متمردتي المطلقة

🩸متمردتي المطلقة🩸

بقلمي: أريا ستارك

🍁الحلقة الخامسة: بين ثنايا الحاضر وألغاز  الماضي🍁

متمردتي:11

حنان حلات عينيها فصباح كتسمع صونيت منبه تيلوفنها ولكن مافيها ماينوض بزز وقفات تيليفون بنص عين لي محلولة تنهدات واول مطاح فبالها هو بلان لبارح مع رائد من لي هربات وخلاتو..
حنان بدات كضحك بهستيريا: ههههههههه وااااع مي كرشي ناري مكرهتش كون شي حد صورو ليا من لي ضار ولقى غير ريح موراه هههههههههه زعمة يكون داوه لكوميسارية؟؟ منضنش غير يعرفوه شكون يبغيو يسيني ليهم ولا يدور معاهم.... بففف انا لاش مصدعة راسي بيه...يعودها لمخو....
ناضت فلخف غسلات وجهها وسنانها لبسات بنوار فوق بيجامة وخرجات لصالة غادة ديريكت لكوزينة متقدرش تحل عينيها بلا قهوة ولات مدمنة عليها من شحال...
سلات قهوتها هزات راسها فمكانة لقاتها تسعود صباح وصلات، تاجهات جيهت بابها وحلاتو ديريكت مع كاميو وقف قدام بابها ..
شخص نزل من حدا سائق وجا لعندها: آنسة الحريري؟!
حنان: وي سلام عليكم انا غانخلي ليكم باب محلول شكرا حيت جيتو فلوقت...
هادي الشركة لي شرات من عندهم لأثاث عيطو ليها بلي خوا عندهم وقت بسباب إلغاء شي موعد كان قبل منها، وقدمو ليها أنهم يوصلو ليها دكشي لي شرات قبل لوقت لمحدد...
ياله ضارت غادخل كتسمع طوموبيل وقفات دورات وجهها بان ليها رائد كيسطاسيوني شافتو وبتاسمات وهي تخنزر ملي سرات معاه بلي بتاسمات...
رائد خرج من طوموبيل لابس تيشورط خضر داكن بولو وشورط بيج دار نضاضرو ديال شمس وصل حدا رجال لي حلو باب كاميو يبداو خدمتهم سلم فطريقو عليهم وعينو على حنان لي واقفة قدام باب وجهها مافيهش نقطة ماكياج كتبان زوينة ناتيرال  ..
حنان مخنزرة: ماشدوكش تبات فكوميسارية؟؟ مكيعرفوش لصواب
رائد مدواش معاها دخل للدارها هز كرسي كان محطوط فصالة داه معاه لكوزينة حطو وبرك حنان بقات كتشوف فيه تبعاتو فين برك وقفات وهزات يدها حطاتها على خصرها وقالت بنفاد صبر:خفيفة ولا قاصحة؟؟
رائد بعصبية: شي قهيوة تكون تقيلة على قلب بحالك
حنان وقفات مقاد وخنزرات فيه: ايييوا جمع راسك ماشي داخل تال داري وتعيرني
رائد حيد نضاضر وشاف فيها حجبانو مقرونين وكاعي: هربتي لبارح!!
حنان: اه
رائد هز حاجب : اه ؟!! هادشي علاش قدرك الله متشرحيش كتر ؟؟
حنان هزات يديها كتشالي وتهضر ديما ملي كتعصب كتبدا دوي بيديها كتر من لسانها: درية ودري ماشي خوت فلبحر ومعانقين جاو لبوليس وقفو عليهم درية كتعلق ودري ياكيمشي كوميسرية يبات فيها ياكيدور معاهم ورجع فحالو ... اشنو؟ قاعدة عامة هادي وطنيا عل أقل مغرب كلو عارف يحضرو صحاب لحال خاصك تعلق
رائد كيشوف فيها مزيان: بغيت غير نعرف واش نتي بنت ولا شمكار
حنان كرزات على يدها فين ضرباتها أخر مرة: ممممم ماتعطلتيش بزاف باش تبدى تعايرني بلمرض ديالي برافو فتي توقعاتي ..مممم شمكارة هادي كضرب يديها وتهرب من بوليس اوه مايكاد ....متخافش ماعنديش قرقوبي ولا معجون
رائد وقف بزربة شد فدراعها: حنان انا ماا..
حنان نترات يدها منو وضارت غاتمشي وتخليه ولكن عاود شدها وهاد لمرة كرز بجهد: ماشي كل مرة يهضر معاك شي حد تفهميها عوجة وتكعاي ديري فيها قوية ونتي غير كتهربي أصلا من مشاكيلك...لهروب ماكيحل تاشي مشكل
حنان نترات ليه يدو عوتاني : متبقاش كل مرة تقيس فيا خلي يديك عندك ...وانا مكنهربش من مشاكل كنهرب من صداع حيت دابة كنقلب بعينيا على شي حاجة نفلق مك بيها حيت كتعصبني....
رائد طلق ضحكة من قلبو ورجع برك ملي جات عينو على ماكينة قهوة ناض بدا كيصيب لراسو قهوة، حنان كل خطوة فكوزينتها كيعصبها ملي بدا كيحل فبلاكارات يقلب مصبراتش..
حنان: واسي واش دار باك هادي؟؟ وانا مفراسيش
رائد شاف فيها: بغيتي قهوة؟؟
حنان بأعصاب: لا شربت وحدة
رائد: خوك عيط ليا نجي عندك ونجيبك لفين كاينة ماماك وعرفتك غايجيو يديلفريو لك لأثاث ديالك قلت نجي نبرك معاك مجاتش نتي وحدك وسط رجال فدارك ومن لي يساليو عاد نمشيو...
حنان تحركات لكوزينة حداه جبدات ميكات من فريكو حطاتهم فلافابو عطات لرائد بضهر ودوات بشوية: مبغيتش نمشي
رائد مشا وقف حداها وهي حالة روبيني على دكشي لي جبدات باش يترخف من تلج: ضروري تمشي باش تعاود لك ماماك وتطمن علك
حنان بضحكة استهزائية: دابة عاد
رائد بصوت منرفز: اش كنقول لك؟؟؟
حنان نفخات قنانفها بغضب داخلو فشوش شوية : بفففف قلتي منبقاش نحكم دغيا تانسمع من عند لواحد بلا بلا بلا بلا
رائد مبتاسم جنب: انا مكنقولش بلا بلا بلا
حنان بلامبالات: بلا بلا هي لي كنسمع من لي كتكون دوي....أجي قلتي عرفتي غايجيو يديليفريو ليا رحيل ديالي باش عرفتيها؟؟؟
رائد شاف فيها خرج عينيه وحل فمو بغا يقول شي حاجة وماجات فبالو تاي كدبة وهو يعاود يسد فمو وبتاسم ليها...
حنان بتشكيك: منين عرفتي؟؟