متمردتي المطلقة

🩸متمردتي المطلقة🩸

بقلمي: اريا ستارك

🍁الحلقة التاسعة:العواصف تأتي فجأة🍁

متمردتي:2

رائد: كيفاش زعمة اش ندير باش نعاون؟؟
طبيب بتاسم: حنان عندها زيوت طبيعية كنت نصحتها بيهم شحال هادا سخنهم شوية وغطس يديك شوية فيهم ومسد ليها كرشها مزيان حتى تسخن ومن احسن تشرب شي شربة سخونة واياك تعطيها قرفة ودكشي مايصلاحش ليها مهم غير على لألم باش يخفاف وترولاكسا وتقدر تنعس.. غدا غاتصبح ان شاء الله بيخير راه ديما كتوقع ليها فلول هاكة نهار لول ولا زوج وصافي كدوز
رائد: اوكي شكرا بزاف وبليز مايخرجش هادشي لصحافة
طبيب قرن حجبانو: لا اولدي متخافش حنان بنتنا مانبغيش ليها شي حاجة خايبة.

                         ********************

رائد بارك حدا حنان فوق سرير كيشوفيها ناعسة وكتألم تنهد وهو كيحاول يقوي راسو ويتحرك بشوية حايد عليها غطا جسمها كيرتاعش قدامو وعينيها كل مرة كتكرز عليهم بلألام، سرط ريقو بزز وهز تيشورطها عرا على كرشها ودغيا دور عينيه هز قرعة صغيرة كانت تاهي فبلاطو محطوط حدا راسها جابو معاه من كوزينة بعد ماسخن زيوت لمساج كيما قاليه طبيب...كب شوية زيت فيديه وعينيه رجعو لكرشها لي مطراسية بكترة رياضة لون برونزي كتبان قوية، تنهد وحط يديه غايبدا بمساج تفاجئ من لي حس بليونة تحت صباعو وقف شاف لحنان فوجهها لي مغوبش واخا ناعسة رجع حط يديه وهاد لمرة ماشافش فكرشها بدا كيدور يديه بحركات دائرية بشوية وعاد بدا كيحرك صباعو باحترافية، فعالم كرة لقدم ديما كيحتاجو مساجات سيرتو لسيقانهم أو رجليهم بصفة عامة  وشي مرات كيديروهم لبعضياتهم... سمع أنينها لي وقفو على لحركة شاف فيها عينيها مسدودين تنهد وقال : ياربي تصبرني على هادشي راه تعذيب نفسي... حط يديه وهاد لمرة حنان قفزات من برودة يدو
تسمع صوت حنان خافت: ممممممم بارد
رائد بزربة رجع هز زيت لي باقي سخون خوا منو مزال فيه ورجعهم لكرشها ملي هز راسو شاف فيها لقاها حالة عينيها بسباب لمسكنات فايقة ومفايقاش..
حنان حاولات تبرك وبصوت تقيييل: اش كدير
رائد توتر: كندير لك مساج
شاف فيها مصدوم وطلق ضحكة: كون كنتي فايقة نيت كون ضربتيني بأي حاجة حداك ههههه
حنان مغمضة عينيها حسات بيدين تحطو على كرشها كيديرو مساج خفيف استسلمات لذلك لإحساس كتخرج أنين من لي كتجيها وجعة على غفلة وتبوريشة لي شاداها كتقول راه غير سخانة، رائد فينما كيسمع لأنين كيتزير ومصبر راسو غير بزز عارفها ماشي فوعيها ستسلم ووقف مساج مقدرش مزال يزيد راه خاصو ينوض يدوش بلما بارد باش يحيد هاد لافكار من راسو..

حنان بشوية كتحل عينيها كتشوف فين راها ملي عرفات بيتها رتاحت يالاه غاترجع تنعس تفكرات من لي طاحت وكيفاش حلات عينيها ورائد كان هازها صدقات باركة ولكن ضربها ضو فكرشها خلاها شهقات بجهد من مفاجئة لألم ليها..
فنفس لوقت رائد حل لباب ودخل هاز بيدو لوخرى بلاطو حنان قرنات حجبانها مقابلاه من لي شافت لبلاطو حلات فمها بدهشة وهزات راسها فرائد: اشنو واقع؟