلتو: موسيو منير لعماري؟!
منير وقف: مدام حنان الحريري
حنان عاقت بلبلان بحال باغي يجس نبض واش راه مزوجة بابتسامة مزيفة: آنسة بليز
منير كان مبتاسم وهو يجمع ضحكة وشاف حداها باستفهام، تبعات عينيه لقات رائد واقف تم مبتاسم بنيفو لي منفوخ..
رائد مطا ليه يدو: رائد الودغيري
منير حال فمو: واش نتا نتاا؟؟
رائد مبتاسم: وي هو انا وصديق طفولة ديال حنان
شاف فيها مبتاسم وهي دير ليه اشارة تشدو دبحو وعاضة على شفايفها، وهو بكل برود شاف فشفايفها وعض على شفة تحتانية ديالو وغمزها خلاها كتكحب هههه وحلها ليها ..
حنان: احم كنعتادر جبتو معايا كيما قلت لك عندي وقتي عامر مع عرس خويا ولخدمة
رائد خنزر: ماشي بضروري يعرف أسبابك يكفي انك هنا
حنان خنزرات فيه ورجعات كتحاول تبتاسم لمنير لي شار ليها تفضل وتبرك، رائد سبقها جر ليها لكرسي باش تبرك ابتاسمات بزز وشكراتو وهي مفقوصة...
خداو لغدا وهوما كيتشاورو على نوع الإتفاق لي باغا دير معاه ولي هو تابع لشركة أزياء مغربية الصنع مئة فلمئة، بغاها تلبس منتوجاتهم فكل لفيديوات لي كدير على شين يوتوب ديالها وماشي بضرورة تدكر سميتهم إلا لسولوها لبنات... فوسط الإجتماع رائد كل مرة يعطي رأي ديالو و يقاطعهم..
منير فأخر لإجتماع: سي رائد متخافش دكشي لي بغيتي هو لي غايكون ملابسنا كلها مستورة ماشي شي حاجة اوفر كساوي طوال شوميزات طوال بحال هاكا...
رائد: اوكي مكنضنش كاين مشكل
حنان بقات كتشوف مقدرتش تصبر وقفات سلمات على منير: شكرا بزاف نبقاو على اتصال تشرفت بمعرفتك والعمل معاك ...(وبصوت شبه مسموع شافت فرائد)نتا برا دابا
رائد سلم على منير وخاد منو نمرة تيلي ديالو وخرج عندها لقاها معصبة لدرجة شوية يخرج دخان من ودنيها...
حنان بصبعها كضرب فصدرو: نتا اش كيصحابلك راسك؟؟ كيفاش تبعني لهنا وتفرض راسك عليا
رائد: باقي مافرضتش راسي علك
حنان تعصبات وكلماتها خانوها ملقات ماتقول حدرات راسها شافت سبرديلتو لاصقة فيها شي حاجة تحدرات شدات ليه رجلو: هز هز رجلك شي لعيبة لاصقة لك فسبرديلة..
رائد جاتو على غفلة هز رجلو دغيا بلامايفكر حنان حيدات ليه سبرديلة من رجلو وبسرعة شيرات بيها بعيد ساست يديها وقالت ليه : ياله تبع سبرديلتك ومتبقاش تضسر عليا راني مكنسواش
شاف رائد فسبرديلتو مليوحة بعيدة عليه رجع شاف فيها غادا ومخلياه واقف تم بدا كيضحك بجهد لي داز من حداه كيشوف فيه حتى بنادم بداو كيجبدو تيليفونات وهو يتحرك بزربة: غير بلاتي احنان غير بلاتي انشوفو شكون غايضحك فلخر.

(جيش الحريري إنتضرو المزيد 😘)