متمردتي المطلقة

🩸متمردتي المطلقة🩸

بقلمي: أريا ستارك

🍁الحلقة الخامسة: بين ثنايا الحاضر وألغاز   الماضي🍁

متمردتي: 1

حنان شعرها كيتطاير بالبرد وابتسامتها عريضة مافارقتهاش من لي تحرك رائد بلموطور كتحس بالحرية بدات كتزعم شوية وقفات على طولها، رائد صدماتو من لي حس بيها طلقات منو ولكن شدات فكتافو كتحكم فتوازنها...
غريبة انها تشجعات ووقفات وكتغوت باعلى صوتها شيء لي خلاه مبتاسم غير لبنات لي موالف كيعرف لا هي مخافتش بحالهم بلعكس عاد زادت ضسرت ههه...
رائد بصوت عالي باش تسمعو: حنااان بركي
حنان كتغوت: ااااه لاااااااااا
رائد: اه ولا لا ماشي بزوج هههه
حنان طلقات من كتافو وهزات يديها لسما: فرييييدوووووم (الحرية)
رائد بتاسم بشر زاد سرعة وساق موطور بطريقة متموجة خلات حنان غوتات بحر جهدها ورجعات شدات ليه فكتافو ولكن مبتاسمة وعاجبها لحال: ياااااااااس أبليف أكان فلاي ههههه
رائد حرك راسو وهو كيضحك: حنان بركي لرض غادي طييحينا
حنان بركات وهاد لمرة طلقات من رائد حسات براسها ولفات موطور وشادة توازن بوحدها مامحتاجاش تشد فيه، كتهضر معاه حدا ودنو ولكن مع كاسك كتغوت شوية باش يسمعها: فين غادين شتك طولتي؟؟
رائد بتوتر معرفش باش يجاوب من حسن حضو بانت ليه نفس لبلاصة فين كان سيمو وعلياء فطماريس..وقف تما نزلات حنان حيدات لكاسك طلقات شعرها وخشات صباعها كتسرح خصلات لي تخربقو ليها بلبرد حركات راسها عاليمن وليسر وهي مبتاسمة طول لوقت عجبها لحال حسات براسها خفيفة بحال مشاكل نعادمات...
حنان مرداتش لبال للعينين لي كانو مقابلين كل حركاتها: خاصني غير جاكيط كوير وكمل ديكور... عرفتي شهيتيني نشري موطور
رائد عقد حجبانو: موطور صعيب علك سيرتو نتي صغيرة وقصيرة غايغلبك خطر علك، وقتما بغيتي انا نخرجك بلموطور
حنان دارت خنزرات فيه لقاتو عاطيها بضهر وحل لكرسي ديال موطور هزو وتحت منو كاين بحال كوفر صغير، جاها لفضول من ناحية اشنو كيدير ولكن تفكرات كلامو ورجعات قرنات حجبانها: هههههه ""اوه وقتما بغيتي نخرجك بلموطور"" محاولة فاشلة اسي رائد واش بنت لك كنرضع صبعي بغيتي تقولبني؟؟ وأنا ماقصيراش طولي عادي بنادم لي كيكمل فطول معرفتش فين غادين باغين طلو على غدا ولا شنو...
رائد دار عندها ولإبتسامة مامفارقاش وجهو، بعض لمرات هاد لبرود ديالو كيجيها إستفزاز حدرات عينيها ليديه بانت ليها جاكيت كوير كحلة صغيرة باينة ديال بنات ..
حنان: لا لا متقولش ليا هادا هو بلان لي كدير؟؟ ههههه دابة كطلع لبنات وكيتزعطو فيك من ناحية موطور ولكوير وتبوكيصة كتجبد ليهم جاكيط ديال كوير صافي كيذوبو ههههههه بلان مريييكل
رائد كرز يدو على جاكيط ولاحها عليها فوجهها ومقالش كلمة وحدة وهو غادي داخل لنفس مقهى..
حنان شدات جاكيط حيداتها من على وجهها وشافت فرائد لي مشا وخلاها واقفة، قلبات جاكيط لقاتها باقة بتيكيتة جديدة حتى من سنسلة ديالها لي كتسد بيها ولي فجناب باقة ملوية عليهم ميكة، شافت لاطاي ميديوم بحالها وديال لبنات لاحضات إمضاء فتيكيتا قرباتها لعندها باش تشوف مزيان وهنا خرجو عينيها...
حنان: لا لا لا مايمكنش هادي سينياتير ديال فيرا!!!! لا مايمكنش باش عرفني ...لااااااا
رجعات شافت فرائد لي مدارش شاف فيها ومكمل طريقو مبغاتش دخل ليها للدماغها كيفاش عرفها من سنين وهي باغة جاكيط كوير مسينيا من طرف المصممة لعالمية فيرا مايمكنش كيفاش عرفها....
حنان باقة حالة فمها من لي شكات زادت وسعات عينيها: ك...كيييتفرج فقناة ديالي؟!!! لاااا مايمكنش؟؟ ولكن باش غايعرف؟؟ سيمو قالها ليه ولكن عمرني دويت معاه عليها؟؟ علياء زعمة مكنضنش؟؟
بزربة لبساتها وخرجات شعرها من تحتها حركات راسها بشوية وحدرات عينيها كتشوف فجاكيط وهي غاطير بلفرحة مرة تخنزر مرة كضحك بهيستيريا...
رائد بارك فطابلة ومقابلها وكيحاول يخبي ابتسامتو..