متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الثالثة عشر: عدوى الحب 😷

متمردتي:11

حنان خرجات عينيها: اويلي معيقة واش تسطيتي شورط قصير بزاف وعاد لفوق ومكرووووزين .
علياء صفقات: تاماما perfect!! غاتلبسيهم وغاديري ماكياج نيود ديال لما حيت غادي تعرقي إن شاء الله
حنان تزنگات كتر: الله يمسخك الماسخة
علياء: إوا يالالة بلاش من طالون حيت عارفاك والله لا لبستيه ...اه عنداك تنساي دوك سبراي لي كديري لحمك مكاين ماحسن من هاد ليلة منهم وغادي تمشي عندو لبيتو
حنان: ههههه لالا ولهيلا نتي تسطيتي كيبان ليا ههههههه
علياء: إوا بقاي هكاك تجي شي عارضة أزياء تخطفو من قدامك
باقة مخنزرة فيها بعض مرات كتجيها كتنتاقم منها: وليتي تعرفي وتعطي نصائح
علياء: نتي لي عندك دكشي مخدامش ليك كتنصحي بنادم ومكتعرفيش تنصحي راسك ولا تعرفي تصرفي... دابا سمعي ليا الله يرضي علك ديري هادشي واجي بوسيني من لي ولي غير تابعك
هزات حاجبها بملل: اكتر من هاد لعمر لي تبعني فيه
علياء خنزرات فيها: وبااااز لكمارتك تقولي معاجبكش لحال ونتي راك طايحة اكتر منو بحال والو تكوني كنتي كتبغيه من صغرك تانتي بحالو
**************
قطعات عليها وطفات تيليفون وباقة مخنزرة فيه تقول قتل ليها روح، هزات راسها فلمراية شعرها لفوق نشف شوية نازل حتى لتحت وسارد خلاتو هكاك ودخلات للبلاكار لي على شكل غرفة صغيرة تقلب على بيجامة لي قالت ليها علياء هزاتها وخرجات لاحتها فوق سرير وبركات فآخرو كتفكر على شحال هاد بدات كدير فلكريم المرطب للبشرة بدون رائحة عاد رشات على جسمها body spray.

من لي لبسات لبيجامة حلات فمها فإنعكاسها فلمراية ، بسباب لحجر صحي بركات فدار غير على لماكلة مبقاتش كتريني بزااف غلاضت شوية لدرجة بيجامة ديالها كتبان منحوتة على جسمها.
وقت طويل وهي كتشجع فراسها تخرج من بيتها وتواجه اش كيتسناها ماشي خوف ولكن حشمة اكتر من أي حاجة واخة كانت كتخايل بحال هاد سيناريو ولكن عمرها فكرات انه يقدر يوقع بعدما شافتو عايش حياتو ولاحظات نوع لبنات لي كيكونو معاه بحال حسات براسها مابقاش من مستواها..
هايا دابا حالة لباب وبخطوات شبه منعدمة كتحاول تقدم لغرفتو من غير ماترجع فقرارها شكون قال غاتكون هي لي غاتزوج بيه هي لي غاتروض قلب الأسد ويبقا لعبة بين يديها، تنفسها ولا سريع وكل ماكتزيد خطوة كيتسارعو دقات قلبها أكتر.
يديها جامعاهم قدامها بتوتر كتلعب بخاتمها عشقات تفاصيلو ماغابش على بالها انه عزل شكل لي كيعجبها old fashioned معروف عليها ديما كيثيرها لمجوهرات من طراز لقديم، حتارم دوقها وميولها وعزل فعلا ستيل كانت دوات عليه فمدكرتها، عرفاتو قراها وقلبها نهار لقاها فعرس علياء وجابها ليها حتى لدارها..
وقفات قدام لباب كتهبط فشورط بيجامة يخطي مؤخرتها ولكن سرعان ماكيهبط كتر من قياس كيبان معيق كترجع طلعو حتى ستسلمات وخلاتو هكاك، رجعات يدها على شكل قبضة وكتهزها حتى كتبغي دق فلباب وترجع تهبطها، حطات ضفرها بين سنانها كتعضو بتوتر.. ترجع تهز يدها حتى تبغي دق وتغير رأيها ربع ساعة وهي واقفة كتشاور مع راسها واش دق ولا لا...أخيرا ستسلمات حدرات راسها وضارت غاترجع لبيتها تبدل حوايجها قبل مايشوفها...
رائد مبتاسم متكي على لحيط لي مقابل مع باب ديال بيتو: غير دقي منظنش غاتلقايه!!