متمردتي المطلقة

🩸متمردتي المطلقة🩸

بقلمي: أريا ستارك

🍁الحلقة الثانية: الملكة دائما تصنع من الألم قوة🍁

متمردتي: 3

حنان كتفيق فماماها مع ربعة صباح وكتحاول مديرش صوت بزاف باش متفيقش سيمو لي مخشي بيناتهم، وقفات ودارت من جيهة لوخرى ديال سرير وقفها فبلاصتها صوت أمها كتنده على باباها "حمد واحمد لا احمد حمد" خانوها دموعها ولكن دغيا مسحاتهم وتفكرات كلمات باها ملي كان كيجي عندها كل ليلة لبيت ملي بدات كتكبر وكتلقى صعوبات مع لقراية ولا مع حوايج بساط ولا غير كاعية، كيدخل يبرك فكرسي حدا ناموسيتها صغيرة، يعاود ليها حجايات وقصص وقعات معاه فصغرو وكان ديما كيساليها بنفس الجملة:”ماعمرك ماتستسلمي للحزن..ديما فكري فالناس لي باغينك تكوني حزينة وخودي قوتك من لغضب ديالك، ومن بعد فكري فالناس لي فحياتك و لي باغين يشوفوك فرحانة وخودي منهم السكينة علاش السكينة والهدوء حيت هوما لي غايخليوك تفكري بعقلانية اشنو لخطوة جاية فنهارك ولا فحياتك...”
فهاديك لوقت كان كلامو مبهوم ليها عقلها صغير تيردد لكلمات ديما ولكن من حدها كتكبر وهي كتفهم وتحس بدوك لكلمات، حدرات راسها وشافت فخوها لي مكمش وسط أحضان ماماها بتاسمات بحزن مسحات وجهها كلها عزيمة أنها تشوف غير ف المستقبل...
حنان: ماما ماما فيقي بغيتك ماما
الأم خدوج فاقت مخلوعة: ياك أودي لباس أبنتي مالك بسم الله عليك
حنان: ماما لباس مكاين والو خاصنا ندويو دغيا قبل مايفيقو دوك لقوم لي برا.
الأم خنزرات فيها: مربيتكش باش تقلي الاحترام على لي كبر منك أبنتي واخا يكونو مامزيانينش وغايلوحونا فزنقة متنزليش لمستواهم.
حنان حدرات راسها لأرض حشمانة من فعايلها: سمحي ليا اماما ولكن هاد لأيام عييت منصبر ليهم مبقيتش مستحملة واش تاواحد فيهم محازن على خوهم ولا ولدهم بلعكس فرحانين باغين غير لعزو يسالي باش يفرقو لورث بيناتهم، معرفتش لاياش متحمسين كتر واش للورث ولا باش يجريو علينا وبردو قلبهم لهاد درجة قلب بنادم كحل... مبقيتش قادرة نتمالك أعصابي.
ماماها هزات يدها حطاتها على حنكها حركات إبهمها بشكل دائري كتكالمي بنتها وفعلا حنان مالت لجيهت يدها وغمضات عينيها حسات بماماها كتهز ليها راسها: هاد راس ديما يبقا مهزوز لسما معاش ولا كان لي حرق لبنتي قلبها...ولكن صبر أبنتي مابقا عندنا ظهر سمحي ليا ميمتك يتيمة..
حنان مسحات دموع امها تاهي وهي مبتاسمة: عندنا بعضياتنا وهادي هي دنيا ومافيها.... مهم ماما خاصني ندوي معاك ضروري ...
هزات فيها راسها ماماها بستغراب: نعام أبنتي أشنو كاين؟
حنان: احم نتي عارفة كتر مني بلي عمامي غايخرجونا من دار وبلي عماتي غايدخلو عندك لبيت غدا يكشطوك من كلشي
ماماها حدرات راسها وعينيها دامعين: عرفت ابنتي عرفت الله يحاسبهم الله يخلصهم.
حنان: معرفتش علاش ديما هاد لحقد بزاف على سبب زواجكم بلا موافقتهم مايمكنش يكون هاد الحقد كلو على قبل قرارو وهو حر يتزوج لي بغا.
أم: أبنتي لماضي معندو باش يفيدنا دابا خاصني نخدم عليكم ونخرجو من هاد لوحلة
حنان: دكشي علاش بغيتك تجبدي ذهبك تعطيه ليا دابا أنا غانخرج نديه عند علياء صحبتي تخبيه ليا راه متافقة معاها.
ماماها ناضت تجري: الله يرضي عليك مزيان يكونو عندنا ريالات بعدا باش نبداو.
وقفات قدام واحد بلاكار كبير حلاتو كلو علالق ديال لحوايج مخلطين ديالها وديال لمرحوم راجلها تنهدات ملي شافت حوايجو مسحات على وجهها بحال كتحاول تمسح أثار لحزن لي حفرت ملاميحها خلاتها تبان اكبر من لاج ديالها، تحنات بركات لأرض على ركابيها وهزات لعود لي كاين فلقاع ديال بلاكار وجبدات منو صندوقة فيها دهبها من دهازها لكادوات لي كان راجلها كيشريهم ليها حدها جبدات خاتم زواجهم دارتو فصبعها...
حيدات زيف حياتي من راسها حطاتو لرض وجبدات شي لاخر ديال ذهب جمعاتو فيه على شكل رزمة وسداتها و ماطاتها لبنتها وتفكرات شي حاجة ضارت بالزربة.
الأم حلات مجر حيدات منو لحوايج ومشات لحاشية وجبداتها بضفرها حتى تهز لعود شوية وجبداتو حيداتو هزات جوج كتب صغار عارفاهم حنان ديال بنكة حمرين ماطاتهم ليها ورجعات هزات امانة أخرى.
لأم: بلاتي نزيدك واحد لأمانة كنا مخبينها لدواير زمان.
حنان لبسات جلابتها وهزات جاكيط ديال باباها خشات لفلوس فجيوب دخلانيين حيت واسعين فهاد جاكيط ديال كوير وهزات صاك ديال ماماها خشات فيه ذهبها ودارتو تحت لإبط ديالها كرزات عليه بدراعها وسدات سنسلة باست لمها راسها وخرجات.
مشات لدار صاحبتها علياء لي قريبة شوية منها طلعات خلات عندها لفلوس وبركات معاها تاوصلات سبعة صباح وخرجات.