متمردتي المطلقة

🩸متمردتي المطلقة🩸

بقلمي: اريا ستارك

🍁الحلقة الحادية عشر: بعض الأحلام تتحقق🍁

متمردتي:4

مدينة التفاحة الكبيرة the big apple ولمعروفة بالمدينة اللتي لا تنام نيويورك، حلم حياة حنان من لي كانت صغيرة وداها باباها لسينيما تفرجات فيلم أمريكي دايرة قصتو حول مدينة نيويورك وداك نهار تغرمات بألوانها ساحرة فليل..
دابا بعد تلاتة سيمانات باش عطاها خوها لكادو ديالها كتحس براسها حققات حلم من أحلامها...قرب منتصف ليل وهاد لمدينة باقة حية بحال فعز النهار، وصلات لمكان مابعيدش بزاف على لوطيل تمشات على رجليها لهنا مقدراتش تصبر واخا وصلات ليوم مقدراتش تسنى تال غدا..
تايم سكوير منطقة معروفة كتجدب سياح ولكن لغريب فلأمر انها بلاصة كلها عامرة بلهوات، من الرسام لي يقدر يحط لك رسم كاريكاتيري فدقائق تال مغنيين وراقصين كل واحد بجمهورو وتقدر تكون هاديك لبلاصة بداية شهرة للموهوبين منهم..
وصلات للدروج حمرين باركين فيهم ناس مفهماتش أشنو لي كيجدبهم ليهم، حب لفضول خلاها بحال اي واحد فيهم تاهي طلعات دريجات وبركات ومن لي هزات راسها تخطفات أنفاسها من لمنظر رائع، هاد لمكان جا قدام تلاقي زوج شوارع رئيسية كيخليك تشوفي نص دلمدينة، وشوارعها طويلة لي مزوقة بالألوان وإشهارات ومرة مرة كتبان واحد شاشة كبيرة فيها بنادم لي كيتمشى فشانطي فنفس لوقت، شيء لي كيفاجئ لمارة بتاسمات حنان من لي شافت صحابات معانقين شافو راسهم فشاشة لكبيرة وبداو كيتبوزاو بحال عارضات لأزياء وفلخر بان عد تنازلي وكلشي بدا كيحسب حتى خداو ليهم تصويرة تذكارية ونشروها فشاشات لي حداهم ولبنات كينقزو بلفرحة وضحكة...
قادات كمامتها على فمها الناس فكل مكان أغلبية دايرينها سيرتو أنه لأعداد ديال لحالات بهاد لمرض جديد غادة وكتزايد وصلات لميريكان نيويرك ونيوجيرزي بلأخص أول ولايات لي بان عندهم بكترة...
رجعات لوطيل من لي بدا كيتعطل لحال بزاف ومن لي دخلات أول حاجة دارتها عمرات لبانيو دلحمام لراسها، دوزتها غير راحة واستجمام... إختيارات سيمو كانو فوق لمستوى كلشي عجبها خدا ليها فأحسن أوطيلات لغرفة كتنقى كل نهار، وعاد كيحطو لك فوطات جداد وكلشي جديد، ماكينة ديال قهوة فبيتك، مايكرويف وزوج تلاجات صغيورات وحدة مخصصة بلكحول ولأخرى مشروبات لغازية وأنواع من شوكولا..
لبسات غير بينوار وبقات كدور بيه شعلات تلفازة دارت فيلم جبدات واحد خنيشات كديريهم فلمايكرويف كيوليو گلية (فشار) حطاتهم قدامها وتكات تفرج...
حنان دوزات سيمانة فالدوران نهار دوزاتو فلمتاحف نهار أخر خدات باخرة لتمثال لحرية كل نهار ولمغامرة لي كدخل فيها، وكل ليلة كتحل تيليفونها تقلب لأنترنيت واش كاينة شي خبار على رائد ولكن والو هاد لوقت كلو عمرو تدكر فشي صحيفة ولا بابارازي شافتو غابر على لعيون.
سمعات فلأخبار بلي نيويورك بدات لحجر صحي وبركوهم من لخدمة مع تمنية لعشية ..
سيمو كيعيط لحنان شحال من مرة أخيرا جوبات: ساطة سمعتي لحجر صحي داروه ليكم تما أش غاديري؟؟
حنان: غير بشوية علك راه باقي لخروج ومامنعين والو قلت نسافر خديت تيكيتا غانمشي لفلوريدا غدا بليل ماعندهمش تم الحجر ولا لحالات بزاف ..
سيمو: اوكي فكرة مزيانة أما ماما عيطات ليا بغاتني نقنعك ترجعي للدار...
حنان: أويلي واللهما نضيع هاد لفرصة مايمكنش فرصة لعمر غانستغلها تال أخر دقيقة من هاد لعطلة هههه