متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الثانية عشر:الحجر تحت سقف واحد  😷

متمردتي:7

خرجات من دوش كتنشف فشعرها بفوطة حسات بلبرد دغيا كيتسلل ليها للداخل، بسرعة مشات لبلاكار لي حطات فيه حوايجها كتقلب على شي حاجة سخونة بيجاماتها رهاف لبسات وحدة دغيا وخدمات سيشوار تنشف شعرها دغيا..
خرجات بزربة لقات رائد واقف كيطيب: كطيب؟!!
رائد دار شافيها جنب لابسة خفيف رجع شاف فلمقلة لي كيطيب فيها أومليط: ممم نتي كليتي انا لا
حنان بدات كتلعب بصباعها: اه جربت ديك ماكلة ديالهم شحال زوينة ماطاحتش ليا فبالي أما كون خدينا لك تانتا
رائد طفا لبوطة ودار عندها: كنتي كتهضري معاه و قلتي لبنى سريعة ديك لهضرة عليا؟
حنان بتوتر: اوا نتا لي بديتي كتجري بزربة وخليتيني موراك وكملتي... وكون توضرت؟؟
رائد كيدوي معاها حط اومليط فطبسيل هزو وحطو فوق طابلة وراجع عندها وهو كيهضر: اولا عندنا تيليفوناتنا ماغاديش توضري تانيا ملي شفتيني بعدت كنتي تعيطي بسميتي لي متأكد ماتنساتش علك وديك ساعة كنت غانوقف ونرجع عندك
زاد بخطوات هاد لمرة وقف قدامها قريب ليها بزاف وحدر راسو كيشوف فيها، حنان علات وجهها كتشوف فيه وهي مزنگة واخا دوات عليه مقصداتش أنه يسمعها..
قرب ليها أكتر وبنفس لبرود لي على وجهو قال: آخر مرة تهضري عليا قدام شي حد بديك طريقة وتسميني اسماء بنات
حنان: ماشي هكاك راه هو ماعرفنيش كنهضر علك
رائد قرب ليها كتر: حنا ماشي براهش باش نسميو بعضياتنا أسماء ونهضرو مورا ضهرنا على لاخر عندك مشكل معايا دوي معايا فاص!! من لي كتقللي احترامك ليا قدام شي واحد أش كتوقعي منهم؟؟
حنان حدرات راسها: والو!!
رائد: لا ماشي والو ألالة تاهوما ماغايحتارمونيش
حنان هزات راسها فيه بتمعن: مالك وليتي هاكة؟؟
رائد دار عطاها بضهر ومشا برك فطابلة قدام ماكلتو: كيفاش هاكة؟؟
حنان وقفات كتفكر كيفاش تقول لي فبالها: ماعرفتش كيفاش نشرح!! مبدل كتعامل معايا مختالف
رائد واخد راحتو بشوية عليه كياكل ويتسنى حتى يخوي فمو عاد كيجاوبها: عادي غير جاب لك الله
هاد لمرة هي لي جات وقفات قدامو: رائد بلا لعب ديال دراري صغار انا ونتا عارفين بلي تبدلتي
رائد لاح لفورشيط بجهد وهز راسو فيها حجبانو مقرونين:اش بغيتيني نقولك؟؟ ها؟ كنت كنتقرب منك ماعجبكش لحال قلتي نحبس دابا ملي حبست ماعجبكش لحال اشنو باغة نتي احنان مع راسك قرري وعلميني مغانبقاش نلعب معاك قاش قاش
حنان كعات وربعات يديها: ماتلعب معايا مانلعب معاك من أحسن منبقاوش نهضرو گاع وقبل مانقطعو لهضرة ممكن تزيد فشوفاج كاين لبرد انا راجعة لبيتي وقت لعشا أنخرج نطيب وغدا دير نتا لعشا..
وقبل مايجاوبها دخلات لبيتها هزات تيليفون قلبات واتساب لقاتها كونيكطي وهي تعيط...
علياء: أشمن موصيبة درتي عاد معيطة ليا
حنان: مادرت والو خويا حداك؟؟
علياء: لا خرج يتقدى لينا علاش اش واقع دوي؟؟
حنان: ماواقع والو هاد لمرض عصبني
علياء عارفاها علامن كدوي: قولي ليا اش درتي ليه هو لول عاد اش دار هو
حنان: شتك بحال غاتجي منو
علياء وقفات: لديمك واش نتي عاودتي بعدا؟؟ باش نجي من شي حد
حنان خوات قلبها على صاحبتها وكيما ديما كيتفاهمو فكلشي تال درجة كل وحدة عارفة لأخرى كتر من خواتات..
علياء: دابا نتي كتبغيه و..
حنان قاطعاتها كتهمس خايفة لايسمعها: تي شكون قال كنبغيه تسطيتي
علياء قلبات عينيها بنفاذ صبر من عناد هاد لبنت: اوكي كيعجبك واخا؟؟ هادي مزيانة؟؟ مهم على ماكتعودي ليا وكيفاش كل مرة كيعيط لسيمو غايكونو كيهضرو على نفس لموضوع... رائد واقيلة كيعاملك هاكة باش نتي ترطابي معاه وتبادليه نفس الشعور