متمردتي المطلقة

🩸متمردتي المطلقة🩸

بقلمي: أريا ستارك

🍁الحلقة الخامسة: بين ثنايا الحاضر وألغاز الماضي🍁

متمردتي: 5

#فلاش باك
حنان خارجة من مطار زربانة متوجهة ديريكت لبلاصة طاكسيات اول مرة كتسافر فرحلة عمل عمرها فكرات أنها من قناة يوتوب لهادشي، ولكن واخا كدير فوطو شوت لماركات مغربية وفرنسية باقة يالاه فأول مشوارها لمهني...
خدات بتي طاكسي وفطريقها لدارها جديدة مع راجلها لي باقة معتباتهاش من نهار خداوها، خمس شهر باش تزوجو وعاشو مع ماماها حتى لنهار قررات تعاون راجلها بفلوسها ويشريو دار...
كان سافر معاها معاذ ولكن ملي سالات ليه وقت كونجي رجع لخدمتو، حطها طاكسي قدام عمارة بتاسمات فرحانة جارة باليزتها صغيرة مقادراش تصبر ولا تعطل كتر على معاذ صديقها وحبيبها من لي عرفات اشنو هو يعجبك شي شخص..
ديما كتحس بيه مظلوم معاها شحال من عام وهو معاها وملي أخيرا غاتكون ليه شاءت لأقدار مايبداوش حياتهم زوجية حتى لدابا،كانت صعيبة مع ماماها فدارهم صغيرة فلحي شعبي... ولكن هاد لخدمة جديدة لي سينات معاهم عونوها بزاف تبدا حياتها بلمعقول، طالعة كتزرب باغة دير ليه مفاجئة وتقاد دار قبل مايخرج من لخدمة فواحد صونطر دابيل، جبدات ساروتها وحلات لباب بانت ليها صالة مرونة وكوزينة ضو شاعل فيها بتاسمات
حنان: هههه لمعفون لاخر لقا سيبة.
حطات باليزتها وحيدات جاكيط دجين لي لابسة ومشات مبتاسمة للصالة من حدها كتزيد خطوة وملامحها كيتبدلو شافت فلأرض كتلقى شوميز دونوي ديالها عمرها لبساتو شراتو لدهازها مليوح فلأرض، وقفات فبلاصتها مخنزرة فلأرض دورات عينيها كتحاول تفهم عاد لاحظات طابلة لي عامرة كيسان وقراعي شراب من كل انواع وأشكال فواكه جافة وشيبس، حسات برجليها فشلو وقالت واقلة غير عرض على صحابو واقلة هز حوايجي باش يتفكرني مابغاتش دخل شي فكرة اخرى لدماغها.. ماباغاش تيق بشي حاجة تقدر تهرسها هادا راه حب حياتها عاشت معاه لحلوة ولمرة...
حاولات تزيد خطوة كتحس برجليها فشلو: لالا نعلي احنان شيطان ماكاين والو ماكاين والو.
شوية تسمع صوت ضحك بنت بميوعة فايتة لقياس لحمها شوك عليها هزات راسها فجيهة بيت نعاس ديالها، زادت خطوة وطاح ليها طالون من رجليها فوق زربية حيدات لاخر وهي ماواعياش على راسها غادة جيهت بيتها ويديها كيترعدو نزلات عينيها ليديها لقات راسها باقة هازة تيليفونها عاود سمعات ضحك مقدراتش تستحمل حلات تيليفون تعيط لصحبتها علياء ملي صونا تاعيا مجوباتش دورات لصاحبتهم لوخرا أمينة تنصحها اش دير ولاتقوليها تجي تعاونها...