متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الرابعة عشر: بين الشوق والنسيان 😷

متمردتي: 11

خرجات كتسلت مقدراتش تصبر تال طناش د ليل هاد لمرة يالاه قربات لعشرة سمعات تقرقيب وقفات فبلاصتها كتسنط تاني..
رائد: خرجتي خرجتي غير كملي
سمعات صوتو توترات اكتر ولكن عزة نفسي ولقوة لي كتسطانع خلاتها تهز راسها وتخرج للكوزينة لقاتو عاطيها بظهر لابس سروال سيرفيط كحل فيه خطوط بيضين وتيشورط بيض بكتبة كحلة، وقفات شحال وهي كتشوف فيه توحشات هاد تفاصيل لبسيطة فيه واقف فلكوزينة كيطيب بحال فلول..
رائد دور راسو عينيه مقابلينها كتشوف فيه بطريقة حركاتو من لداخل بغا يدير شي حاجة يلقى حل لعلاقتهم ترجع لقبل ماتجي كارمن ولكن هاد لمرة غايتسناها تزيد لخطوة لولة: حنااان غاتبقاي واقفة تم؟؟
خرجات من سهوتها وتزنگات بلحشمة وهي كانت ساهية فيه:احم ريحة لماكلة زوينة..
رائد ضار عندها وهز حاجبو: باقي حتى ماشعلت لبوطة على لاصوص ديال لي باط
عرفات راسها حصلات حكات راسها وبتاسمات بزز: احم غير فيا جوع كيخليني غير كنشمشم تقدر تكون ريحة جاية من برا.
عجبو توترها كيعني بلي بدات كتطلق شوية من عصبيتها وعاد من هضرتها عرفها ملقات ماتقول بتاسم قرر مايجاوبش يشوف واش غاترجع لبيتها وتكمل عنادها، فاجئاتو من لي وقفات حداه كتلعب بصباع يديها :احم ندير لما يطيب ديال ليباط
رائد مبين فرحتو وبتسامتو: وي لا بغيتي
رجعات لور حلات بلاكار وتحدرات تقلب على كاسرول كبيرة أما عينين رائد مفيكسيين على لمنضر لي قدامو نسا يشعل بوطة نسا اشنو كان كيدير ولا اشمن نهار ليوم، حتى وقفات عاد رجع كيشوف قدامو كيحاول يتفكر اشنو كان كيدير..
حنان بتاسمات قبل ماترجع حداه هادشي لي كانت باغة دير اصلا ولخطة نجحات من لي شافتو باقي بحال أصنام ماتحركش: رائد مالك؟ واش نسيتي شي حاجة
شاف فيها لاحظ لماكياج فوجهها عاد بتاسم من لي فهم لخطة ديال ديما بالنسبة للمرأة هي لإغواء ولكن هاد اللعبة كيقدرو يلعبوها زوج دالناس: لا غير جاني صهد
هز تيشورط فوق راسو وحيدو عليه لاحو فوق كرسي: دابا احسن
حنان حالة فمها فصدرو شحال توحشات تسقي عينيها: ما احسن والو
ضور راسو بزربة من كلامها لاحظ عينيها متحركوش من على صدرو: علاش؟؟
حنان نعتات فصدرو وباقة ماوعياش براسها واش كتقول عينيها كيطلعو وهبطو مع صدرو، دراعو تحرك وهبط سروال اكتر وهي متبعاه بعينيها (إنقلب السحر على الساحر): كتشتت ليا تفكيري
رائد ضار عندها وقرب ليها: وفاش كتفكري؟؟
بلا ماتشعر هزات يديها وبنفس صبع بحال ديما قاصت صدرو تنهدات وقالت بصوت حزين: توحشتو
رائد حابس ضحكة ولكن خرجات ليه: احم شكون هادا لي توحشتي؟؟

#مجنوناتي شاركوني أرائكم 😘😘😘