متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الثانية عشر:الحجر تحت سقف واحد  😷

متمردتي:1

بارك فوق سريرها رجليه مفارقين ومربع يديه كيشوف فيها ولإبتسامة مبغاتش تفارق وجهو، شكلها وهي معصبة ومخلوعة كيووت..ضارت عندو بكل غضب ولكن بتسامتو وتراتها: متبقاش تشوف فيا بديك نبرة ديال صوتك
رائد عاد ضحك من قلبو: نعام؟؟ اش هاد لجملة لغير مفيدة؟
حنان رجعات كتمشى فلبيت على أعصابها: راه مايمكنش نعيش معاك فدار وحدة... أويلي أش يقولو الناس؟
رائد بتاسم جنب: نتزوجو باش تكون عادي؟
حنان خرجات عينيها: واش نتا شوية لباس
رائد جمع لوقفة: حنان جمعي حوايجك يالاه!! راه مايمكنش تخلصي لوطيل لمدة مجهولة وأصلا راه غايسدو واش فهمتي بلا معندك تاخيار؟؟ كون مكنتش هنا اش كنتي غاديري متلا؟؟
حنان فكرات بلي كلامو صحيح وبلا تاشي كلمة أخرى تحركات فأرجاء لمكان كتجمع كل ماليها فهاد لبلاصة ولكن التوتر كيلعب ليها على أعصابها... بقلة حيلة هزات صاك صغير ولاحتو على رائد لي عينيه كانو فتيليفون ماشافوش حتى ضربو لراسو: أشنو هادا؟!
حنان: بطانة كلب! أش بان لك زعما؟ صاك ديالي هداك من حدك بارك ماكدير والو  جمع ليا دكشي لي فلحمام بليييز
رائد ناض ودخل لحمام واي حاجة فوق لافابو ولا فدوش غير كيهز وكيلوح من لي جمع كلشي سد سنسلة وحطو ليها فلباليزة ديالها من لي هز فيها راسو كانت لابسة سروال دجين مع بودي إكس كحل وفوقو جاكيط دجين ..
حنان من لي شافت فرائد لقاتو مقابل تيليفونو قرنات حجبانها مخنزرة علاش محلش فمو فيها وهي بدلات حوايجها واخا غير غادين لدارو: احم شحال بعيدة دارك؟؟
رائد: ساعتين ونص
حنان خرجات عينيها: أويلي ياك غير هنا فنيويورك
رائد بلا مايهز عينو من تيليفونو: وي غير بعيدة فسبيرب (الضواحي)
حنان سدات شانطتها ودارت آخر دورة كتأكد بلا منسات والو حكات راسها بعصبية: تفو شحال من حاجة خصاني
رائد وقف تحرك لعندها بلا مايدوي خدا من عندها شانطة حل باب لغرفة رجع لماسك لي فعنقو فوق من نيفو وفمو عاد هضر: يالاه نمشيو باش نقدرو نتقداو قبل مايسدو...
حنان شافت فعينيه هوما لي كيبانو من وجهو وسهات فلونهم لي من صغر وهوما كيحمقوها: احم بلاتي ندير لماسك وليغات ديالي
رائد بتاسم جنب: خودي تصويرة راه كتبقا للأبد
حنان باستهزاء: للأبد معاك نتا؟؟ هههههه غير بصحة
رائد هنا طلق لباب وتوجه للمصعد بخطوات سريعة تبعاتو نزلو وهوما ساكتين من لي وصلو لطوموبيلتو وقفات قدامها حالة فمها: جاكواااار!!!!
رائد: سدي فمك غير ديال صاحبي
حنان: عرفني عليه هالعار
حل طوموبيل وحط شانطتها فلكوفر طلع ديمارا وشد طريق حنان كتحس براسها متوترة كتر من عادتها خدمات راديو باش تنسا شوية وتطلق، فكرة صعيبة أنك تحصل فبلاد أخرى بعيد على واليديك فوقت للعالم كلو كيمر من أزمة صحية واقتصادية، ماتقدرش ترجع لبلادك بسباب لحدود لي تسدات شكون عمرو توقع يوصل نهار لي لحركة توقف أقوى الدول العالمية، شكون عمرو فكر أنه ماتقدرش تخرج بلاما دير كمامة وتفادى الناس بصفة عامة؟؟
آخر ما كانت كتوقع حنان أنها تخلي حبابها ودارها وحتى روكو وتحبس فبلاد غريبة عليها، دورات عينيها لرائد كتفكر أشنو كان غايوقع ليها كون مكانش؟؟ أش غايكونو ضروفها...محساتش بطوموبيلة لي وقفات ولاشخص لي كيدوي معاها وعينيها مركزة فوجهو ولكن عقلها سافر بيها ..
فيقوها شفايف لي كيتحركو عاد سمعات صوتو: واش سمعتيني؟؟
حنان: نعاااام؟؟
رائد دار لكمامة هز معقم دارو فجيبو وحيد تيليفونو حطو فطوموبيل خبعو: ديري كمامة ويالاه نتقداو دار خاوية مافيها والو يعني فكري معايا فكلشي لي غانحتاجوه، شوفي وماخاصناش نخرجو بزاف غادي ناخدو تقضية بلكتير...