متمردتي المطلقة

🩸متمردتي المطلقة🩸

بقلمي: اريا ستارك

🍁الحلقة العاشرة: عقد قران وعقد إنكسار🍁

متمردتي:5

رائد شحال وهو واقف مع صاحبو كيشوف فحنان كتشطح مع عادل ومرة مرة يشد فيديها واخا عارفو صديق طفولة هضر مع سيمو فودنو: نتحركو ندخلو خلاص
سيمو كيغوت فودنو: واش انا لعريس ولا نتا؟؟ لبدها وسكتنا
رائد خنزر فيه وجبد تيليفونو كيشوف فيه غير باش مايهزش راسو فيها حنان ماشي ديالو ومايقدرش يحكم فيها هاد شطيح فزنقة وبديك طريقة لعفوية ماتسرطش ليه كون كانت حبيبتو مايخليش شي دكر اخر يشوف خصرها لي كيتمايل على الأنغام..
بعد مدة بسيطة دخلو دقايقية بلعريس لي وصلوه عند مراتو لي عينيها كيبريو بالفرحة، وقف قدامها وبحركات بطيئة متوازنة هز لغطاء لي مخبي وجهها وبتاسم من لي جات عينيها فعينو...
حنان بقات كتشوف فيهم وتزير عليها صدرها، اول مرة فحياتها قدرات تدخل للعرس وتحضر ليه عقدتها خلاتها عندها فوبيا من زواج للدرجة مكانتش تقدر تحضر لعراسات ولكن ليوم حسات بشي حاجة تهزات من على صدرها شافت حب خوها لصحبتها لي كانت كتبغيه من صغر، وهاد لمرة تاواحد منهم مامزيف ولا كداب لا حبهم حقيقي وان شاء الله غاينجح حيت هادا هو لحب لي كيهضرو عليه لأفلام...
بركات لعروس كتنقش بيما لعريس مشا عند صحابو برك معاهم ومرة مرة كيجي عندها، هادا ماشي عرس عادي لي لعريس خاصو يبقا بارك حدا لعروسة ومايتحركش بلعكس حنان بركات حداها ونقشات معاها وغير مقابلة حنة لعروس من كترة لقصص وروايات لي قرات على سحر لي كيدار بحنة لعروس قررات غاتكون هي لباضيكارد ديال الحنة ليوم ههههههه
علياء بتاسمات وشافت فيها: شتك فرحانة؟ تصالحتي مع رائد ولا قالك سيمو على لكادو؟؟
حنان نخلات جزء لمتعلق برائد وركزات مع نص لآخر ديال جملة: عارفة لكادو لعار لما قولي ليا...
علياء: خوك عارفني بروالة واللهما بغا يقوليا شحال طلبتو واااالو
حنان ضحكات من قلبها: مزيان عارفك اش كتسواي ههه....اه حقا شوفي نتي لي جربتي لبرزة ودكشي غدا فلعرس من لي سيمو يوشوش لك فودنك بحال گاع لعريسات ونتي تزنكي ولا ضحكي لعار لما قولي ليا اش قال راه حياتي كاملة وانا كنتسائل اش كيقول
علياء: هههههههه ديمك من نيتك؟؟
حنان: لعاااااار
علياء : اوكي بشرط!!
حنان: اما هو؟؟ عرسك هادا لي بغيتيها نديرها
علياء:جيبي شي حد غدا معاك للعرس
حنان جمعات حجبانها: كيفاش نجيب معايا شي حد؟؟
علياء كحبات وشافت فنكافة لي حدرات عينيها كانت كتسنط معهم: خلي نساليو هاد لحنة وندويو
حنان شافت فنكافة: كتقدري تسمعينا مع هاد ضجيج ديال موسيقى
نكافة: لالا أختي انا كاعما كنطلق ودني
حنان ضحكات: وباش سمعتيني دابا هههههههخ علياء رجعي للبنت ودنها
علياء: بعدي من درية دابة تكعا
نكافة: لالا متنكعاش والله عادي بصح عزيز عليا تبركيك ونسمع للقصص منلي كنكون نقش ولكن واللهما فيا تعاويد وتقولو واش كنهضر
حنان بتاسمات ليها: عجبتيني قلتي اشنو كاين و ما حشماناش من راسك تبارك الله علك هادا هو تصالح مع ذات
علياء: هايا بدات بلفلسفة لخاوية ديالها
نكافة خرجات عينيها: نتي ديك ليوتوبورز ياك ولهيلا نتي واو
حنان: متبعاني؟؟
نكافة بتاسمات بحشمة: غير كنتفرج مرة مرة من لي كتكون عندي لأنتيرنيت