متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الثانية عشر:الحجر تحت سقف واحد  😷

متمردتي:14

حط لفطور وبرك كيفطر ماتسناهاش خرجات حنان مدوشة لابسة سروال بيجامة ديال رجال غليض وقبية ديالها سخونة تقاشر صوف وشعرها سارد نشفاتو تاعيات وفلآخر خشاتو فطقية...
رائد نعت ليها لكرسيها: شربي داك أتاي غايعاونك على hangover ولا غاتبقاي تحسي براسك مريضة وراسك غايبقا ضارك..
حنان ساكتة غير كتحرك راسها حتى كلات وشبعات عاد شافت فيه: رائد سمح ليا على لبارح
رائد مبتاسم: علاش غانسمح لك
حنان: راك عارف گاع داكشي مكانش بإرادتي
رائد: كنظن حتى من لإرادة ديالك بغات تسكرك باش دير لي بغات، ملي مابقيتيش فوعيك ترخيتي وتعاملتي بطبيعتك وبأشنو باغة...وعلى ماشفت لبارح باغاني أنا واقلة!!
وحلها ليها تجيفات بلكحبة: كح كح كح اش كتخربق كح كح راه غير شراب ديما كيديرها
رائد هز حاجبو: كتشربي؟؟
حنان حصلات: احم لا ماشي هكاك
رائد: بلاتي بلاتي كتشربي؟؟
حنان حدرات راسها: جربتو مرة وحدة مع علياء
بقا كيشوف فيها وبتاسم جنب: مرة جاية نشربو بزوجنا
حنان: لالا دكشي حرام تسطيتي
رائد: ههههههههههه ديك فودكا لبارح حلالا طيبا؟؟؟؟
خنزرات فيه: مكنتش عارفة بارح
رائد ضحك وناض غادي لبيتو: لبسي من هنا لساعة غادي نخرجو
حنان وقفات بزربة: كيفاااش؟؟
ضار عندها وهز حاجبو: مباغاش تخرجي؟؟ (لالا باااغة) إوا لبسي مزيان وتكبطي شوية نخرجو
حنان تفكرات تلج جمعات طبلة دغيا ومشات تلبس هو لول عاد تخرج لزنقة تشوف تلج ...
                          *****************

كالراقصات المحترفات تتراقص رقائق التلج فالهواء على أنغام الرياح مزوقة السماء، أما الارض بحال لبساط الأبيض كتسنى فلأحدية ديالنا تلطخها...
كل نهار كيحمل فطياتو حوايج جداد تقدر تكون واحد خطوة للإنتقال إلى مستقبل بالنسبة لحنان وهي كتشوف طبقة لأرضية سوداء تحت من تلج ونقائه وبياضه ساطع كأنها ورقة جديدة فالحياة ليها تاهي، بحالو غاتبدا من جديد وتطبع فعقلها وقلبها أي مرحلة جديدة فلحياة أو قرار جديد...
تحركات لقدام الجردة فانتظار رائد وفنفس لوقت كتمتع عينيها من جمالية المكان، مقاعد لي ضايرين بيها كلهم مكسويين بحلة بيضاء وكأنه وسادة من الريش،بحال حنان فصل شتاء بهاد تلوج كيبان بحال شي هدية ماعند تاحد لحق انه يفتحها من غير فصل لخريف، باش يكشف لينا على لجمال لمتأصل أدناه كيحميه من شهور طويلة ديال برد وكيحافظ عليه، تماما بحال حنان خبات راسها مورا طبقات من الأمان كل مرة كتصد اي واحد فطريقها باش تحمي راسها، وبالنسبة لرائد هو لوحيد لي عندو لحق يعريها ويشوف قلبها وأشنو وسطو....
تحطو يدين على كتفها هزات راسها فرائد لي مبتاسم ماطة ليها ماسك ولبس هو واحد...
حنان: فين غادين؟؟
رائد هز يدها حيد ليها ليگات وشد فيها شبك صباعهم وخشا يديهم بزوج فجيب ديال جاكيط، حنان هزات فيه راسها ورجعات هبطاتو ليديهم لي مشابكين: اش كدير
رائد: كنزيد بخطوة للقدام من بعد لبارح أنا متأكد غانتلاقاو فنص طريق
حنان معرفات متقول يالاه حلات فمها غاتهضر نتاهز لفرصة وبسرعة خط شفايفو على شفايفها فقبلة سريعة ولكن كتبين موقفو منها وأشنو كيتوقع، من لي رجع لور وشاف فيها مزنگة ومقادراش تشوف فيه بتاسم: هادا تقدم ملموس...
حنان بغات تبدل موضوع باي طريقة: غانمشيو نديرو سكي ياك؟!!

مجنوناتي متمرداتي موعدنا غدا ولكن بليز بغيتكم تفركعو تعاليق لي فبالكم قولوها ولا غير مج مهم بانو معايا نتوما وجيماتكم 😝