متمردتي المطلقة

بقلمي: اريا ستارك

🍁الحلقة الرابعة:مطاردة عاشق وتمرد أنثى🍁

متمردتي:2

رائد بارك فلبار شاد فيدو كأس ديالو كل مرة كياخد جغمة وعينيه على حنان لي كتشطح بكل حرية وسط زوج بنات لي من لي دخلات وهوما معاها، فعلا من لي دخل موراها ساعة هادي وهو غير مقابلها مابغاش يهضر معاها ويكون هو سبب ليلتها تخسر، بارك مصبر راسو وحاضي جسمها لي منحوتة عليه ديك كسوة بشكل غير عادي مقدرش يحيد عينيه عليها متأكد بلا بزاف بحالو مقابلينها ولكن ماقادرش يهز عينو من عليها وملي كتبتاسم نفس إبتسامة كترسم على وجهو..حط كاسو بكل عزيمة وقرر يمشي عندها...
حنان كانت كتشطح وضاحكة حتى ضارت ولقات رائد قدامها هبطات يديها وغوبشات وقفات كتشوف فيه وصدرها كيطلع و يهبط من قبيلة وهي كتشطح شعرها شوية سارد وجهها كيلمع، هزات يدها دوزاتها على جبينها وفمها تحول على شكل دائرة كتنفخ بهدوء وهي كتستنشق بشوية بحال كتكالمي راسها فنفس لوقت..
ما لاحظاتش بلي لعينين لي مقابلينها شافو حركاتها بطريقة أخرى كل عضلة تحركات من وجهها ولا شفايفها وعينيه عليهم بحال شي قناص مقابل الفريسة ديالو...
حنان ملي حسات بلعطش وحلقها ناشف خرجات لسانها كترجع شوية د الريق لشفايفها لي حسات بيهم نشفو، هادي كانت لحركة لأخيرة لي هرسات لقفل لي كان ساد بيه رائد على أحاسيسو فثانية وحدة زاد جوج خطوات حط يدو على خصرها وليد لوخرى ورا عنقها وجرها عندو حط شفايفو على شفايفها..
حنان معرفاتش شنو لي وقع فثواني لأخيرة لي خلاتها تكون بين يدين رائد وشفايفو فوق شفايفها بدون سابق إنذار عينيها تسدو ماشي هي لي محكمة فيهم فهاد اللحضة تاشي صبع من جسمها ماقادرة تحركو كلشي وقف حتى دماغها حبس، حسات بشفايف كيتحركو فوق شفايفها ويدين تكرزو عليها كتر معقلاتش فين كانت واقفة ولا كيفاش حتى جات هنا لي فبالها دابا هو هاد لإحساس، حاولات تحرك شفايفها وبطبيعة لحال تحركو ...
رائد ملي حس بردة لفعل وحس بشفايفها تحركو  فقبلة مع شفايفو مبقاش واعي على راسو مكانش كيتوقع شي لمسة منها غادي تعطيه هاد لإحساس دماغو كيفكر فحاجة وحدة (بغى كتر) بنفاد صبر عض على وحدة من شفايفها فيقها من سهوتها دغيا رجع ليها لإحساس من رجليها كيما كتقرا فلقصص حسات بواحد قشعريرة تال صباع يديها لي لقاتهم باقين فجنبها متحركوش، بسرعة حركاتهم دفعات رائد منها وصرفقاتو